നോയ്ഡ: ഓടുന്ന ഗുഡ്സ് ട്രെയിനിന് മുകളിൽ കയറി യോഗാദിന റീൽസ് ഷൂട്ട് ചെയ്ത യുവാക്കൾ അറസ്റ്റിൽ. യു.പിയിലെ ഗ്രേറ്റർ നോയിഡയിൽ അന്താരാഷ്ട്ര യോഗാ ദിനമായ ജൂൺ 21നായിരുന്നു സംഭവം.
ഗ്രേറ്റർ നോയിഡയിലെ ജാർച്ച സ്വദേശികളായ 19ഉം 22ഉം വയസ് പ്രായമുള്ള വിദ്യാർഥികളാണ് റെയിൽവേ സുരക്ഷാസേനയുടെ പിടിയിലായത്. ഇരുവരും ഓടുന്ന ഗുഡ്സ് ട്രെയിനിന് മുകളിൽ അർധനഗ്നരായി കയറി നിന്ന് രണ്ട് ബോഗികളിലായി കാലുകൾ വച്ച് സാഹസം കാണിക്കുകയും മറ്റൊരാൾ ഇത് ഷൂട്ട് ചെയ്യുകയുമായിരുന്നു.
ട്രെയിൻ ഒരു കനാലിന് മുകളിലൂടെ പോയപ്പോൾ ഇവരിൽ ഒരാൾ വെള്ളത്തിലേക്ക് ചാടുകയും ചെയ്തു. പാട്ടിന്റെ അകമ്പടിയോടെ സോഷ്യൽമീഡിയയിൽ റീൽസായി പോസ്റ്റ് ചെയ്ത ഈ വീഡിയോ വൈറലായതോടെ വ്യാഴാഴ്ച ഇരുവരേയും ആർപിഎഫ് പിടികൂടുകയായിരുന്നു.
'രണ്ട് യുവാക്കൾ ഗുഡ്സ് ട്രെയിനിന് മുകളിൽ കയറി നിന്ന് സാഹസം കാണിക്കുന്ന വീഡിയോ പൊലീസിന്റെ ശ്രദ്ധയിൽപ്പെട്ടു. ഇരുവരെയും റെയിൽവേ പ്രൊട്ടക്ഷൻ ഫോഴ്സ് അറസ്റ്റ് ചെയ്തു'- പൊലീസ് വക്താവ് പറഞ്ഞു.
പ്രതികൾ കോളജ് വിദ്യാർഥികളാണെന്ന് ജാർച്ച പൊലീസ് സ്റ്റേഷനിലെ ഉദ്യോഗസ്ഥൻ പറഞ്ഞു. 'സാമൂഹിക മാധ്യമങ്ങളിൽ ജനപ്രിയമാകാൻ ആഗ്രഹിച്ചാണ് അന്താരാഷ്ട്ര യോഗാദിനമായ ജൂൺ 21ന് തങ്ങൾ വീഡിയോ നിർമിച്ചതെന്നാണ് അവർ പൊലീസിനോട് പറഞ്ഞത്'- ഉദ്യോഗസ്ഥൻ കൂട്ടിച്ചേർത്തു.