കൊച്ചി: നഗരമധ്യത്തിൽ ഭീതി പടർത്തി കൂറ്റൻ പെരുമ്പാമ്പിനെ കണ്ടെത്തി. മഹാരാജാസ് കോളജിന് സമീപത്തെ പോസ്റ്റ് മെട്രിക് ഹോസ്റ്റൽ കോംപൗണ്ടിലെ മരത്തിൽ അള്ളിപ്പിടിച്ചിരിക്കുന്ന നിലയിലാണ് പാമ്പിനെ കണ്ടത്. വിവരമറിഞ്ഞ് വനം വകുപ്പും ഫയർഫോഴ്സും സ്ഥലത്തെത്തി. പാമ്പിനെ താഴെയിറക്കുന്നത് ശ്രമകരമായ ദൗത്യമാണെന്നും താഴെയിറങ്ങുന്നത് വരെ കാത്തിരിക്കേണ്ടി വരുമെന്നും ബീറ്റ് ഫോറസ്റ്റ് ഓഫീസർ ഇ.കെ ബിജു അറിയിച്ചു. സ്ഥലത്ത് വനംവകുപ്പ് നിരീക്ഷണം ഏർപ്പെടുത്തി.
രാവിലെ ഒമ്പതോടെയാണ് മരത്തിന് മുകളിൽ വിശ്രമിക്കുകയായിരുന്ന പെരുമ്പാമ്പിനെ വഴിയാത്രികർ കണ്ടെത്തുന്നത്. നിരവധി വ്യാപാരസ്ഥാപനങ്ങൾ സ്ഥിതി ചെയ്യുകയും വാഹനങ്ങളിലും കാൽനടയായും ധാരാളമാളുകൾ കടന്നുപോകുകയും ചെയ്യുന്ന നഗരമധ്യത്തിലായതിനാൽ കൂറ്റൻ പെരുമ്പാമ്പിനെ കണ്ടതോടെ ആശങ്കയിലാണ് ജനം. ജനവാസ മേഖലയും കോളജ് പരിസരവുമായതിനാൽ ഏതെങ്കിലും തരത്തിൽ പാമ്പ് താഴേക്ക് ചാടിയാൽ അപകട സാഹചര്യം മറികടക്കാൻ ജനങ്ങളും കാണികളും ജാഗ്രത കാണിക്കണമെന്ന് ഉദ്യോഗസ്ഥർ അറിയിച്ചു.