രാവിലെ കണ്ണ് തുറന്ന ഉടൻ ഫോൺ നോക്കാറുണ്ടോ? ഈ ശീലം ശരീരത്തെയും മനസ്സിനെയും ബാധിക്കും

രാവിലെ കണ്ണ് തുറന്ന ഉടൻ മൊബൈൽ ഫോൺ പരിശോധിക്കുന്നത് ഇന്ന് പലരുടെയും പതിവാണ്. വാട്സ്ആപ്പ് സന്ദേശങ്ങൾ, സോഷ്യൽ മീഡിയ, ഇ-മെയിലുകൾ, വാർത്തകൾ എന്നിവ കിടക്കയിൽ നിന്ന് എഴുന്നേൽക്കുന്നതിന് മുമ്പ് തന്നെ പരിശോധിക്കുന്നവരാണ് ഏറെയും. എന്നാൽ ഈ ചെറിയ ശീലം ശരീരത്തിനും മനസ്സിനും ഗൗരവമായ ആരോഗ്യപ്രശ്നങ്ങൾ ഉണ്ടാക്കാമെന്ന് ആരോഗ്യവിദഗ്ധർ മുന്നറിയിപ്പ് നൽകുന്നു.

വിദഗ്ധരുടെ അഭിപ്രായത്തിൽ, ഉറക്കത്തിൽ നിന്ന് ഉണരുന്ന ആദ്യ 20 മുതൽ 30 മിനിറ്റ് വരെയുള്ള സമയം തലച്ചോർ ശാന്താവസ്ഥയിൽ നിന്ന് സജീവാവസ്ഥയിലേക്ക് മാറുന്ന ഘട്ടമാണ്. ഈ സമയത്ത് ജോലിയുമായി ബന്ധപ്പെട്ട സന്ദേശങ്ങളോ, മോശം വാർത്തകളോ, സോഷ്യൽ മീഡിയ അറിയിപ്പുകളോ കാണുന്നത് ശരീരത്തിലെ കോർട്ടിസോൾ (സ്ട്രെസ് ഹോർമോൺ) ഉയരാൻ ഇടയാക്കുകയും ദിവസം തുടങ്ങും മുമ്പേ മാനസിക സമ്മർദ്ദം വർധിപ്പിക്കുകയും ചെയ്യാം.

അമൃത ആശുപത്രിയിലെ സൈക്യാട്രി വിഭാഗം അസോസിയേറ്റ് പ്രൊഫസർ ഡോ. ഗായത്രി ഭാട്ടിയ പറയുന്നതനുസരിച്ച്, ഉണർന്ന ഉടൻ തലച്ചോറിനെ അനാവശ്യ വിവരങ്ങളാൽ നിറയ്ക്കുന്നത് ഉത്കണ്ഠയും സമ്മർദ്ദവും വർധിപ്പിക്കും. ദിവസത്തിന്റെ മാനസികാവസ്ഥയെ ഇത് പ്രതികൂലമായി സ്വാധീനിക്കുമെന്നും അവർ ചൂണ്ടിക്കാട്ടുന്നു.

കണ്ണുകളുടെ ആരോഗ്യത്തെയും ഈ ശീലം ബാധിക്കുമെന്ന് നേത്രരോഗ വിദഗ്ധർ പറയുന്നു. ഉറക്കമുണർന്ന ഉടൻ സ്ക്രീനിലെ ശക്തമായ വെളിച്ചം കണ്ണുകൾക്ക് അസ്വസ്ഥത, വരൾച്ച, കാഴ്ച മങ്ങൽ എന്നിവയ്ക്ക് കാരണമാകാം. പ്രത്യേകിച്ച് ഇരുണ്ട മുറിയിൽ നിന്ന് നേരിട്ട് മൊബൈൽ സ്ക്രീനിലേക്ക് നോക്കുന്നത് കണ്ണുകൾക്ക് കൂടുതൽ സമ്മർദ്ദം സൃഷ്ടിക്കും.

പഠനങ്ങൾ പ്രകാരം, രാവിലെ സോഷ്യൽ മീഡിയ ഉപയോഗിച്ച് ദിവസം തുടങ്ങുന്നവരിൽ മറ്റുള്ളവരുമായി സ്വയം താരതമ്യം ചെയ്യാനുള്ള പ്രവണതയും ഉത്കണ്ഠയും വർധിക്കാൻ സാധ്യതയുണ്ട്. ഇത് മാനസികാരോഗ്യത്തെയും ആത്മവിശ്വാസത്തെയും ബാധിക്കാം. ജോലിയുമായി ബന്ധപ്പെട്ട സന്ദേശങ്ങൾ രാവിലെ തന്നെ പരിശോധിക്കുന്നത് “മോണിംഗ് സ്ട്രെസ്” വർധിപ്പിക്കുകയും ദിവസമൊട്ടാകെ ക്ഷീണം അനുഭവപ്പെടാനും കാരണമാകുമെന്ന് വിദഗ്ധർ പറയുന്നു.

അതേസമയം, ഉണർന്നതിന് ശേഷം ആദ്യം വെള്ളം കുടിക്കുക, ജനൽ തുറന്ന് പ്രകൃതിവെളിച്ചം സ്വീകരിക്കുക, ചെറിയ സ്‌ട്രെച്ചിംഗ് അല്ലെങ്കിൽ ധ്യാനം ചെയ്യുക, തുടർന്ന് മാത്രമേ ഫോൺ ഉപയോഗിക്കാവൂ എന്നാണ് ആരോഗ്യവിദഗ്ധരുടെ നിർദേശം. ഉറക്കമുണർന്ന് കുറഞ്ഞത് 20–30 മിനിറ്റെങ്കിലും മൊബൈൽ ഉപയോഗം ഒഴിവാക്കുന്നത് മാനസികാരോഗ്യത്തിനും കണ്ണുകളുടെ ആരോഗ്യത്തിനും ഗുണകരമാണെന്നും അവർ നിർദേശിക്കുന്നു.