കുട്ടികളുടെ അമിതവണ്ണം അവഗണിക്കരുത്! മാതാപിതാക്കൾ വരുത്തുന്ന വലിയ തെറ്റുകൾ; WHO നൽകുന്ന നിർദേശം ഇതാ!

‘നന്നായി ഭക്ഷണം കഴിക്കുന്ന കുട്ടിയാണ്’, ‘വലുതാകുമ്പോൾ തടി കുറയും’... കുട്ടികളുടെ ശരീരഭാരത്തെക്കുറിച്ച് നമ്മൾ പതിവായി കേൾക്കുന്ന വാക്കുകളാണിത്. എന്നാൽ കുട്ടിയുടെ അമിതഭാരം വളർച്ചയുടെ സ്വാഭാവിക ഭാഗം മാത്രമാണെന്ന് കരുതി അവഗണിക്കുന്നത് എല്ലായ്പ്പോഴും ശരിയല്ല. കുട്ടിക്കാലത്തെ അമിതവണ്ണം പിന്നീട് പ്രമേഹം, ഹൃദയ സംബന്ധമായ രോഗങ്ങൾ തുടങ്ങിയ ആരോഗ്യപ്രശ്നങ്ങളിലേക്കുള്ള സാധ്യത വർധിപ്പിക്കാം.

കുട്ടികളിലും കൗമാരക്കാരിലും അമിതവണ്ണം കൈകാര്യം ചെയ്യുന്നതിനായി ലോകാരോഗ്യ സംഘടന (WHO) ആദ്യമായി ആഗോള മാർഗനിർദേശങ്ങൾ പുറത്തിറക്കിയിരിക്കുകയാണ്. ഭക്ഷണക്രമം, ശാരീരിക പ്രവർത്തനം, പെരുമാറ്റത്തിലെ മാറ്റങ്ങൾ എന്നിവയ്ക്കാണ് പ്രധാന പരിഗണന. എല്ലാ കുട്ടികൾക്കും മരുന്ന് വേണമെന്നല്ല മാർഗനിർദേശത്തിന്റെ അർഥം. നേരത്തെ തിരിച്ചറിയുകയും ആരോഗ്യകരമായ ജീവിതശൈലി കുടുംബത്തിന്റെ തന്നെ ഭാഗമാക്കുകയും ചെയ്യുക എന്നതാണ് പ്രധാന സന്ദേശം.

ഇന്ത്യയിലും ആശങ്ക ഉയരുന്നു

ഇന്ത്യയിൽ കുട്ടികളിലും കൗമാരക്കാരിലും അമിതഭാരം വർധിക്കുന്നതായി വിവിധ ആരോഗ്യ സർവേകൾ ചൂണ്ടിക്കാണിക്കുന്നു. UNICEF ഇന്ത്യ പുറത്തുവിട്ട NFHS കണക്കുകൾ പ്രകാരം കൗമാരക്കാരികളിലെ അമിതഭാരം 2.4 ശതമാനത്തിൽ നിന്ന് 5.4 ശതമാനമായും ആൺകുട്ടികളിൽ 1.7 ശതമാനത്തിൽ നിന്ന് 6.6 ശതമാനമായും ഉയർന്നു.

അഞ്ച് വയസിന് താഴെയുള്ള കുട്ടികളിലും അമിതഭാരത്തിന്റെ തോത് NFHS-3ലെ 1.5 ശതമാനത്തിൽ നിന്ന് NFHS-5ൽ 3.4 ശതമാനമായി ഉയർന്നതായി റിപ്പോർട്ടുകൾ പറയുന്നു. അതേസമയം NFHS-6 (2023-24) പ്രകാരം അഞ്ചുവയസിന് താഴെയുള്ള കുട്ടികളിൽ 1.3 ശതമാനം പേർ അമിതഭാരമുള്ളവരാണെന്നാണ് കണക്ക്.

ആഗോളതലത്തിലും സ്ഥിതി ആശങ്കാജനകമാണ്. 5 മുതൽ 19 വയസുവരെയുള്ള കുട്ടികളിലും കൗമാരക്കാരിലും അമിതവണ്ണത്തിന്റെ വ്യാപനം 1990ന് ശേഷം നാലിരട്ടിയായി വർധിച്ച് ഏകദേശം 2 ശതമാനത്തിൽ നിന്ന് 8 ശതമാനത്തിലെത്തിയതായി WHO പറയുന്നു. 2024ൽ ഈ പ്രായവിഭാഗത്തിൽ ഏകദേശം 40 കോടി പേർ അമിതഭാരമുള്ളവരായിരുന്നുവെന്നും WHO കണക്കാക്കുന്നു.

എപ്പോഴാണ് കുട്ടിയുടെ ഭാരം ആരോഗ്യപ്രശ്നമാകുന്നത്?

കുട്ടിയുടെ ഭാരം നോക്കി മാത്രം അമിതവണ്ണമുണ്ടോ എന്ന് തീരുമാനിക്കാനാകില്ല. പ്രായവും ലിംഗവും ഉയരവും കണക്കിലെടുത്തുള്ള വളർച്ചാ മാനദണ്ഡങ്ങൾ ഉപയോഗിച്ചാണ് സാധാരണ വിലയിരുത്തൽ നടത്തുന്നത്.

കുട്ടിയുടെ വളർച്ചാ ചാർട്ടിലെ BMI-for-age പോലുള്ള മാനദണ്ഡങ്ങളാണ് ഡോക്ടർമാർ പരിശോധിക്കുന്നത്. പ്രായത്തിനും ലിംഗത്തിനും അനുസരിച്ചുള്ള ശരാശരിയിൽ നിന്ന് എത്ര വ്യത്യാസമുണ്ടെന്നതും പ്രധാനമാണ്. അതിനാൽ വീട്ടിൽ മുതിർന്നവരുടെ BMI കണക്കാക്കുന്ന രീതിയിൽ കുട്ടിയുടെ ഭാരം വിലയിരുത്തരുത്.

കുട്ടിയുടെ ഭാരം പെട്ടെന്ന് കൂടുകയോ പ്രായത്തിനനുസരിച്ച് ഉയരത്തേക്കാൾ ഭാരം കൂടുതലായി വർധിക്കുകയോ ചെയ്യുന്നുണ്ടെങ്കിൽ ശിശുരോഗ വിദഗ്ധന്റെ പരിശോധന തേടുന്നത് നല്ലതാണ്.

‘കുറച്ച് കഴിക്കൂ, കൂടുതൽ വ്യായാമം ചെയ്യൂ’ എന്നതിൽ മാത്രം ഒതുങ്ങില്ല

WHOയുടെ പുതിയ മാർഗനിർദേശങ്ങളിൽ ഭക്ഷണക്രമത്തിലെ മാറ്റം, ശാരീരിക പ്രവർത്തനം, പെരുമാറ്റത്തിലെ മാറ്റം എന്നിവയ്ക്ക് പ്രധാന സ്ഥാനമാണുള്ളത്. എന്നാൽ ഇതിന്റെ അർഥം കുട്ടിയെ പട്ടിണിക്കിടത്തുകയോ കർശനമായ ഡയറ്റിൽ ആക്കുകയോ ചെയ്യുക എന്നല്ല.

ഇന്ത്യൻ കുടുംബങ്ങളിൽ വീട്ടിലെ ഭക്ഷണത്തോടൊപ്പം ബിസ്കറ്റ്, പാക്കറ്റ് സ്നാക്കുകൾ, ബേക്കറി വിഭവങ്ങൾ, മധുരപാനീയങ്ങൾ, ഫാസ്റ്റ് ഫുഡ്, മറ്റ് അൾട്രാ-പ്രോസസ്ഡ് ഭക്ഷണങ്ങൾ എന്നിവയും കുട്ടികളുടെ ദിവസേനയുള്ള ഭക്ഷണക്രമത്തിൽ ഉൾപ്പെടുന്നുണ്ട്.

പച്ചക്കറികൾ, പഴങ്ങൾ, പയർവർഗങ്ങൾ, മുഴുവൻ ധാന്യങ്ങൾ, ആവശ്യമായ പ്രോട്ടീൻ, ആരോഗ്യകരമായ കൊഴുപ്പ് എന്നിവ ഉൾപ്പെടുന്ന സമീകൃത ഭക്ഷണക്രമത്തിലേക്ക് കുട്ടികളെ പതുക്കെ മാറ്റുകയാണ് ലക്ഷ്യം.

തടിച്ച കുട്ടി നന്നായി പോഷകമേറ്റ കുട്ടിയാണോ?

അല്ല. ശരീരഭാരം കൂടുതലാണെന്നത് മാത്രം കുട്ടിക്ക് ആവശ്യമായ പോഷകങ്ങളെല്ലാം ലഭിക്കുന്നുണ്ടെന്ന് ഉറപ്പാക്കുന്നില്ല.

ഒരു കുട്ടിക്ക് അമിതവണ്ണത്തോടൊപ്പം ഇരുമ്പ്, വിറ്റാമിനുകൾ, ധാതുക്കൾ, പ്രോട്ടീൻ തുടങ്ങിയ പോഷകങ്ങളുടെ കുറവും ഉണ്ടാകാം. അതുകൊണ്ട് ‘കുട്ടി തടിച്ചല്ലോ, നന്നായി ഭക്ഷണം കഴിക്കുന്നുണ്ടാകും’ എന്ന ധാരണ തെറ്റാണ്.

ഇന്ത്യയിൽ പോഷകക്കുറവും അമിതവണ്ണവും ഒരേസമയം നിലനിൽക്കുന്ന സാഹചര്യം വർധിക്കുന്നതായി പോഷകാഹാര വിദഗ്ധർ ചൂണ്ടിക്കാണിക്കുന്നു. അതിനാൽ കുട്ടിയുടെ ഭാരം മാത്രം നോക്കാതെ ഭക്ഷണത്തിന്റെ ഗുണനിലവാരവും പരിശോധിക്കണം.

പുറമേ ആരോഗ്യവാനെന്ന് തോന്നിയാലും...

അമിതവണ്ണമുള്ള കുട്ടികൾക്ക് എല്ലായ്പ്പോഴും പുറത്തുനിന്ന് ആരോഗ്യപ്രശ്നങ്ങളുടെ ലക്ഷണങ്ങൾ കാണണമെന്നില്ല. കുട്ടി സജീവമായിരിക്കാം, കളിക്കാം, സാധാരണപോലെ തോന്നാം. എന്നാൽ ഉയർന്ന രക്തസമ്മർദം, കൊളസ്ട്രോൾ, രക്തത്തിലെ പഞ്ചസാരയിലെ വ്യതിയാനം, കരളിൽ കൊഴുപ്പ് അടിയുക തുടങ്ങിയ മെറ്റബോളിക് പ്രശ്നങ്ങൾ ചിലപ്പോൾ ലക്ഷണങ്ങളില്ലാതെയും ഉണ്ടാകാം.

അതുകൊണ്ട് കുട്ടിയുടെ ശരീരഭാരം സംബന്ധിച്ച് ആശങ്കയുണ്ടെങ്കിൽ സ്വയം ഡയറ്റ് ആരംഭിക്കുന്നതിന് പകരം ശിശുരോഗ വിദഗ്ധനെ സമീപിക്കുന്നതാണ് ഉചിതം.

ഉറക്കവും പ്രധാനമാണ്

ഭക്ഷണവും വ്യായാമവും മാത്രമല്ല കുട്ടിയുടെ ആരോഗ്യകരമായ വളർച്ചയ്ക്ക് പ്രാധാന്യം. മതിയായ ഉറക്കവും അത്രതന്നെ പ്രധാനമാണ്.

രാത്രി വൈകിയുള്ള മൊബൈൽ ഉപയോഗം, ടിവി കാണൽ, ക്രമരഹിതമായ ഉറക്കസമയം എന്നിവ കുട്ടികളുടെ ജീവിതശൈലിയെ ബാധിക്കാം. അതിനാൽ പ്രായത്തിന് അനുയോജ്യമായ ഉറക്കവും സ്ഥിരമായ ദിനചര്യയും ഉറപ്പാക്കാൻ മാതാപിതാക്കൾ ശ്രദ്ധിക്കണം.

കുട്ടിക്ക് നേരിട്ട് ‘നിനക്ക് തടി കൂടുതലാണ്’ എന്ന് പറയരുത്

അമിതവണ്ണം കൈകാര്യം ചെയ്യുമ്പോൾ ശാരീരിക ആരോഗ്യത്തോടൊപ്പം കുട്ടിയുടെ മാനസികാരോഗ്യവും പരിഗണിക്കണം. ശരീരത്തെക്കുറിച്ചുള്ള പരിഹാസവും നിരന്തരമായ തടി പരാമർശങ്ങളും കുട്ടിയിൽ അപമാനബോധവും ആത്മവിശ്വാസക്കുറവും ഉണ്ടാക്കാം.

‘തടി കുറയ്ക്കണം’ എന്നതിനേക്കാൾ ‘ആരോഗ്യകരമായി വളരാൻ നമുക്ക് ഒരുമിച്ച് ചില മാറ്റങ്ങൾ വരുത്താം’ എന്ന സമീപനമാണ് നല്ലത്.

കുട്ടിക്ക് മാത്രം ഭക്ഷണനിയന്ത്രണം ഏർപ്പെടുത്തുകയും വീട്ടിലെ മറ്റുള്ളവർ പതിവുപോലെ മധുരപാനീയങ്ങളും ജങ്ക് ഫുഡും കഴിക്കുകയും ചെയ്യുന്നതിന് പകരം കുടുംബം മുഴുവൻ ആരോഗ്യകരമായ ശീലങ്ങൾ പിന്തുടരുന്നതാണ് കൂടുതൽ ഫലപ്രദം.

മരുന്ന് എല്ലാവർക്കും വേണ്ട

WHOയുടെ മാർഗനിർദേശപ്രകാരം 0 മുതൽ 9 വയസുവരെയുള്ള കുട്ടികളിൽ അമിതവണ്ണത്തിനായി ഫാർമക്കോളജിക്കൽ ചികിത്സ സാധാരണയായി ശുപാർശ ചെയ്യുന്നില്ല.

10 മുതൽ 19 വയസുവരെയുള്ള കൗമാരക്കാരിൽ, ആവശ്യമായ ജീവിതശൈലി മാറ്റങ്ങൾ മാത്രം മതിയായ ഫലം നൽകാത്ത സാഹചര്യത്തിൽ, അംഗീകൃത അമിതവണ്ണ മരുന്നുകൾ ഡോക്ടറുടെ കർശന മേൽനോട്ടത്തിൽ പരിഗണിക്കാം. ഗുരുതരമായ കൗമാര അമിതവണ്ണത്തിൽ ചില പ്രത്യേക സാഹചര്യങ്ങളിൽ ബാരിയാട്രിക് സർജറിയും പരിഗണിക്കാം.

പ്രത്യേകിച്ച് GLP-1 ഉൾപ്പെടെയുള്ള വണ്ണം കുറയ്ക്കാനുള്ള മരുന്നുകൾ മാതാപിതാക്കൾ സ്വമേധയാ കുട്ടികൾക്ക് നൽകാൻ പാടില്ല. പാർശ്വഫലങ്ങൾ ഉണ്ടാകാം. കുട്ടിയുടെ പ്രായം, ആരോഗ്യസ്ഥിതി, അമിതവണ്ണത്തിന്റെ തീവ്രത തുടങ്ങിയവ വിലയിരുത്തിയ ശേഷമേ ഇത്തരം ചികിത്സയെക്കുറിച്ച് ഡോക്ടർ തീരുമാനിക്കാവൂ.

ലക്ഷ്യം ‘മെലിഞ്ഞ കുട്ടി’യല്ല, ആരോഗ്യവാനായ കുട്ടിയാണ്

കുട്ടിയുടെ ശരീരഭാരം കുറയ്ക്കുക എന്നത് മാത്രം ലക്ഷ്യമാക്കി ഭക്ഷണം നിയന്ത്രിക്കുന്നത് ശരിയായ സമീപനമല്ല. ആരോഗ്യകരമായ ഭക്ഷണം, ദിവസേനയുള്ള ശാരീരിക പ്രവർത്തനം, മതിയായ ഉറക്കം, നല്ല മാനസികാരോഗ്യം, കുടുംബത്തിന്റെ പിന്തുണ എന്നിവയാണ് പ്രധാനപ്പെട്ടത്.

അതുകൊണ്ട് കുട്ടി അൽപം തടിച്ചെന്ന് തോന്നിയാൽ ആദ്യം ചെയ്യേണ്ടത് ഡയറ്റ് തുടങ്ങുകയല്ല. വളർച്ചാ രീതിയും ഭക്ഷണശീലങ്ങളും ജീവിതശൈലിയും വിലയിരുത്താൻ ഡോക്ടറുടെ സഹായം തേടുകയാണ്.

കുട്ടിയെക്കുറിച്ച് പറയുമ്പോൾ ഓർക്കേണ്ടത് ഇതാണ് ലക്ഷ്യം വെറും തടി കുറയ്ക്കലല്ല. ഭക്ഷണത്തെയും ശരീരത്തെയും കുറിച്ച് അപമാനബോധമില്ലാതെ, ആരോഗ്യത്തോടെ വളരുന്ന ഒരു കുട്ടിയെയാണ് നമ്മൾ വളർത്തേണ്ടത്.