കുന്ദമംഗലത്തെ താലൂക്കായി ഉയർത്തണം: റസാഖ് പാലേരി

കുന്ദമംഗലം: കേരളത്തിലെ ഏക സബ് താലൂക്ക് ആയ കുന്ദമംഗലത്തെ താലൂക്ക് ആയി ഉയർത്തണമെന്ന് വെൽഫെയർ പാർട്ടി സംസ്ഥാന പ്രസിഡണ്ട് റസാഖ് പാലേരി ആവശ്യപ്പെട്ടു. കേരള സംസ്ഥാന രൂപീകരണ സമയത്ത് 1961 സെൻസസ് രേഖകളുടെ അടിസ്ഥാനത്തിൽ 55 താലൂക്കുകൾ ഉണ്ടായിരുന്നു. ഇപ്പോൾ 78 താലൂക്കുകൾ ആയി. എല്ലാ സബ് താലൂക്കുകളും താലൂക്കുകളായി ഉയർത്തിയിട്ടും കുന്ദമംഗലം മാത്രം സബ് താലൂക്ക് ആയി നിലനിൽക്കുന്നു.

വെൽഫെയർ പാർട്ടി സാഹോദര്യ കേരള പദയാത്രക്ക് കുന്ദമംഗലം മണ്ഡലത്തിൽ നൽകിയ സ്വീകരണ സമ്മേളനത്തിൽ സംസാരിക്കുകയായിരുന്നു അദ്ദേഹം. മണ്ഡലം പ്രസിഡൻറ് ഉമർ ഇ പി അധ്യക്ഷത വഹിച്ചു.

‘നാടിന്റെ നന്മക്ക് നമ്മളൊന്നാകണം’ എന്ന തലക്കെട്ടിൽ തിരുവനന്തപുരത്ത് നിന്നും പ്രയാണമാരംഭിച്ച പദയാത്ര 31 ന് കോഴിക്കോട് സമാപിക്കും. പൊതു സമ്മേളനം വെൽഫെയർപാർട്ടി സംസ്ഥാന സംസ്ഥാന സെക്രട്ടറി ജ്യോതിവാസ് പറവൂർ ഉദ്ഘാടനം ചെയ്തു. ബാസിത് താനൂർ മുഖ്യപ്രഭാഷണം നടത്തി. ജില്ലാ ട്രഷറർ കെ സി അൻവർ, ജില്ലാ സെക്രട്ടറിമാരായ ശശീന്ദ്രൻ ബപ്പൻകാട്, ജുമൈല എൻ.കെ, ഇ പി അൻവർ സാദത്ത്, എംപി അബൂബക്കർ മാസ്റ്റർ എന്നിവർ സംസാരിച്ചു. മാപ്പിളപ്പാട്ട് രചയ്താവ് ബാപ്പു വെള്ളിപറമ്പ്, ജീവകാരുണ്യ പ്രവർത്തകൻ ഷമീർ കുന്ദമംഗലം, സാന്ത്വന പരിചരണ രംഗത്ത് 31 വർഷം സർവീസ് നടത്തിയ മീനാകുമാരി എന്നിവരെ ആദരിച്ചു. പുതുതായി പാർട്ടിയിലേക്ക് കടന്നുവന്ന വ്യക്തികൾക്ക് മെമ്പർഷിപ്പ് നൽകി.