കിടപ്പുരോഗിയായ അച്ഛനെ മകനും കുടുംബവും വാടകവീട്ടിൽ ഉപേക്ഷിച്ചു; കേസെടുക്കുമെന്ന് പൊലീസ്

കൊച്ചി: തൃപ്പൂണിത്തുറയിൽ കിടപ്പുരോഗിയായ അച്ഛനെ മകനും കുടുംബവും വാടകവീട്ടിൽ ഉപേക്ഷിച്ചു. എഴുപത് വയസുകാരൻ ഷൺമുഖനെയാണ് വാടകവീട്ടിൽ ഉപേക്ഷിച്ചത്. പൊലീസും പാലിയേറ്റീവ് പ്രവർത്തകരും ചേർന്ന് ഷൺമുഖനെ ആശുപത്രിയിലേക്ക് മാറ്റി.. കേസെടുക്കുമെന്ന് പൊലീസ് അറിയിച്ചു.

ഏറെക്കാലമായി വാടക സംബന്ധിച്ച പ്രശ്നം നിലനിൽക്കുന്നതിനിടയിലാണ് കഴിഞ്ഞ ദിവസം അജിത് വീട്ടിൽ നിന്ന് പോയത്. കിടപ്പുരോഗിയായ അച്ഛൻ ഷൻമുഖനെ ഉപേക്ഷിച്ച് വീട് പൂട്ടിയാണ് അജിത്തും കുടുംബവും കടന്നുകളഞ്ഞത്. അയൽവാസികൾ വിവരമറിച്ചതിന്റെ അടിസ്ഥാനത്തിൽ നടത്തിയ പരിശോധനയിൽ ഷൺമുഖനെ അവശനിലയിൽ വീട്ടിനുള്ളിൽ കണ്ടെത്തി. തൃപ്പൂണിത്തറ പൊലീസിന്‍റെ സഹായത്തോടെ വീട് തുറന്നാണ് ഷൻമുഖന് വെള്ളവും ഭക്ഷണവും നൽകിയത്.

മകൻ അജിത്തിനെ പൊലീസ് ബന്ധപ്പെട്ടെങ്കിലും സ്ഥലത്തില്ല എന്ന മറുപടിയാണ് ലഭിച്ചത്. അച്ഛൻ്റെ സംരക്ഷണവുമായി ബന്ധപ്പെട്ട കാര്യങ്ങൾ സംസാരിച്ചതുമില്ല. സംഭവത്തിൽ തൃപ്പൂണിത്തുറ നഗരസഭാ അധികൃതരുടെ പരാതിയിൽ കേസെടുക്കുമെന്ന് പൊലീസ് അറിയിച്ചു. പാലിയേറ്റീവ് പ്രവർത്തകരുടെ സഹായത്തോടെ ഷൺമുഖനെ ആശുപത്രിയിൽ പ്രവേശിപ്പിച്ചു.