തടി കുറയ്ക്കാനും മസിലിനും ബെസ്റ്റ് ഏത്? മുട്ടയുടെ മഞ്ഞയോ അതോ വെള്ളയോ?

എല്ലാവർക്കും ഇഷ്ടമുള്ളതും പോഷകസമ്പ‍ന്നവുമായ ഭക്ഷണങ്ങളിലൊന്നാണ് മുട്ട. പ്രോട്ടീനും ധാതുക്കളും വിറ്റാമിനുകളും ഏതുമായിക്കോട്ടെ എല്ലാറ്റിനും മുമ്പനാണ് മുട്ട. എന്നാൽ മുട്ട കഴിക്കുന്ന കാര്യത്തിൽ ആളുകൾക്കിടയിൽ വ്യത്യസ്ത അഭിപ്രായങ്ങളുണ്ട്. ചിലർ മുട്ട മുഴുവനായി (മഞ്ഞക്കരുവും വെളുത്ത ഭാഗവും) കഴിക്കുമ്പോൾ, മറ്റ് ചിലർ മഞ്ഞക്കരു ഒഴിവാക്കി വെളുത്ത ഭാഗം മാത്രമാണ് കഴിക്കാൻ തെരഞ്ഞെടുക്കാറുള്ളത്. മുട്ട മുഴുവനായി കഴിക്കുന്നതും വെളുത്ത ഭാഗമോ, മഞ്ഞ ഭാ​ഗമോ മാത്രം കഴിക്കുന്നതും തമ്മിലുള്ള വ്യത്യാസം എന്തൊക്കെയാണെന്ന് നോക്കാം.

മഞ്ഞ ഭാഗം മാത്രം കഴിക്കുമ്പോൾ

വിറ്റാമിൻ ഡി, വിറ്റാമിൻ ബി, കോളിൻ തുടങ്ങിയ അവശ്യ വിറ്റാമിനുകളും ആരോഗ്യമുള്ള കൊഴുപ്പും പോഷകങ്ങളും അടങ്ങിയിരിക്കുന്നത് മുട്ടയുടെ മഞ്ഞക്കരുവിലാണ്.

വെളുത്ത ഭാഗം മാത്രം കഴിക്കുമ്പോൾ

വളരെ കുറഞ്ഞ പ്രോട്ടീൻ മാത്രമാണ് വെളുത്ത ഭാഗത്തിലുള്ളത്. വേഗത്തിൽ തടി കുറയ്ക്കാനാണ് ലക്ഷ്യമിടുന്നതെങ്കിൽ അഞ്ച് മുട്ടയുടെ വെളുത്ത ഭാഗം കഴിക്കുന്നതാണ് നല്ലത്. കുറഞ്ഞ കലോറിയിൽ കൂടുതൽ പ്രോട്ടീൻ ഇതിലൂടെ നിങ്ങൾക്ക് ലഭിക്കും.

രണ്ട് മുട്ട മുഴുവനായി കഴിക്കുന്നതാണോ അഞ്ച് മുട്ടയുടെ വെളുത്ത ഭാഗം കഴിക്കുന്നതാണോ മികച്ച ഫലം നൽകുക?

രണ്ട് മുഴുവൻ മുട്ടകളിൽ നിന്നും ഏകദേശം 140 കലോറിയും 12 ഗ്രാം ഉയർന്ന ഗുണനിലവാരമുള്ള പ്രോട്ടീനും ലഭിക്കും. അതേസമയം അഞ്ച് മുട്ടകളുടെ വെളുത്ത ഭാഗത്തുനിന്ന് ലഭിക്കുന്നത് 85 കലോറിയും 18 ഗ്രാം പ്രോട്ടീനുമാണ്.

മഞ്ഞയോ വെള്ളയോ, ഏതാണ് കൂടുതൽ ആരോഗ്യകരം?

മുട്ട മുഴുവനായി കഴിക്കുന്നതാണ് ആരോ​ഗ്യത്തിന് ഏറ്റവും നല്ലത്. മഞ്ഞക്കരു ഒഴിവാക്കുമ്പോൾ മുട്ടയിലുള്ള ആകെ പ്രോട്ടീന്റെ 43 ശതമാനവും 90 ശതമാനത്തോളം വിറ്റാമിനുകളും ധാതുക്കളുമാണ് നാം കളയുന്നത്. എന്നാൽ ഹൃദ്രോഗമുള്ളവർ, ഉയർന്ന കൊളസ്ട്രോൾ ഉള്ളവർ, കർശനമായ ഡയറ്റിലുള്ളവർ എന്നിവർ ഡോക്ടറുടെ നിർദ്ദേശപ്രകാരം തെരഞ്ഞെടുക്കണം.

(ശ്രദ്ധിക്കുക: ഈ ലേഖനം പൊതുവായ വിവരങ്ങൾ നൽകാൻ മാത്രമുള്ളതാണ്. ഫിറ്റ്നസുമായി ബന്ധപ്പെട്ട നിങ്ങളുടെ വ്യക്തിപരമായ സംശയങ്ങൾക്ക് എപ്പോഴും അംഗീകൃത ട്രെയിനറുടെയോ ഡോക്ടറുടെയോ ഉപദേശം തേടുക.)