മലപ്പുറത്തിനെതിരായ വില കുറഞ്ഞ വിമർശനങ്ങൾക്ക് കഠിനാധ്വാനത്തിലൂടെയുള്ള നേട്ടങ്ങൾക്കൊണ്ട് ‍ഞങ്ങളുടെ കുട്ടികൾ മറുപടി പറയും: നജീബ് കാന്തപുരം

മലപ്പുറം: മലപ്പുറത്തെ കുറിച്ച് എസ്എൻഡിപി ജനറൽ സെക്രട്ടറി വെള്ളാപ്പള്ളി നടേശൻ നടത്തിയ വിദ്വേശപരാമർശത്തിന് മറുപടിയുമായി നജീബ് കാന്തപുരം എംഎൽഎ. മലപ്പുറത്തിനെതിരായ വില കുറഞ്ഞ വിമർശനങ്ങൾക്ക് കഠിനാധ്വാനത്തിലൂടെയുള്ള നേട്ടങ്ങൾക്കൊണ്ട് ‍ഞങ്ങളുടെ കുട്ടികൾ മറുപടി പറയുമെന്ന് നജീബ് കാന്തപുരം ഫേസ്ബുക്കിൽ കുറിച്ചു.

ഫേസ്ബുക്ക് പോസ്റ്റിന്റെ പൂർണരൂപം:

88 കഴിഞ്ഞ ഒരു കടൽ കിഴവന്റെ സാമ്പത്തിക, രാഷ്ട്രീയ ദുഷ്ടലാക്കോടെയുള്ള മലപ്പുറം വിരോധത്തോട്‌ മറുപടി പറയുന്നില്ല. ഒന്നുമില്ലായ്മയിൽ നിന്ന്, മുഴു പട്ടിണിയിൽ നിന്ന് കടുത്ത പരീക്ഷണങ്ങളിൽ നിന്ന്, തടഞ്ഞു വീഴാതെ മലപ്പുറത്തെ ഇത്രയും വളർത്തിയ ഒരു രാഷ്ട്രീയ പാർട്ടി അവർക്കുണ്ട്‌.

ആ പാർട്ടി തന്നെ അവരെ ഇനിയും മുന്നോട്ട്‌ നയിക്കും. ഈ ക്ഷുദ്ര ജീവികൾക്ക്‌ ഞങ്ങളുടെ കുട്ടികൾ മറുപടി പറയും. നിങ്ങൾ ഉപയോഗിക്കുന്ന വില കുറഞ്ഞ വാക്കുകൾ കൊണ്ടല്ല, അവർ കഠിനാധ്വാനം കൊണ്ട്‌ വെട്ടിപ്പിടിക്കുന്ന അവരുടെ നേട്ടങ്ങൾ കൊണ്ടായിരിക്കും. ശ്രീ ശ്രീ വെള്ളാപ്പള്ളിജിക്ക്‌ ഇതൊക്കെ കണ്ട്‌ നെഞ്ച്‌ പൊട്ടാൻ കാലം അവസരം നൽകട്ടെ..