ദുബൈ: ക്രിസ്മസിനെ വരവേൽക്കാൻ ദുബൈ ഗ്ലോബൽ വില്ലേജ് ഒരുങ്ങി. ലോകത്തിന്റെ വിവിധ ഭാഗങ്ങളിൽ നിന്നെത്തുന്ന വിനോദ സഞ്ചാരികൾക്കായി വേറിട്ട ക്രിസ്മസ് ആഘോഷ പരിപാടികളാണ് ആഗോള നഗരിയിൽ ഒരുങ്ങുന്നത്. വിവിധ സാംസ്കാരിക പരിപാടികളും ആഘോഷത്തിന്റെ ഭാഗമായി ഉണ്ടാകും.
'വരൂ, സാന്റായ്ക്കും കൂട്ടർക്കുമൊപ്പം ഏറ്റവും മികച്ച ക്രിസ്മസ് ആഘോഷിക്കാൻ' എന്ന ടാഗ്ലൈനോടെയാണ് ദുബൈ ഗ്ലോബൽ വില്ലേജിലെ ആഘോഷ പരിപാടികൾ.
21 മീറ്റർ ഉയരമാണ് ഗ്ലോബൽ വില്ലേജിലെ പ്രധാന കേന്ദ്രത്തിൽ ഒരുക്കിയ ഫെസ്റ്റീവ് ട്രീക്കുള്ളത്. ലോകമൊന്നിച്ചുള്ള സംസ്കാരത്തോടൊപ്പം ക്രിസ്മസ് ആഘോഷിക്കാനുള്ള സന്ദർഭം കൂടിയാണ് സംഘാടകർ ഇവിടെ ഒരുക്കുന്നത്. അസംഖ്യം സമ്മാന പൊതികൾ കൊണ്ടുകൂടി അലങ്കരിച്ചിരിക്കുകയാണ് ട്രീ.
മലയാളികൾ ഉൾപ്പെടെയുള്ള കലാകാരൻമാരാണ് ട്രീ നിർമാണത്തിനു പിന്നിൽ. ക്രിസ്മസ് അപ്പൂപ്പനൊപ്പം ആടിപ്പാടാനും അവസരമുണ്ട്. ആഗോള നഗരിയിലെ ആഘോഷങ്ങൾക്കായി നിരവധി കുടുംബങ്ങളാണ് വന്നെത്തുന്നത്. കുട്ടികളും ക്രിസ്മസ് ആഘോഷത്തിന്റെ ആവേശത്തിലാണ്.
ക്രിസ്മസ് ദിനത്തിൽ ഗ്ലോബൽ വില്ലേജിലെ പ്രധാന സ്റ്റേജിൽ നിരവധി സാംസ്കാരിക പരിപാടികളും അരങ്ങേറും. ക്രിസ്മസിനൊപ്പം ന്യൂ ഇയർ കൂടി മുൻനിർത്തി ആഗോള ഗ്രാമത്തിലേക്ക് വൻതോതിലാണ് സന്ദർശകരെത്തുന്നത്.