തിരുവനന്തപുരം: എഡിജിപി എം.ആര്‍ അജിത്കുമാറിന്റെ സസ്‌പെന്‍ഷന്‍ കാലാവധി നീട്ടി. നാല് മാസത്തേക്കാണ് നീട്ടിയത്. സസ്‌പെന്‍ഷനെതിരെ അജിത്കുമാര്‍ ഹൈക്കോടതിയില്‍ നല്‍കിയ ഹരജി പരിഗണിക്കുന്നതിനിടെയാണ് നടപടി. വകുപ്പുതല അന്വേഷണം പൂര്‍ത്തിയാകാത്തതും കോടതിയുടെ അന്തിമതീരുമാനം വരാത്തതുമാണ് സസ്‌പെന്‍ഷന്‍ നീട്ടാന്‍ കാരണം.
2023-ല്‍ മുന്‍ മുഖ്യമന്ത്രിയുടെ നവകേരള സദസ്സിനിടെ ആലപ്പുഴയില്‍ കെഎസ്‌യു പ്രവര്‍ത്തകരെ ഗണ്മാന്മാര് മര്‍ദിച്ചെന്ന കേസ് അട്ടിമറിക്കാന്‍ ശ്രമിച്ചുവെന്ന് ആരോപിച്ചാണ് അജിത്കുമാറിനെ സസ്‌പെന്‍ഡ് ചെയ്തിരുന്നത്. കേസ് ഡയറി തിരുത്താനും റഫര്‍ റിപ്പോര്‍ട്ട് തയ്യാറാക്കാനും ഉദ്യോഗസ്ഥര്‍ക്ക് മേല്‍ അജിത്കുമാര്‍ ഇടപെടല്‍ നടത്തിയെന്ന അന്വേഷണറിപ്പോര്‍ട്ടിന്റെ അടിസ്ഥാനത്തിലാണ് ആഭ്യന്തരവകുപ്പ് നടപടിയെടുത്തത്. സംഭവദിവസം താന്‍ വയനാട് ചൂരല്‍മലയിലെ രക്ഷാപ്രവര്‍ത്തനങ്ങളുടെ ഭാഗമായിരുന്നെന്ന അദ്ദേഹത്തിന്റെ വിശദീകരണം തള്ളിക്കൊണ്ടാണ് നടപടി.
ഡിജിപിയുടെ അന്വേഷണ റിപ്പോര്‍ട്ടും ആഭ്യന്തര സെക്രട്ടറിയുടെ ശിപാര്‍ശയും പരിശോധിച്ച ശേഷം മുഖ്യമന്ത്രിയും ആഭ്യന്തരവകുപ്പും കര്‍ശനമായ നടപടി സ്വീകരിക്കാന്‍ തീരുമാനിക്കുകയായിരുന്നു. കഴിഞ്ഞ മാസം ഫയര്‍ഫോഴ്‌സ് മേധാവി വിരമിക്കുന്ന ഒഴിവിലേക്ക് ഡിജിപി പദവിയിലേക്ക് പരിഗണിക്കപ്പെടേണ്ടിയിരുന്ന സീനിയര്‍ ഉദ്യോഗസ്ഥനാണ് അജിത്കുമാര്‍. ഇതിനിടെയാണ് കനത്ത തിരിച്ചടിയായി സസ്‌പെന്‍ഷന്‍ നടപടി തേടിയെത്തിയിരുന്നത്.
നവകേരള യാത്രയ്ക്കിടെ പ്രതിഷേധിച്ച യൂത്ത് കോണ്‍ഗ്രസ് പ്രവര്‍ത്തകരെ ഗണ്മാന്മാര് ഉള്‍പ്പെടെയുള്ള സുരക്ഷാ ഉദ്യോഗസ്ഥര്‍ ക്രൂരമായി മര്‍ദിച്ച സംഭവത്തെ അന്നത്തെ മുഖ്യമന്ത്രി പിണറായി വിജയന്‍ 'രക്ഷാപ്രവര്‍ത്തനം' എന്ന് വിശേഷിപ്പിച്ചത് വിവാദമായിരുന്നു. യുഡിഎഫ് അധികാരത്തില്‍ വന്നതിന് പിന്നാലെ കേസ് അട്ടിമറിച്ചത് അന്വേഷിക്കാന്‍ പ്രത്യേക സംഘത്തെ നിയോഗിക്കുകയായിരുന്നു. തുടര്‍ന്നാണ് കേസ് അട്ടിമറിക്കാന്‍ എഡിജിപിയുടെ നേതൃത്വത്തില്‍ ശ്രമം നടന്നതായി കണ്ടെത്തിയത്.