ശ്രീജേഷ് താരമായി; അര്ജന്റീനയെ മുട്ടുകുത്തിച്ച് ഇന്ത്യ
കളി തീരാന് ആറു സെക്കന്ഡ് മാത്രം ബാക്കിനില്ക്കെ ഹര്മന്പ്രീത് സിങ് നേടിയ ഗോളിലാണ് ഇന്ത്യ അര്ജന്റീനയെ പിടിച്ചുനിര്ത്തിയത്
Update: 2021-04-12 08:13 GMT
എഫ്ഐഎച്ച് പ്രോ ലീഗ് ഹോക്കിയില് ഒളിമ്പിക് ചാമ്പ്യന്മാരായ അര്ജന്റീനക്കെതിരെ ഇന്ത്യക്ക് ജയം. നിശ്ചിതസമയത്ത് ഇരുടീമുകളും തുല്യത(2-2) പാലിച്ച മത്സരത്തില് ഷൂട്ടൗട്ടിലാണ് ഇന്ത്യ അര്ജന്റീനയെ കീഴടക്കിയത്(3-2). ഷൂട്ടൗട്ടില് മൂന്ന് സേവുകളുമായി നിറഞ്ഞുനിന്ന മലയാളി ഗോള്കീപ്പര് പിആര് ശ്രീജേഷ് മികച്ച പ്രകടനം പുറത്തെടുത്തു.
ലളിത് ഉപാധ്യായ്, രൂപീന്ദര്പാല്സിങ്, ദില്പ്രീത് സിങ് എന്നിവരാണ് പെനാല്ട്ടി ഷൂട്ടൗട്ടില് ഇന്ത്യക്കായി ഗോൾവല കുലുക്കിയത്. നിശ്ചിതസമയത്ത് ഇന്ത്യയുടെ രണ്ടു ഗോളും ഹര്മന്പ്രീതാണ് നേടിയത്. കളി തീരാന് ആറു സെക്കന്ഡ് മാത്രം ബാക്കിനില്ക്കെ ഹര്മന്പ്രീത് സിങ് നേടിയ ഗോളിലാണ് ഇന്ത്യ അര്ജന്റീനയെ പിടിച്ചുനിര്ത്തിയത്. അര്ജന്റീനയ്ക്കുവേണ്ടി മാര്ട്ടിന് ഫെറെയ്റോ ഇരട്ടഗോള് നേടി.