സിറിയയിൽ ഇറാൻ-അമേരിക്ക ഏറ്റുമുട്ടൽ: രണ്ടിടങ്ങളിൽ യു.എസ്​ ബോംബാക്രമണം

സിറിയയിലെ ഇറാൻ മിലീഷ്യ കേന്ദ്രങ്ങളിൽ ബോംബാക്രമണം നടത്തി അമേരിക്ക. തങ്ങളുടെ സൈനികരുടെ ജീവന്​ ഭീഷണി ഉയർത്തുന്നവർക്കെതിരെ കടുത്ത നടപടി ഇനിയും തുടരുമെന്നും അമേരിക്ക മുന്നറിയിപ്പ്​ നൽകി. അതേ സമയം സിറിയൻ ആക്രമണം നിലവിലെ ആണവ കരാർ ചർച്ചകളെ ബാധിക്കില്ലെന്ന്​ വൈറ്റ്​ ഹൗസ്​ വ്യക്​തമാക്കി.

കഴിഞ്ഞ ഏതാനും ദിവസങ്ങളായി സിറിയയലിലെ ഇറാൻ അനുകൂല മിലീഷ്യക്കെതിരെ സൈനിക നീക്കം അമേരിക്ക തുടരുകയാണ്​. വ്യാഴാഴ്​ച മാത്രം രണ്ടിടങ്ങളിലാണ്​ അമേരിക്കൻ വിമാനങ്ങൾ ബോംബ്​ വർഷിച്ചത്​. സിറിയയിൽ സൈനിക പരിശീലനത്തിനെത്തിയ ഇറാൻ റവല്യൂഷനറി ഗാർഡ്​ ജനറൽ കഴിഞ്ഞ ദിവസം കൊല്ലപ്പെട്ടിരുന്നു. യു.എസ്​ സൈനിക കേന്ദ്രത്തിനു നേരെ മിസൈൽ ആക്രമണം നടന്നതായി ആരോപിച്ചാണ്​ അമേരിക്കൻ സേനയുടെ പുതിയ തിരിച്ചടി. തങ്ങളു​ടെ സൈന്യത്തിന്‍റെ സുരക്ഷ ഉറപ്പാക്കാൻ എല്ലാ നീക്കവും തുടരുമെന്ന്​ പെന്‍റഗൺ അറിയിച്ചു. മിലീഷ്യകളെ മുൻനിർത്തി മേഖലയിൽ കാലുഷ്യം പടർത്താനുള്ള നീക്കമാണ്​ ഇറാൻ നടത്തുന്നതെന്നും അമേരിക്ക ആരോപിച്ചു. എന്നാൽ ആണവ കരാർ ചർച്ചകൾക്ക്​ സിറിയൻ സംഘർഷം തടസമാകില്ലെന്ന്​ യൂറോപ്യൻ നേതാക്കളെ അമേരിക്ക അറിയിച്ചിട്ടുണ്ട്​. അതേ സമയം സിറിയയിൽ ഇസ്രായേലും അമേരിക്കയും നടത്തുന്ന ​സൈനിക നടപടി ഗുരുതര പ്രത്യാഘാതം സൃഷ്​ടിക്കുമെന്ന്​ ഇറാൻ മുന്നറിയിപ്പ്​ നൽകി