ആലപ്പുഴ: ഹമാസിനെക്കാൾ വലിയ കുറ്റവാളി ഇസ്രായേലെന്ന് സി.പി.എം നേതാവ് ജി.സുധാകരൻ. ഒരു പത്രവും മുഖപ്രസംഗമെഴുതിയില്ല. പതിനായിരക്കണക്കിന് മുസ്ലിംകളെ കൊന്നിട്ട് ആരും അനങ്ങുന്നില്ല. യു.എൻ അടക്കമുള്ള സംവിധാനങ്ങൾ എന്തിനാണ് ഉണ്ടാക്കിവെച്ചതെന്നും അദ്ദേഹം ചോദിച്ചു.
അമേരിക്കയാണ് എല്ലാ പ്രശ്നങ്ങൾക്കും കാരണം. ജോ ബൈഡൻ അവിടെപ്പോയത് ഇസ്രായേലിന് പിന്തുണ നൽകാനാണ്. ജോർദാൻ അടക്കമുള്ള അറബ് രാജ്യങ്ങളുമായി ചർച്ച നടത്തുമെന്നാണ് ബൈഡൻ പറഞ്ഞത്. അവരെന്തെങ്കിലും പ്രശ്നമുണ്ടാക്കിയോ? പിന്നെ എന്തിനാണ് അവരുമായി സംസാരിക്കുന്നത്? പതിനായിരക്കണക്കിന് സൈനികരെയാണ് യു.എസ് ഇസ്രായേലിലേക്ക് അയച്ചത്. അത് എന്തിനാണെന്നും സുധാകരൻ ചോദിച്ചു.
നീണ്ടകാലത്തെ ചരിത്രം നോക്കാതെ ഫലസ്തീൻ പ്രശ്നത്തിൽ നിലപാട് സ്വീകരിക്കരുത്. ഒരു വള്ളം പോലുമില്ലാത്ത ഫലസ്തീനികളെ നേരിടാനാണ് യു.എസ് പടക്കപ്പൽ അയച്ചത്. ജൂതൻമാരിലെ തീവ്രവാദികളാണ് ഇസ്രായേലിൽ പ്രശ്നം സൃഷ്ടിക്കുന്നതെന്നും സുധാകരൻ പറഞ്ഞു.