ന്യൂഡല്ഹി: കോവിഷീൽഡിനെതിരേ സുപ്രിംകോടതിയിൽ ഹരജി. കോവിഡ് പ്രതിരോധ വാക്സിന്റെ പാർശ്വഫലം പരിശോധിക്കാൻ വിദഗ്ധ സമിതിയെ നിയോഗിക്കണമെന്നാണ് ഹരജിയിലെ ആവശ്യം. സുപ്രിംകോടതി അഭിഭാഷകനായ വിശാൽ തിവാരിയാണ് ഹരജി സമർപ്പിച്ചത്.കോവിഷീൽഡ് സ്വീകരിച്ചവരിൽ ഗുരുതര പാർശ്വഫലങ്ങൾ ഉണ്ടാകുമെന്ന് കമ്പനി കഴിഞ്ഞദിവസം സ്ഥിരീകരിച്ചിരുന്നു.
കോവിഡ് പ്രതിരോധ വാക്സിനായ കോവിഷീല്ഡിന് ഗുരുതര പാര്ശ്വഫലങ്ങളുണ്ടെന്ന് നിര്മാതാക്കളായ അസ്ട്രസെനക കമ്പനിയാണ് സ്ഥിരീകരിച്ചത്. അപൂർവ സന്ദർഭങ്ങളിൽ രക്തം കട്ടപിടിക്കുന്നതിനും പ്ലേറ്റ്ലെറ്റ് എണ്ണം കുറയുന്നതിനും കാരണമാകുന്ന അവസ്ഥയ്ക്ക് കോവിഷീൽഡ് കാരണമാകുമെന്ന് കമ്പനി വ്യക്തമാക്കിയതായി ദി ടെലിഗ്രാഫ് റിപ്പോര്ട്ട് ചെയ്യുന്നു.
മഹാമാരി സമയത്ത് ബ്രിട്ടീഷ് ഫാര്മസ്യൂട്ടിക്കല് കമ്പനിയായ അസ്ട്രസെനകയും ഓക്സ്ഫോര്ഡ് യൂണിവേഴ്സിറ്റിയും ചേര്ന്ന് വികസിപ്പിച്ചെടുത്തതാണ് കോവിഷീല്ഡ്. വാക്സിന് മരണത്തിനും ഗുരുതര പാര്ശ്വഫലങ്ങള്ക്കും കാരണമായെന്ന് കാണിച്ച് യുകെയില് നിരവധി പേര് കോടതിയെ സമീപിച്ചിരുന്നു. യുകെ ഹൈക്കോടതിയിൽ ഫയല് ചെയ്ത 51 കേസുകളിലെ ഇരകൾ 100 ദശലക്ഷം പൗണ്ട് വരെ നഷ്ടപരിഹാരം ആവശ്യപ്പെടുന്നുണ്ട്. യുകെ സർക്കാർ ഇതുവരെ വിഷയത്തിൽ ഇടപെടാൻ തയ്യാറായിട്ടില്ല.