കേരളത്തിൽ നേട്ടമുണ്ടാക്കി ജിയോ; പുതിയ കണക്കുകൾ നൽകുന്ന സൂചനയെന്ത് ?

കൊച്ചി: ടെലകോം റെഗുലേറ്ററി അതോറിറ്റി ഓഫ് ഇന്ത്യയുടെ കണക്ക് പ്രകാരം കേരളത്തിൽ നേട്ടമുണ്ടാക്കി റിലയൻസ് ജിയോ. ട്രായുടെ കണക്കുകൾ പ്രകാരം കേരളത്തിൽ പുതിയ 66000 പുതിയ ഉപഭോക്താക്കളെ ജിയോക്ക് ലഭിച്ചിട്ടുണ്ട്. പുതിയ ഉപഭോക്താക്കൾ കൂടി എത്തിയതോടെ കേരളത്തിലെ മൊത്തം ഉപഭോക്താക്കളുടെ എണ്ണം 1.1 കോടിയായി ഉയർന്നു.

വയർലൈൻ വിഭാഗത്തിലും ജിയോ നേട്ടമുണ്ടാക്കിയിട്ടുണ്ട്. പുതിയ 14,841 വയർലൈൻ ഉപഭോക്താക്കളെ ജിയോക്ക് ലഭിച്ചു. അതോടെ കേരളത്തിലെ മൊത്തം വയർലൈൻ വരിക്കാരുടെ എണ്ണം 5.41 ലക്ഷമായി. ദേശിയ തലത്തിലും ജിയോക്ക് നേട്ടമുണ്ടാക്കാനായിട്ടുണ്ട്. ദേശിയ തലത്തിൽ 32.49 ലക്ഷം പുതിയ വയർലെസ് ഉപഭോക്താക്കളേയും 2.12 വയർലൈൻ ഉപഭോക്താക്കളേയും നേടാൻ ജിയോക്ക് സാധിച്ചിട്ടുണ്ട്. 2025 സെപ്റ്റംബറിലെ കണക്ക് പ്രകാരം പുതിയ വരിക്കാരുടെ എണ്ണത്തിൽ എയർടെല്ലിനെ ബിഎസ്എൻഎൽ മറികടന്നിട്ടുണ്ട്.

5.24 ലക്ഷം പുതിയ ഉപഭോക്താക്കളെയാണ് ദേശിയ തലത്തിൽ ബിഎസ്എൻഎല്ലിന് ലഭിച്ചത്. ഭാരതി എയർടെല്ലിന് ലഭിച്ചത് 4.37 ലക്ഷം ഉപഭോക്താക്കളെയാണ്. വോഡാഫോൺ-ഐഡിയ തുടർച്ചയായി മൊബൈൽ ഉപഭോക്താക്കളെ നഷ്ടപ്പെടുത്തി എന്നും കണക്കുകൾ പറയുന്നു. പുതിയ ഉപഭോക്താക്കളുടെ വരവോടെ റിലയൻസ് ജിയോയുടെ മൊത്തം സബ്‌സ്‌ക്രൈബർ എണ്ണം ആദ്യമായി 50 കോടി കടന്നു. ഇപ്പോഴത്തെ മൊത്തം ഉപഭോക്തൃസംഖ്യ 50.64 കോടിയാണ്.