ഷാർജ എമിറേറ്റിൽ നടപ്പിലാക്കിയ മൂന്നു ദിവസത്തെ വാരാന്ത്യ അവധി സംവിധാനം ഗുണകരമായെന്ന് വിലയിരുത്തൽ

ദുബൈ: ഷാർജ എമിറേറ്റിൽ നടപ്പിലാക്കിയ മൂന്നു ദിവസത്തെ വാരാന്ത്യ അവധി സംവിധാനം ഗുണകരമായെന്ന്​ വിലയിരുത്തൽ. വിദ്യാർഥികളുടെ പഠന നിലവാരത്തിലും മാനസിക തലത്തിലും നല്ല മാറ്റങ്ങൾ ഉണ്ടായതായി പഠന റിപ്പോർട്ടിൽ പറയുന്നു. 

ഷാർജ സ്വകാര്യ വിദ്യാഭ്യാസ വകുപ്പ്, രക്ഷിതാക്കളെയും അധ്യാപകരെയും ഉൾപ്പെടുത്തി നടത്തിയ വിപുലമായ സർവേയിലാണ്​ കണ്ടെത്തൽ. വിവിധ രാജ്യക്കാരായ 31,198 വിദ്യാർഥികളുടെ കുടുംബങ്ങളുടെയും ആയിരക്കണക്കിന് ​അധ്യാപകരുടെയും അഡ്മിനിസ്ട്രേറ്റർമാരുടെയും സഹായത്തോടെയായിരുന്നു പഠനം. അക്കാദമിക് നേട്ടം, ഉൽപ്പാദനക്ഷമത, മാനസിക ക്ഷേമം എന്നീ സൂചകങ്ങളിൽ കാര്യമായ മികവ്​സർവെയിൽ തെളിഞ്ഞതായി എസ്​.പി.ഇ.എ അധ്യക്ഷ ഡോ. മുഹദ്ദിസ അൽ ഹാഷിമി പറഞ്ഞു.

വിദ്യാർഥികളുടെ പഠന നിലവാരത്തിൽ ഗണ്യമായ വർധനവുണ്ടായെന്നാണ്​​ പ്രധാന കണ്ടെത്തൽ. വിദ്യാർഥികളുടെ സാമൂഹിക കഴിവുകളിലും ഇടപെടലുകളിലും മികവ്​വർധിച്ചു. ആഗോള നിലവാരത്തിന് അനുസൃതമായാണ് സ്‌കൂൾ സമയമാറ്റമെന്നും പഠനം വിലയിരുത്തുന്നു. ഷാർജയിൽ കഴിഞ്ഞ വർഷം ജനുവരി മുതലാണ്​ പുതിയ വാരാന്ത പ്രവൃത്തി സമയം നടപ്പിലാക്കിയത്​. തിങ്കൾ മുതൽ വ്യാഴം വരെയാണ്​ നിലവിലെ പ്രവൃത്തി ദിനങ്ങൾ.

നേരത്തെ ഞായർ മുതൽ വ്യാഴം വരെയായിരുന്നു പ്രവൃത്തി ദിവസങ്ങൾ. യു.എ.ഇയിലെ മറ്റു എമിറേറ്റുകളിൽ പ്രവൃ​ത്തി ദിവസങ്ങൾ തിങ്കൾ മുതൽ വെള്ളി വരെയാക്കിയ സന്ദർഭത്തിലാണ് ​ഷാർജയും മാറ്റം പ്രഖ്യാപിച്ചത്​. മറ്റു എമിറേറ്റുകളിൽ സ്​കൂളുകൾ തിങ്കൾ മുതൽ വെള്ളി വരെയാണ് ​പ്രവർത്തിക്കുന്നത്​.