വിദ്വേഷ പ്രസംഗക്കേസില്‍ പി.സി ജോര്‍ജിന് വീണ്ടും നോട്ടീസ് നല്‍കും

തിരുവനന്തപുരം വിദ്വേഷ പ്രസംഗക്കേസിൽ പി.സി ജോർജിന് പൊലീസ് വീണ്ടും നോട്ടീസ് നൽകും. തിങ്കളാഴ്ച ഹാജരാകണമെന്ന് ആവശ്യപ്പെട്ടാണ് നോട്ടീസ് നൽകുക. അതേസമയം ജോർജിന്‍റെ ജാമ്യം റദ്ദാക്കാൻ പൊലീസ് കോടതിയെ സമീപിക്കില്ല. തൃക്കാക്കരയിൽ പ്രചാരണത്തിന് പോയത് ജാമ്യവ്യവസ്ഥയുടെ ലംഘനമായി കാണാനാകില്ലെന്ന് പൊലീസിന് നിയമോപദേശം ലഭിച്ചു.

വിദ്വേഷ പ്രസംഗത്തിൽ ജാമ്യത്തിലിറങ്ങിയ ശേഷം തൃക്കാക്കരയിൽ പി.സി ജോർജ് നടത്തിയ പ്രസ്താവനകൾ പൊലീസ് പരിശോധിച്ചുവരികയായിരുന്നു. ജാമ്യ ഉപാധി ലംഘിച്ചിട്ടുണ്ടോ എന്നായിരുന്നു പരിശോധന. പത്രസമ്മേളനം അടക്കം എല്ലാ പരിപാടികളുടെയും ദൃശ്യങ്ങൾ പൊലീസ് ശേഖരിച്ചിരുന്നു. സൈബർ പൊലീസിന്‍റെ സഹായത്തോടെയായിരുന്നു ദൃശ്യങ്ങളുടെ പരിശോധന. ഇതിനിടെയാണ് തൃക്കാക്കരയിൽ പ്രചാരണത്തിന് പോയത് ജാമ്യവ്യവസ്ഥയുടെ ലംഘനമായി കാണാനാകില്ലെന്ന് പൊലീസിന് നിയമോപദേശം ലഭിക്കുന്നത്.

നേരത്തെ തിരുവനന്തപുരം മജിസ്‌ട്രേറ്റ് കോടതി ജാമ്യം റദ്ദാക്കിയ ഉത്തരവ് പിന്‍വലിക്കണമെന്നാവശ്യപ്പെട്ട് പി.സി.ജോര്‍ജ് ഹൈക്കോടതിയില്‍ നൽകിയ ഹരജി പിന്‍വലിച്ചിരുന്നു. ജാമ്യം റദ്ദാക്കിയ മജിസ്‌ട്രേറ്റിന്‍റെ തീരുമാനം തെറ്റാണെന്ന് ചൂണ്ടിക്കാട്ടിയായിരുന്നു ഹരജി നല്‍കിയത്. ജാമ്യം ലഭിച്ച സാഹചര്യത്തിലാണ് ഹരജി പിൻവലിക്കുന്നതെന്ന് പി.സി ജോർജ് അറിയിച്ചു. അനന്തപുരി ഹിന്ദു മഹാസമ്മേളനത്തിൽ നടത്തിയ വിദ്വേഷ പ്രസംഗത്തിന്റെ പേരിലായിരുന്നു പൊലീസ് കേസെടുത്തത്. ഇതിൽ അനുവദിച്ച ജാമ്യമാണ് വ്യവസ്ഥകൾ ലംഘിച്ചതിന്റെ പേരിൽ പിന്നീട് റദ്ദാക്കിയത്.