ജയ്പൂർ: രാജസ്ഥാനിലെ ജയ്പൂരിൽ വിപുലമായ കയ്യേറ്റം ഒഴിപ്പിക്കൽ നടപടികൾ ആരംഭിക്കുന്നതിന്റെ പശ്ചാത്തലത്തിൽ നഗരത്തിൽ ഇന്റർനെറ്റ് സേവനങ്ങൾക്ക് താൽക്കാലിക വിലക്ക് ഏർപ്പെടുത്തി. മുൻകരുതൽ നടപടിയെന്ന നിലയിൽ നഗരത്തിലെ വിവിധ മേഖലകളിൽ ജില്ലാ ഭരണകൂടം നിരോധനാജ്ഞയും പ്രഖ്യാപിച്ചിട്ടുണ്ട്.
ജയ്പൂർ ഡെവലപ്മെൻ്റ് അതോറിറ്റിയുടെ നേതൃത്വത്തിലാണ് ഇന്ന് നഗരത്തിൽ വൻ കയ്യേറ്റം ഒഴിപ്പിക്കൽ നടപ്പിലാക്കുന്നത്. ഇതിന് മുന്നോടിയായാണ് ക്രമസമാധാന നില ഉറപ്പാക്കാൻ ജില്ലാ ഭരണകൂടം കർശന നടപടികൾ സ്വീകരിച്ചത്. ചൊവ്വാഴ്ച അർധരാത്രി വരെയാണ് ഇന്റർനെറ്റ് സേവനങ്ങൾക്കുള്ള നിരോധനം പ്രാബല്യത്തിലുണ്ടാവുക.
ഒഴിപ്പിക്കൽ നടപടികൾക്കിടെ വൻ സംഘർഷ സാധ്യതകൾ നിലനിൽക്കുന്നതിനാൽ നഗരത്തിൽ കനത്ത പൊലീസ് സുരക്ഷയാണ് ഏർപ്പെടുത്തിയിരിക്കുന്നത്. തന്ത്രപ്രധാനമായ പ്രദേശങ്ങളിലെല്ലാം പോലീസിനെയും സുരക്ഷാ സേനയെയും വിന്യസിച്ചിട്ടുണ്ട്. സാമൂഹിക മാധ്യമങ്ങളിലൂടെ വ്യാജവാർത്തകളും അഭ്യൂഹങ്ങളും പ്രചരിച്ച് സംഘർഷം ഉണ്ടാകുന്നത് തടയാനാണ് ഇന്റർനെറ്റിന് താൽക്കാലിക വിലക്ക് ഏർപ്പെടുത്തിയത്.
സാമുദായിക ഐക്യവും സമാധാന അന്തരീക്ഷവും കാത്തുസൂക്ഷിക്കുക എന്നതാണ് സർക്കാരിന്റെ പ്രാഥമിക ലക്ഷ്യമെന്ന് അധികൃതർ വ്യക്തമാക്കി. പ്രദേശത്ത് ജനങ്ങൾ കൂട്ടം കൂടുന്നതിനും പ്രതിഷേധങ്ങൾ സംഘടിപ്പിക്കുന്നതിനും കർശന വിലക്കുണ്ട്. ഒഴിപ്പിക്കൽ നടപടികൾ സമാധാനപരമായി പൂർത്തിയാക്കുന്നതിനാണ് ജില്ലാ ഭരണകൂടം മുൻഗണന നൽകുന്നത്. ക്രമസമാധാന പ്രശ്നങ്ങൾ ഉണ്ടാക്കുന്നവർക്കെതിരെ കർശന നടപടി സ്വീകരിക്കുമെന്നും, പൊതുജനങ്ങൾ ഭരണകൂടവുമായി സഹകരിക്കണമെന്നും അധികൃതർ അഭ്യർത്ഥിച്ചിട്ടുണ്ട്.