കൊക്കകോള മുതൽ നോക്കിയ വരെ; ബിസിനസ് ലോകത്ത് നൂറ്റാണ്ട് തികച്ച പ്രമുഖ ബ്രാൻഡുകൾ ഇവരാണ്

ഡൽഹി: ബിസിനസുകൾ വന്നും പോയും നിൽക്കുന്ന ഒരു ലോകത്ത് ചില ബ്രാൻഡുകൾ കാലത്തിന്റെ പരീക്ഷണത്തെ അതിജീവിച്ചിട്ടുണ്ട്. മാറിക്കൊണ്ടിരിക്കുന്ന വിപണികളുമായും വികസിച്ചുകൊണ്ടിരിക്കുന്ന ഉപഭോക്തൃ ആവശ്യങ്ങളുമായും പൊരുത്തപ്പെട്ടുകൊണ്ട് അവർ ചരിത്രത്തിന്റെ ഭാഗമായി മാറി. ഒരു നൂറ്റാണ്ട് കാലം പ്രസക്തവും വിജയകരവുമായി തുടരാൻ കഴിഞ്ഞ 7 പ്രശസ്ത ബ്രാൻഡുകൾ ഏതൊക്കെയാണെന്ന് നോക്കാം.

എഫ്എംസിജി, റിയൽ എസ്റ്റേറ്റ്, ടെക്സ്റ്റൈൽസ്, കെമിക്കൽസ്, ഫുഡ് പ്രോസസ്സിംഗ് തുടങ്ങി നിരവധി വൈവിധ്യമാർന്ന വ്യവസായങ്ങളിൽ സാന്നിധ്യമുള്ള ഇന്ത്യയിലെ ഏറ്റവും പഴയ കമ്പനികളിൽ ഒന്നാണ് വാഡിയ ഗ്രൂപ്പ്. വാഡിയ ഗ്രൂപ്പിലെ നാല് കമ്പനികൾ ഇന്ത്യൻ സ്റ്റോക്ക് എക്സ്ചേഞ്ചുകളിൽ ലിസ്റ്റ് ചെയ്തിട്ടുണ്ട്. അതിൽ ബ്രിട്ടാനിയ (102 വർഷം), ബോംബെ ബർമ (150 വർഷം), ബോംബെ ഡൈയിംഗ് (140 വർഷം), എൻ‌പി‌എൽ എന്നിവ ഉൾപ്പെടുന്നുവെന്ന് വാഡിയ ഗ്രൂപ്പിന്റെ ഔദ്യോഗിക വെബ്‌സൈറ്റിൽ പറയുന്നു.

1837-ൽ സ്ഥാപിതമായതുമുതൽ ടൈഡ്, പാമ്പേഴ്‌സ്, ഗില്ലറ്റ് തുടങ്ങിയ ഉൽപ്പന്നങ്ങൾ അവതരിപ്പിച്ചുകൊണ്ട് ആഗോള ഉപഭോക്തൃ ഉൽപ്പന്ന മേഖലയെ രൂപപ്പെടുത്തുന്നതിൽ പ്രോക്ടർ & ഗാംബിൾ (പി & ജി) നിർണായക പങ്ക് വഹിച്ചിട്ടുണ്ട്.

ആദിത്യ ബിർള ഗ്രൂപ്പിന് 1857 മുതൽ അതിന്റെ പൂർവികരെ കണ്ടെത്താൻ കഴിയും. രാജസ്ഥാനിലെ പിലാനി ഗ്രാമത്തിൽ സ്ഥാപിതമായ ഒരു പരുത്തി വ്യാപാര ബിസിനസിൽ നിന്നാണ് അവരുടെ ചരിത്രം ആരംഭിക്കുന്നത്. 1964ൽ പിലാനി ആദ്യത്തെ ബിർള ഇൻസ്റ്റിറ്റ്യൂട്ട് ഓഫ് ടെക്നോളജി ആൻഡ് സയൻസിന്റെ ആസ്ഥാനമായി മാറി. ആദിത്യ ബിർള ഗ്രൂപ്പിന്റെ വേരുകൾ 19-ാം നൂറ്റാണ്ടിൽ രാജസ്ഥാൻ മരുഭൂമിയിൽ സ്ഥിതി ചെയ്യുന്ന മനോഹരമായ പിലാനി പട്ടണത്തിലാണ്. സേത്ത് ശിവ് നാരായൺ ബിർള പരുത്തി വ്യാപാരം ആരംഭിച്ചതും അതുവഴി ബിർള ഹൗസിന് അടിത്തറ പാകിയതും ഇവിടെയാണ്. '1850 കളിലെ ഇന്ത്യയുടെ വെല്ലുവിളി നിറഞ്ഞ സമയങ്ങളിൽ ബിർള ബിസിനസ് അതിവേഗം വികസിച്ചു. 20-ാം നൂറ്റാണ്ടിന്റെ തുടക്കത്തിൽ ഗ്രൂപ്പിന്റെ സ്ഥാപക പിതാവ് ശ്രീ. ഘനശ്യാം ദാസ് ബിർള തുണിത്തരങ്ങൾ, ഫൈബർ, അലുമിനിയം, സിമൻറ്, കെമിക്കൽസ് തുടങ്ങിയ നിർണായക മേഖലകളിൽ വ്യവസായങ്ങൾ സ്ഥാപിച്ചു.' കമ്പനിയുടെ ഔദ്യോഗിക വെബ്‌സൈറ്റിൽ പറയുന്നു.

29 വയസ്സുള്ള ജംഷഡ്ജി നസ്സർവാൻജി ടാറ്റ 21,000 രൂപ മൂലധനത്തിൽ 1868ൽ ഒരു ട്രേഡിംഗ് കമ്പനി ആരംഭിക്കുന്നു. കാലത്തിന്റെ മറുപുറത്ത് അത് ഇന്ന് ലോകത്താകെ വ്യാപിച്ചു കിടക്കുന്ന ശൃങ്കലയുള്ള ഗ്രൂപ്പ് ടാറ്റ ഗ്രൂപ്പായി മാറിയിരിക്കുന്നു. 1865-ൽ ഫിൻലൻഡിൽ സ്ഥാപിതമായ നോക്കിയ പേപ്പർ, റബ്ബർ നിർമ്മാണത്തിൽ തുടങ്ങി ഒരു ടെലികോം ഭീമനായി മാറി. 1886-ൽ സ്ഥാപിതമായ കൊക്കകോള തലമുറകളിലുടനീളം ഉന്മേഷത്തിന്റെ പ്രതീകമായി ലോകത്തിലെ ഏറ്റവും അംഗീകൃതവും പ്രിയപ്പെട്ടതുമായ പാനീയ ബ്രാൻഡുകളിലൊന്നായി പരിണമിച്ചു.1881-ൽ സ്ഥാപിതമായതായെന്ന് പറയപ്പെടുന്ന തോമസ് കുക്ക്, ലോകത്തിലെ ആദ്യത്തെ പാക്കേജ് ടൂറുകളിൽ ചിലത് സംഘടിപ്പിച്ചുകൊണ്ട് ആധുനിക യാത്രയ്ക്ക് തുടക്കമിട്ടു. ആഗോള ടൂറിസം വ്യവസായത്തിന് അടിത്തറ പാകിയ ആ യാത്ര ഇന്നും തുടരുന്നു.