നവരാത്രി ആഘോഷം; സംസ്ഥാനത്ത് നാളെ പൊതു അവധി

തിരുവനന്തപുരം: നവരാത്രി ആഘോഷങ്ങളുടെയും പൂജവെപ്പിന്റേയും ഭാഗമായി സംസ്ഥാനത്ത് നാളെ പൊതു അവധി പ്രഖ്യാപിച്ചു. നെഗോഷ്യബിൾ ഇൻസ്ട്രുമെന്റ് ആക്ട് പ്രകാരമാണ് അവധി. അതിനാൽ ബാങ്കുകൾക്കും അവധിയായിരിക്കും. നേരത്തെ വിദ്യാഭ്യാസ സ്ഥാപനങ്ങൾക്ക് പൊതുവിദ്യാഭ്യാസ വകുപ്പ് അവധി പ്രഖ്യാപിച്ചിരുന്നു.

നാളെ പൊതു അവധി പ്രഖ്യാപിച്ചതിനാൽ പിഎസ്‌സി പരീക്ഷകളും മാറ്റിവച്ചിട്ടുണ്ട്. വെള്ളിയാഴ്ച നടത്താൻ നിശ്ചയിച്ച പരീക്ഷകൾ, അഭിമുഖങ്ങൾ, കായികക്ഷമതാ പരീക്ഷകൾ, സർവീസ് വെരിഫിക്കേഷൻ, പ്രമാണ പരിശോധന എന്നിവ മാറ്റിവച്ചതായി പിഎസ്‌സി അറിയിച്ചു.

പുതുക്കിയ തിയതി പിന്നീട് അറിയിക്കും. എന്നാൽ നാളെത്തെ നിയമസഭാ സമ്മേളനത്തിന് മാറ്റമുണ്ടാവില്ലെന്ന് സ്പീക്കറുടെ ഓഫീസ് അറിയിച്ചു.