സൂംബാ വിവാദത്തിൽ പോസ്റ്റിട്ട അധ്യാപകനെ സസ്പെൻഡ് ചെയ്തു
വിദ്യാഭ്യാസ വകുപ്പിന്റെ നിർദേശത്തിലാണ് നടപടി
Update: 2025-07-03 06:53 GMT
മലപ്പുറം: സ്കൂളുകളിൽ സൂംബ നടപ്പിലാക്കുന്നതുമായി ബന്ധപ്പെട്ട് വിവാദ ഫേസ്ബുക്ക് പോസ്റ്റിട്ട അധ്യാപകന് സസ്പെൻഷൻ. വിസ്ഡം നേതാവു കൂടിയായ ടി.കെ അഷ്റഫിനെയാണ് സസ്പെൻഡ് ചെയ്തത്. എടത്തനാട്ടുകര ടി.കെ.എം യുപി സ്കൂൾ മാനേജ്മെന്റിന്റേതാണ് നടപടി. വിദ്യാഭ്യാസ വകുപ്പ് സസ്പെൻഡ് ചെയ്യണമെന്ന നിർദേശം നൽകിയതിനെ തുടർന്നാണ് സ്കൂളിന്റെ നടപടി.
സൂംബാ ഡാൻസ് പദ്ധതിയെ വിമർശിച്ച വിസ്ഡം ജനറൽ സെക്രട്ടറിയും അധ്യാപകനുമായ ടി.കെ അഷ്റഫിനെതിരെ നടപടിയെടുക്കണമെന്ന് പൊതുവിദ്യാഭ്യാസ ഡയറക്ടർ ആവശ്യപ്പെട്ടിരുന്നു. ടി.കെ അഷ്റഫ് ജോലി ചെയ്യുന്ന സ്കൂൾ മാനേജർക്ക്, പാലക്കാട് വിദ്യാഭ്യാസ ഉപഡയറക്ടറാണ് നപടി ആവശ്യപ്പെട്ട് കത്ത് നൽകിയത്. സസ്പെൻഷനടക്കമുള്ള അച്ചടക്ക നടപടി 24 മണിക്കൂറിനകം സ്വീകരിക്കണമെന്നായിരുന്നു ആവശ്യപ്പെട്ടത്.
സർക്കാരിനെയും പൊതുവിദ്യാഭ്യാസ വകുപ്പിനെയും അപകീർത്തിപ്പെടുത്തും വിധം ടി.കെ അഷ്റഫ് സാമൂഹിക മാധ്യമങ്ങളിൽ പോസ്റ്റിട്ടുവെന്ന് കത്തിൽ പറയുന്നു. ടി.കെ അഷ്റിന്റെ എഫ്ബി പോസ്റ്റും കത്തിനൊപ്പം ചേർത്തിട്ടുണ്ട്.
സ്കൂളുകളിൽ ലഹരി വിരുദ്ധ ക്യാപയിന്റെ ഭാഗമായി സംസ്ഥാന വിദ്യാഭ്യാസ വകുപ്പ് നടപ്പിലാക്കുന്ന സൂംബ ഡാൻസ് പദ്ധതിക്കെതിരെ ആദ്യം പരസ്യമായി വിമർശനം ഉന്നയിച്ചത് ടി.കെ അഷ്റഫ് ആയിരുന്നു. പൊതുവിദ്യാലയത്തിലേക്ക് കുട്ടിയെ അയക്കുന്നത് ഗുണമേന്മയുള്ള വിദ്യാഭ്യാസം ലക്ഷ്യംവെച്ചാണ്. ആൺ-പെൺ കൂടിക്കലർന്ന് അൽപ്പവസ്ത്രം ധരിച്ച് മ്യൂസിക്കിന്റെ താളത്തിൽ തുള്ളുന്ന സംസ്കാരം പഠിക്കാൻ വേണ്ടിയല്ല. ഇത് പുരോഗമനമായി കാണുന്നവർ ഉണ്ടായേക്കാം. താൻ ഈ കാര്യത്തിൽ പ്രാകൃതനാണെന്നും അഷ്റഫ് പറഞ്ഞിരുന്നു.