കോഴിക്കോട്: കോഴിക്കോട് കൊടിയത്തൂരിൽ ബസിന് മുന്നിലേക്ക് ഓടിയ കുട്ടി അത്ഭുതകരമായി രക്ഷപ്പെട്ടു. ബസ് ഡ്രൈവറുടെ സമയോചിതമായ ഇടപെടലിനെ തുടർന്നാണ് വലിയ അപകടം ഒഴിവായത്.
കുട്ടി റോഡ് മുറിച്ചുകടക്കുന്നതാണ് വീഡിയോയിലുള്ളത്. ഈ സമയത്ത് ബസ് പിറകിൽ നിന്നും വരുന്നുണ്ട്. റോഡിന്റെ സമീപത്തായി ഒരു ഓട്ടോറിക്ഷയും രണ്ട് ടൂവീലറുകളും പാര്ക്ക് ചെയ്തിട്ടുണ്ട്. കുട്ടി ഓടി വരുന്നത് കണ്ട് ഡ്രൈവര് പെട്ടെന്ന് ബസ് നിര്ത്തിയതുകൊണ്ട് മാത്രമാണ് കുഞ്ഞ് രക്ഷപ്പെട്ടത്.
കുഞ്ഞ് ബസിന് അടുത്ത് എത്തിയപ്പോഴാണ് കണ്ടതെന്ന് ഡ്രൈവര് ഷനോജ് പറഞ്ഞു. പെട്ടെന്ന് വെട്ടിച്ചത് കാരണം രക്ഷപ്പെട്ടു. കുട്ടി ബസിന് അടിയിലേക്ക് വീണു എന്നാണ് കരുതിയതെന്നും ഡ്രൈവര് വിശദീകരിച്ചു. സംഭവ ശേഷം ബസ് നിർത്തി മറ്റൊരു ഡ്രൈവറെ ഏൽപ്പിച്ചുവെന്നും രണ്ട് ദിവസം ബസ് ഓടിക്കാൻ പറ്റിയില്ലെന്നും രക്ഷിതാക്കൾക്ക് ഒരു മുന്നറിയിപ്പാണ് സിസി ടിവി ദൃശ്യങ്ങളെന്നും ഷനോജ് കൂട്ടിച്ചേര്ത്തു.