മന്ത്രി റോജി എം. ജോണിനെതിരായ പ്രതിഷേധം; മഹാരാജാസ് കോളജിലെ എസ്എഫ്ഐ നേതാക്കൾക്ക് 10 ദിവസത്തെ സസ്പെൻഷൻ

കൊച്ചി: മന്ത്രി റോജി എം. ജോണിനെതിരായ പ്രതിഷേധത്തിൽ മഹാരാജാസ് കോളജിലെ എസ്എഫ്ഐ നേതാക്കൾക്ക് സസ്പെൻഷൻ. കോളജ് യൂണിയൻ ചെയർമാൻ പ്രണീൽ രാജ്, വൈസ് ചെയർപേഴ്സൺ നഫീസത്തുൽ മിസ്രിയ എന്നിവരെയാണ് 10 ദിവസത്തേക്ക് സസ്പെൻഡ് ചെയ്തത്. പ്രിൻസിപ്പലിന്റെയും അധ്യാപകരുടെയും നേതൃത്വത്തിൽ ചേർന്ന യോഗത്തിലാണ് നടപടി തീരുമാനിച്ചത്.

കഴിഞ്ഞ വെള്ളിയാഴ്ച നടന്ന ബിരുദദാന ചടങ്ങിനിടെയായിരുന്നു പ്രതിഷേധം. മന്ത്രി വേദിയിൽ സംസാരിക്കുന്നതിനിടെ നഫീസത്തുൽ മിസ്രിയ വേദിയിലെത്തി ചോദ്യം ഉന്നയിക്കുകയും ബാനറുമായി പ്രതിഷേധിക്കുകയും ചെയ്തിരുന്നു. ഇതോടെ ചടങ്ങ് തടസ്സപ്പെട്ടു.

സംഭവത്തിൽ കെഎസ് യു നേതാക്കൾ കഴിഞ്ഞ ശനിയാഴ്ച കോളജിൽ പരാതി നൽകിയിരുന്നു. പരാതിയുടെ അടിസ്ഥാനത്തിൽ ചേർന്ന കോളജ് കൗൺസിൽ യോഗമാണ് സസ്പെൻഷൻ നടപടി സ്വീകരിച്ചത്. സംഭവത്തിൽ നടപടി ഉണ്ടാകുമെന്ന് മുഖ്യമന്ത്രി നേരത്തെ വ്യക്തമാക്കിയിരുന്നു.സസ്പെൻഷൻ തീരുമാനത്തിന് പിന്നാലെ മഹാരാജാസ് കോളജിൽ എസ്.എഫ്.ഐ പ്രതിഷേധം ആരംഭിച്ചു.