ന്യൂഡല്ഹി: കോവാക്സിന്റെ പാർശ്വ ഫലങ്ങളെ കുറിച്ചുള്ള ബനാറസ് ഹിന്ദു സർവകലാശാലയിലെ ഗവേഷകരുടെ പഠനം തള്ളി ഐ.സി.എം.ആർ. ഐ.സി.എം.ആർ ഒരു തരത്തിലും പഠനവുമായി സഹകരിച്ചിട്ടില്ലെന്നും പഠനം സംബന്ധിച്ച് അവ്യക്തതകൾ ഏറെ ഉണ്ടെന്നും ഐ.സി.എം.ആർ ഡയറക്ടർ ജനറൽ രാജീവ് ബാൽ വ്യക്തമാക്കി. ഐ.സി.എം.ആറിനെ പഠനത്തിൽ ഉദ്ധരിച്ചത് നീക്കം ചെയ്യണം എന്നാവശ്യപ്പെട്ട് ഗവേഷകർക്കും , ജേർണൽ എഡിറ്റർക്കും ഐ.സി.എം.ആർ കത്തയച്ചു.
കോവാക്സിന് എടുത്ത മൂന്നിലൊരാള്ക്ക് പാര്ശ്വഫലങ്ങളുണ്ടായിട്ടുണ്ടെന്നായിരുന്നു പഠന റിപ്പോര്ട്ട്. 2022 ജനുവരി മുതല് 2023 ഓഗസ്റ്റ് വരെയുള്ള കാലയളവില് ബനാറസ് ഹിന്ദു സര്വകലാശാലയിലെ ഗവേഷകരാണ് പഠനം നടത്തിയത്. ജര്മനി ആസ്ഥാനമായുള്ള സ്പ്രിംഗര് ഇങ്ക് എന്ന ജേര്ണലില് പഠന റിപോര്ട് പ്രസിദ്ധീകരിച്ചു.
291 മുതിര്ന്നവരിലും 635 കൗമാരക്കാരിലുമായി ആകെ 926 പേരിലായിരുന്നു പഠനം. ഒരുവര്ഷം കഴിഞ്ഞശേഷം 926 പേരില് 50 ശതമാനത്തോളം പേര്ക്ക് അണുബാധയുണ്ടായതായി സ്ഥിരീകരിച്ചു. മുതിര്ന്നവരില് നാലുപേര് മരിച്ചു. ഈ നാലുപേരും പ്രമേഹബാധിതരായിരുന്നു. മൂന്നുപേര്ക്കു ഹൈപര് ടെന്ഷനും ഉണ്ടായിരുന്നെന്ന് റിപ്പോര്ട്ടില് വ്യക്തമാക്കിയിരുന്നു.