കണ്ണൂർ: കണ്ണൂരിലെ സിപിഎം നേതാക്കളുടെ ഫേസ്ബുക്ക് പോസ്റ്റിന് താഴെ വ്യാപക വിമർശനം. ജില്ലാ സെക്രട്ടറി കെ.കെ രാഗേഷിന്റെയും ടി.ഐ മധുസൂദനന്റെയും സി.വി ധനരാജ് അനുസ്മരണ ദിനത്തിലെ പോസ്റ്റിലാണ് കമന്റ് പ്രവാഹം. ധനരാജ് രക്തസാക്ഷി ഫണ്ട് തിരിമറി ആരോപണം ഉയർത്തിയാണ് വിമർശനം. കമന്റുകൾ പ്രവഹിച്ചതോടെ ടി.ഐ മധുസൂദനൻ കമന്റ് ബോക്സ് ഫ്രൻഡ്സ് ഓൺലി ആക്കുകയും കമന്റുകൾ ഡിലീറ്റ് ആക്കുകയും ചെയ്തു.
സി.വി ധനരാജിന്റെ പത്താം അനുസ്മരണ ദിനമാണ് ഇന്ന്. അതിന്റെ ഭാഗമായാണ് രാഗേഷും മധുസൂദനനും അനുസ്മരണ പോസ്റ്റിട്ടത്. ഇതിന് താഴെയാണ് ഫണ്ട് തട്ടിപ്പ് ചൂണ്ടിക്കാട്ടി രൂക്ഷവിമർശനം ഉയർന്നത്. ധനരാജ് രക്തസാക്ഷി ഫണ്ട് സിപിഎം നേതാക്കൾ തട്ടിപ്പ് നടത്തിയെന്ന് ആരോപിച്ച് പാർട്ടി വിട്ട വി.കുഞ്ഞികൃഷ്ണൻ പയ്യന്നൂരിൽ മത്സരിച്ച് എംഎൽഎ ആയിരുന്നു. മധുസൂദനനെ കെ.കെ രാഗേഷ് സംരക്ഷിക്കുകയാണ് എന്നും ആരോപണമുണ്ട്.