തിരുവനന്തപുരം: വരാനിരിക്കുന്ന നിയമസഭാ തെരഞ്ഞെടുപ്പിനുള്ള സിപിഐ സ്ഥാനാർഥികളെ പ്രഖ്യാപിച്ചു. കേരളത്തിൽ ഏപ്രിൽ 9ന് തെരഞ്ഞെടുപ്പ് നടക്കാനിരിക്കെ, 25 മണ്ഡലങ്ങളിലേക്കുള്ള സ്ഥാനാർഥികളുടെ പട്ടികയാണ് പാർട്ടി പുറത്തുവിട്ടത്. മന്ത്രിമാരും മുതിർന്ന നേതാക്കളും ഉൾപ്പെടുന്ന ശക്തമായ നിരയെയാണ് ഇത്തവണ പാർട്ടി മത്സരരംഗത്തിറക്കിയിരിക്കുന്നത്.
നിലവിലെ റവന്യൂ മന്ത്രി അഡ്വ. കെ. രാജൻ ഒല്ലൂർ മണ്ഡലത്തിൽ നിന്നും, കൃഷി മന്ത്രി പി. പ്രസാദ് ചേർത്തലയിൽ നിന്നും ജനവിധി തേടും. ഭക്ഷ്യ-സിവിൽ സപ്ലൈസ് മന്ത്രി അഡ്വ. ജി. ആർ. അനിൽ നെടുമങ്ങാടും, മൃഗസംരക്ഷണ വകുപ്പ് മന്ത്രി ജെ. ചിഞ്ചുറാണി ചടയമംഗലത്തും വീണ്ടും മത്സരിക്കും. കൂടാതെ തൃശൂരിൽ ആലങ്കോട് ലീലാകൃഷ്ണൻ, പട്ടാമ്പിയിൽ മുഹമ്മദ് മുഹസിൻ, നാട്ടികയിൽ ഗീത ഗോപി എന്നിവരും പട്ടികയിൽ ഇടംപിടിച്ചിട്ടുണ്ട്.യുവാക്കൾക്കും അഭിഭാഷകർക്കും മുൻഗണന നൽകുന്നതാണ് പ്രഖ്യാപിക്കപ്പെട്ട പട്ടിക.
അഡ്വ. ഗോവിന്ദൻ പള്ളിക്കാപ്പിൽ (കാഞ്ഞങ്ങാട്), അഡ്വ. പി. വസന്തം (നാദാപുരം), അഡ്വ. ഷെഫീർ കിഴിശ്ശേരി (ഏറനാട്), അഡ്വ. എം. എസ്. താര (കരുനാഗപ്പള്ളി), അഡ്വ. ആർ. രാജേന്ദ്രൻ (ചാത്തന്നൂർ) എന്നിങ്ങനെ നിരവധി അഭിഭാഷകർ പട്ടികയിലുണ്ട്. മഞ്ചേരി മണ്ഡലത്തിൽ മുസ്തഫ വി.എം സ്വതന്ത്ര സ്ഥാനാർഥിയായി മത്സരിക്കും. തെരഞ്ഞെടുപ്പ് കമ്മീഷന്റെ കലണ്ടർ പ്രകാരം നാമനിർദ്ദേശ പത്രിക സമർപ്പിക്കാനുള്ള അവസാന തീയതി മാർച്ച് 23നാണ്. പത്രികകളുടെ സൂക്ഷ്മപരിശോധന മാർച്ച് 24നും, പത്രിക പിൻവലിക്കാനുള്ള അവസാന തീയതി മാർച്ച് 26നുമാണ് നിശ്ചയിച്ചിരിക്കുന്നത്. ഏപ്രിൽ 9ന് നടക്കുന്ന വോട്ടെടുപ്പിന്റെ ഫലം മെയ് 4ന് പുറത്തുവരും