റിയാലിറ്റി ഷോകളുടെ ചരിത്രത്തിലെ പുതുമയുളള പോരാട്ടത്തിനായിരിക്കും വെള്ളിയാഴ്ച ഖത്തറിലെ ഏഷ്യന്ടൗണ് ആഫിതിയേറ്റര് സാക്ഷ്യം വഹിക്കുക
മീഡിയാവണ് പതിനാലാംരാവ് സീസണ് ഫൈവ് ഗ്രാന്റ് ഫിനാലെക്കായുള്ള ഒരുക്കങ്ങള് ഖത്തറില് പുരോഗമിക്കുന്നു. ഏഷ്യന് ടൗണ് ആംഫിതിയേറ്ററില് പതിനായിരത്തിലധികം സംഗീതാസ്വാദകരെ സാക്ഷി നിര്ത്തിയായിരിക്കും ഫൈനല് പോരാട്ടം. കഴിഞ്ഞ 5 സീസണുകളില് നിന്നുള്ള മികച്ച ഗായകരില് നിന്ന് തെരെഞ്ഞടുത്ത 5 ഗായകര് മാറ്റുരക്കുന്ന ഫിനാലെയില് മറ്റു പ്രമുഖ പിന്നണി ഗായകരും അണിനിരക്കും.
റിയാലിറ്റി ഷോകളുടെ ചരിത്രത്തിലെ പുതുമയുളള പോരാട്ടത്തിനായിരിക്കും വെള്ളിയാഴ്ച ഖത്തറിലെ ഏഷ്യന്ടൗണ് ആഫിതിയേറ്റര് സാക്ഷ്യം വഹിക്കുക. പതിനായിരത്തിലധികം സംഗീതാസ്വാദകര്ക്കു മുമ്പാകെ പതിനാലാം രാവിലെ 5 സീസണുകളില് നിന്നുള്ള മികച്ച ഗായകരില് നിന്ന് മത്സരിച്ചെത്തിയ 5 ഫൈനലിസ്റ്റുകള് പാടിത്തിമര്ക്കും . നികേഷ് , അജ്മല് , ശംശാദ് , തിര്ത്ഥ , നര്മദ എന്നിവരാണ് സീസണ് 5 ലെ ഫൈനലിസ്റ്റുകള് . വിധികര്ത്താക്കളായ സംഗീത സംവിധായകന് ഷാന് റഹ്മാന് , ഗായിക രഹ്ന ഫൈസല് എളേറ്റില് എന്നിവര്ക്കു പുറമെ പിന്നണിഗായകരായ വിധു പ്രതാപ് ,
അനിതാശൈഖ് എന്നിവരും ഇശല് ഗായകന് ആദില് അത്തുവും ഈ സംഗീതമാമാങ്കത്തിന്റെ ഭാഗമാകും . പരിപാടിക്ക് മാറ്റേകാന് ഈജിപ്ഷ്യന് നര്ത്തകരുടെ തന്നൂറ നൃത്തവും ഖത്തറിലെ സ്വദേശി കലാകാരന്മാരുടെ കലാപ്രകടനങ്ങളും അരങ്ങേറും .കോഴിക്കോട്ടെ എസ് ബാന്റ് ഓര്ക്കസ്ട്രയാണ് പശ്ചാത്തലസംഗീതം , പതിനാലാം രാവ് അവതാരകയായ മേഘ്ന യാണ് ഗ്രാന്റ് ഫിനാലെയുടെയും അവതാരക . പ്രോഗ്രാം പ്രൊഡ്യൂസര് ജ്യോതി വെള്ളല്ലൂരിന്റെ നേതൃത്വത്തിലുള്ള സാങ്കേതിക വിദഗ്ദര് ദോഹയിലെത്തിയിട്ടുണ്ട് .