എണ്ണ ഉല്‍പാദനത്തില്‍ ഒപെക് നയത്തിനൊപ്പമെന്ന് യുഎഇ

ഉൽപാദനത്തിൽ വരുത്തിയ കുറവ്​ എണ്ണവിലയെ കാര്യമായി സ്വാധീനിക്കുന്നതായാണ്​ യുഎഇ വിലയിരുത്തൽ.

ആഗോളതലത്തിൽ എണ്ണ ഉൽപാദനം വെട്ടിച്ചുരുക്കാൻ രൂപപ്പെടുത്തിയ കരാറിൽ പ്രതിബദ്ധതയോടെ തുടരുമെന്ന്​ യുഎഇ . ഊർജ വ്യവസായ മന്ത്രി സുഹൈൽ ബിൻ മുഹമ്മദ്​ ഫറജ്​ ഫാരിസ്​ അൽ മസ്റൂഇയാണ്​ ഇക്കാര്യം അറിയിച്ചത്​. ഉൽപാദനത്തിൽ വരുത്തിയ കുറവ്​ എണ്ണവിലയെ കാര്യമായി സ്വാധീനിക്കുന്നതായാണ്​ യുഎഇ വിലയിരുത്തൽ.

ഉൽപാദനം കുറക്കാനുള്ള കരാറിനോട്​ ഒപെക്​ അംഗ രാജ്യങ്ങളും ഒപെകേതര രാജ്യങ്ങളും അനുകൂലമായാണ്​ പ്രതികരിച്ചത്​. ലക്ഷ്യം നേടുന്നതിൽ ഈ നീക്കം ഏറെ ഗുണം ചെയ്യുന്നതായാണ്​ യുഎഇ വിലയിരുത്തൽ. സാമ്പത്തിക സഹകരണ വികസന സംഘടന രാജ്യങ്ങളിൽ 2017 തുടക്കം മുതൽ ക്രൂഡ്​ ഓയിൽ ശേഖരം 22 കോടി ബാരൽ കണ്ട്​ കുറക്കാൻ സാധിച്ചു. 2016ന്​ പിറകിലുള്ള അഞ്ച്​ വർഷം കുറച്ച ബാരലുകളുടെ ശരാശരിയെക്കാൾ കൂടുതലാണിതെന്ന്​ യുഎഇ ഈർജ മന്ത്രാലയം വ്യക്തമാക്കി.

നവംബർ 30ന്​ നടന്ന ഒപെക്​ മന്ത്രിതല യോഗത്തിൽ ​മൊത്തം പ്രതിദിന ഉൽപാദനം 18 ലക്ഷം ബാരൽ കുറക്കാനുള്ള സഹകരണ പ്രഖ്യാപനം ചരിത്രത്തിലെ ആദ്യത്തേതായിരുന്നുവെന്നും ഒപെക്​ സമ്മേളന പ്രസിഡൻറ്​ കൂടിയായ യുഎഇ മന്ത്രി അഭിപ്രായപ്പെട്ടു. 2017ൽ ഒപെക്​ ചെയർമാനായിരുന്ന സൗദി ഈർജ വ്യവസായ മന്ത്രി ഖാലിദ്​ അൽ ഫാലിഹ്​ ഇക്കാര്യത്തിൽ നടത്തിയ പ്രയത്​നങ്ങൾ അദ്ദേഹം എടുത്തുപറഞ്ഞു. ഇത്തരം പ്രയത്​നങ്ങൾ വിപണിയിൽ എണ്ണവില സ്ഥിരത കൈവരിക്കുന്നതിന്​ ഏറെ സഹായിച്ചു. ഒപെക്​ അംഗങ്ങളും അല്ലാത്തവരും കഴിഞ്ഞ വർഷമുണ്ടാക്കിയ സഹകരണത്തിന്‍റെ ഫലമായുണ്ടായ നേട്ടങ്ങളെ അടിസ്ഥാനമാക്കി ഭാവിയിൽ കൂടുതൽ നവീനമായ ലക്ഷ്യങ്ങൾ ആവിഷ്കരിക്കാൻ ഉദ്ദേശിക്കുന്നതായും കൂട്ടിച്ചേർത്തു.