കൊച്ചി: നടിയെ ആക്രമിച്ച കേസിലെ നാലാം പ്രതി വിജീഷിന് ജാമ്യം. ഹൈക്കോടതിയാണ് ജാമ്യം അനുവദിച്ചത്. സംഭവം നടക്കുമ്പോള് പള്സര് സുനിക്കൊപ്പം വാഹനത്തിലുണ്ടായിരുന്നയാളാണ് വിജീഷ്. കേസില് പള്സര് സുനിയൊഴികെ മറ്റെല്ലാ പ്രതികള്ക്കും ജാമ്യം ലഭിച്ചു.
വിചാരണ അനന്തമായി നീണ്ടുപോകുന്ന സാഹചര്യത്തിൽ ജാമ്യം അനുവദിക്കണമെന്നായിരുന്നു ആവശ്യം. ജാമ്യം നൽകാതെ ജയിലിൽ പാർപ്പിക്കുന്നത് മനുഷ്യാവകാശ ലംഘനമാണെന്നാണ് ഹരജിയില് വിജീഷ് ചൂണ്ടിക്കാട്ടിയത്.
അതേസമയം അന്വേഷണ ഉദ്യോഗസ്ഥൻ ബൈജു പൗലോസ് ഭീഷണിപ്പെടുത്തിയെന്ന് കാണിച്ച് നടിയെ ആക്രമിച്ച കേസിലെ സാക്ഷി നല്കിയ ഹരജിയിൽ ഹൈക്കോടതി ഇന്ന് വിധി പറയും. ആലപ്പുഴ സ്വദേശി സാഗർ വിൻസെന്റ് നല്കിയ ഹരജിയിലാണ് കോടതി വിധി പറയുക. മൊഴി മാറ്റാൻ ക്രൈംബ്രാഞ്ച് സമ്മർദ്ദം ചെലുത്തുന്നുവെന്ന ആരോപണം അടിസ്ഥാനരഹിതമാണെന്ന് അഡീഷണൽ പബ്ലിക് പ്രോസിക്യൂട്ടർ കോടതിയില് വിശദീകരണം നല്കിയിട്ടുണ്ട്.