'ഡോളറും രൂപയും മറന്നേക്കൂ അടുത്ത 10 വര്ഷത്തിനുള്ളിൽ ഈ 'നിശബ്ദ ശക്തി' ആയിരിക്കും ആ സ്ഥാനത്ത്' ; നിഖിൽ കാമത്ത്
ലോകത്ത് ഏറ്റവും കൂടുതൽ 3,680 ഡാറ്റാ സെന്ററുകൾ ഉള്ളത് യുഎസിലാണ്
Update: 2025-06-11 03:27 GMT
ബെംഗളൂരു: ഒരു ദശാബ്ദത്തിനുള്ളിൽ ഊർജവും ഇലക്ട്രോണുകളും പുതിയ ആഗോള കറൻസിയായി മാറിയേക്കാമെന്ന് ഓണ്ലൈന് സ്റ്റോക്ക് ബ്രോക്കിങ് പ്ലാറ്റ്ഫോമായ സെറോദ സഹസ്ഥാപകനും ശതകോടീശ്വരനുമായ നിഖിൽ കാമത്ത് പ്രവചിക്കുന്നു. ഡാറ്റാ സെന്ററുകളുടെയും എഐയുടെയും സ്ഫോടനാത്മകമായ വളര്ച്ചയാണ് ഈ മാറ്റത്തിന് കാരണം.
വരും വര്ഷങ്ങളിൽ സ്വര്ണം, പണം, വെള്ളി, ഭൂമി എന്നിവക്കായിരിക്കല്ല ഡിമാന്ഡെന്നും ഈ വസ്തുക്കളുടെ മൂല്യം കുറയുമെന്നും നിഖിൽ ചൂണ്ടിക്കാട്ടുന്നു. ഇത് വെറുമൊരു ചിന്തയല്ല, അതിവേഗം വളരുന്ന ഡാറ്റാ സെന്ററുകളുടെയും കൃത്രിമബുദ്ധിയുടെയും വൈദ്യുതി ഉപഭോഗത്തെ അടിസ്ഥാനമാക്കിയുള്ള ഗവേഷണം പറയുന്നതാണിത്.
ഡാറ്റാ സെന്ററുകളെക്കുറിച്ച് പറയുകയാണെങ്കിൽ, നെറ്റ്ഫ്ലിക്സ് കാണുന്നതോ ക്ലൗഡിൽ ഒരു ഫയൽ സംരക്ഷിക്കുന്നതോ ആകട്ടെ, നിങ്ങളുടെ എല്ലാ ഓൺലൈൻ പ്രവർത്തനങ്ങളും പ്രോസസ്സ് ചെയ്യുന്നത് ഇവയിലാണ്. എന്നാൽ ഓരോ പുതിയ ഡാറ്റാ സെന്ററും ഒരു വർഷം ഉപയോഗിക്കുന്ന വൈദ്യുതിയുടെ അളവ് 4 ലക്ഷം ഇലക്ട്രിക് വാഹനങ്ങൾ ഒരുമിച്ച് ഉപയോഗിക്കാത്തത്രയും വൈദ്യുതിയാണ്. അതുകൊണ്ടാണ് ഏതൊരു ഡാറ്റാ സെന്ററിന്റെയും മൊത്തം ചെലവിന്റെ 65 ശതമാനം വൈദ്യുതിക്ക് (കമ്പ്യൂട്ടിംഗ്, കൂളിംഗ്) വേണ്ടി മാത്രം ചെലവഴിക്കുന്നത്.
ലോകത്ത് ഏറ്റവും കൂടുതൽ 3,680 ഡാറ്റാ സെന്ററുകൾ ഉള്ളത് യുഎസിലാണ്. തൊട്ടുപിന്നിൽ ജർമ്മനി (424), യുകെ (418) എന്നിവയാണ്. 262 ഡാറ്റാ സെന്ററുകളുമായി ഇന്ത്യ ഈ പട്ടികയിൽ ഏഴാം സ്ഥാനത്താണ്. സെർവറുകളുടെ എണ്ണം കൂടുന്നതിനനുസരിച്ച് വൈദ്യുതി ആവശ്യകതയും വർധിക്കുന്നു. അതുകൊണ്ടാണ് 2030 ആകുമ്പോഴേക്കും ലോകത്തിലെ മൊത്തം വൈദ്യുതിയുടെ 10% ഡാറ്റാ സെന്ററുകൾ ഉപയോഗിക്കുമെന്ന് ഗവേഷണം പറയുന്നത്. ലോകത്തിലെ ഇന്റര്നെറ്റ് തിരയലുകളുടെ 5% മാത്രമേ എഐയുടെ സഹായത്തോടെ നടത്തുന്നുള്ളൂവെങ്കിൽ, അത് ഉപയോഗിക്കുന്ന വൈദ്യുതിയുടെ അളവ് ഒരു വർഷത്തേക്ക് 1 ദശലക്ഷം ഇന്ത്യൻ വീടുകളിൽ വെളിച്ചം നൽകാൻ പര്യാപ്തമാകുമെന്ന് ഗവേഷണം പറയുന്നു. 'ദയവായി', 'നന്ദി' തുടങ്ങിയ വാക്കുകൾക്ക് പോലും ദശലക്ഷക്കണക്കിന് ഡോളർ ചെലവാകുമെന്ന് ഓപ്പൺഎഐയിലെ സാം ആൾട്ട്മാൻ നേരത്തെ വ്യക്തമാക്കിയിരുന്നു.
എന്താണ് ഊര്ജ കറൻസി കൊണ്ട് അര്ഥമാക്കുന്നത്?
വൈദ്യുതി എല്ലാ ഡിജിറ്റൽ പ്രവർത്തനങ്ങളുടെയും നട്ടെല്ലായി മാറിയിട്ടുണ്ടെങ്കിൽ - പിന്നെ എന്തുകൊണ്ട് അതിന് കറൻസി പദവി നൽകിക്കൂടാ എന്നാണ് നിഖിൽ കാമത്ത് ചോദിക്കുന്നത്. ഇതിനർഥം ഊർജം ഒരു 'ആസ്തി' ആയി വ്യാപാരം ചെയ്യപ്പെടുമെന്നാണ്. ഇന്ന് വിദേശനാണ്യമോ ബിറ്റ്കോയിനുകളോ വ്യാപാരം ചെയ്യുന്നതുപോലെ, സൂപ്പർമാർക്കറ്റുകളോ ഡാറ്റാ സെന്ററുകളോ കിലോവാട്ട്-മണിക്കൂറിൽ വ്യാപാരം നടത്തുന്നതിനെക്കുറിച്ച് ചിന്തിക്കൂ. ഭാവിയിൽ, ബ്ലോക്ക്ചെയിൻ അടിസ്ഥാനമാക്കിയുള്ള 'ഊർജ ടോക്കണുകളും' വന്നേക്കാം, ഇത് ഒരു ഡിജിറ്റൽ കറൻസി പോലെ ഊർജ കൈമാറ്റം അനുവദിക്കും.
ഇത് സംഭവിച്ചാൽ, രാജ്യത്തിന്റെ സമ്പദ്വ്യവസ്ഥയിൽ അടിസ്ഥാനപരമായ മാറ്റം സംഭവിക്കും. പണപ്പെരുപ്പത്തിന്റെ മാനദണ്ഡങ്ങൾ, ബാങ്കിംഗ് സംവിധാനം, 'മൂല്യം' എന്നതിന്റെ നിർവചനം പോലും പുതുതായി മനസിലാക്കേണ്ടതുണ്ട്. ഭാവിയിൽ, സമ്പത്ത് അളക്കുന്നത് പണത്തെക്കൊണ്ട് മാത്രമല്ല, നിങ്ങളുടെ ഊർജ ക്രെഡിറ്റുകളെക്കൊണ്ടും ആയിരിക്കാം.