ഡൽഹി: വര്ക്ക് ഫ്രം ഹോം അല്ലെങ്കിൽ റിമോട്ടായി ജോലി ചെയ്യുന്ന ജീവനക്കാരെ കമ്പനികള്ക്ക് നിരീക്ഷിക്കുന്നതിന് മൈക്രോസോഫ്റ്റ് ടീം പുതിയ ആപ്പ് പുറത്തിറക്കിയത് വിമര്ശനത്തിനിടയാക്കിയിരുന്നു. ഉപയോക്താക്കള് അവരുടെ ഓഫീസ് വൈ-ഫൈയിലേക്ക് കണക്ടുചെയ്യുമ്പോള് ആപ്പ് സ്വമേധയാ അത് തിരിച്ചറിയുകയും അതനുസരിച്ച് അവരുടെ ജോലി സ്ഥലം അപ്ഡേറ്റ് ചെയ്യുകയും ചെയ്യുന്നതാണ് ഈ ആപ്പിന്റെ പ്രത്യേകത. ഇപ്പോഴിതാ ജീവനക്കാരുടെ സ്വകാര്യതയിൽ കടന്നുകയറുകയാണ് ഗൂഗിളും. പുതിയ ആൻഡ്രോയിഡ് അപ്ഡേറ്റ് പ്രകാരം നിങ്ങളുടെ ആർസിഎസും എസ്എംഎസ് ടെക്സ്റ്റുകളും ഇനി സ്വകാര്യമല്ല.
ആൻഡ്രോയിഡ് ഫോണുകളിലെ ഏറ്റവും ജനപ്രിയ ആപ്പുകളിൽ ഒന്നാണ് ഗൂഗിൾ മെസേജ്. ഫോണുകളിൽ നിന്ന് ഫോണുകളിലേക്ക് SMS ആയി സന്ദേശങ്ങൾ അയക്കാൻ സാധിക്കുന്ന ഗൂഗിൾ മെസേജ് റിച്ച് കമ്മ്യൂണിക്കേഷൻ സർവീസസ് (ആർസിഎസ്) സംവിധാനം ഉപയോഗിച്ചാണ് പ്രവർത്തിക്കുന്നത്.
“പിക്സൽ (മറ്റ് ആൻഡ്രോയിഡ്) ഫോണുകളിൽ ഗൂഗിൾ ആൻഡ്രോയിഡ് ആർസിഎസ് ആർക്കൈവൽ പുറത്തിറക്കുന്നു, ഇത് തൊഴിലുടമകൾക്ക് ജോലി കൈകാര്യം ചെയ്യുന്ന ഉപകരണങ്ങളിൽ ആർസിഎസ് ചാറ്റുകൾ തടസ്സപ്പെടുത്താനും ആർക്കൈവ് ചെയ്യാനും അനുവദിക്കുന്നു. ലളിതമായി പറഞ്ഞാൽ, എൻഡ്-ടു-എൻഡ് എൻക്രിപ്ഷൻ ഉണ്ടായിരുന്നിട്ടും നിങ്ങളുടെ തൊഴിലുടമയ്ക്ക് ഇപ്പോൾ ഗൂഗിൾ മെസേജുകളിൽ നിങ്ങളുടെ ആർസിഎസ് ചാറ്റുകൾ വായിക്കാൻ കഴിയും.” ആൻഡ്രോയിഡ് അതോറിറ്റി വെബ്സൈറ്റ് റിപ്പോര്ട്ടിൽ പറയുന്നു.
ഗൂഗിൾ അക്കൗണ്ടുമായി ലിങ്ക് ചെയ്തിരിക്കുന്ന മെസേജസ് ആപ്പ് ഉപയോഗിച്ചാണ് ഗൂഗിൾ ടെക്സ്റ്റ് സന്ദേശങ്ങൾ പങ്കിടുന്നത്. മെസേജസ് ഫോർ വെബിലൂടെ കമ്പ്യൂട്ടറുകൾ ഉൾപ്പെടെയുള്ള ഉപകരണങ്ങളിലുടനീളം ടെക്സ്റ്റ് സന്ദേശങ്ങൾ സമന്വയിപ്പിക്കാൻ ഈ സവിശേഷത ഉപയോക്താക്കളെ അനുവദിക്കുന്നു. പ്രത്യേകിച്ച് കോർപറേറ്റ് ഫോണുകളിലും ഉപകരണങ്ങളിലും ജോലി ആശയവിനിമയം കൂടുതൽ കാര്യക്ഷമമായി കൈകാര്യം ചെയ്യാൻ തൊഴിലുടമകളെ ഈ അപ്ഡേറ്റ് സഹായിക്കുമെന്ന് ഗൂഗിൾ അവകാശപ്പെടുന്നു. എന്നിരുന്നാലും, ഇത് വ്യക്തിഗത സ്വകാര്യതയിലേക്ക് കടന്നുകയറ്റം നടത്തുമെന്ന് ജീവനക്കാർ ഭയപ്പെടുന്നു.
ജോലിസ്ഥലത്തെ ഉപകരണങ്ങളാണ് ഇത്തരത്തിൽ ആക്സസ് ചെയ്യാൻ സാധിക്കുക. വ്യക്തിഗത ഉപകരണങ്ങളെ ഇത് ബാധിക്കില്ല.അതുകൊണ്ട് തന്നെ ജോലിക്ക് കയറിയാൽ പെട്ടെന്ന് കമ്പനി ഫോൺ ലഭിച്ചാൽ സൂക്ഷിക്കുക. നിങ്ങളെ നിരീക്ഷിക്കാനുള്ള ഒരു മാര്ഗമായിരിക്കും ഈ ഫോൺ. തൊഴിലുടമകൾക്ക് നിരീക്ഷിക്കാൻ എളുപ്പമുള്ള സുരക്ഷിതമല്ലാത്ത ഇ-മെയിലിൽ സന്ദേശങ്ങൾ അയക്കുന്നതിന്റെ അപകട സാധ്യതകളെക്കുറിച്ച് ജീവനക്കാര്ക്ക് അറിയാമായിരുന്നെങ്കിലും ടെക്സ്റ്റ് സന്ദേശങ്ങൾ അയക്കുന്നത് തീര്ത്തും സുരക്ഷിതമായിരുന്നു.
സഹപ്രവർത്തകരുമായി ആശയവിനിമയം നടത്താൻ ജീവനക്കാർ ഷാഡോ ഐടി സംവിധാനങ്ങളിലേക്ക് തിരിയുന്നുണ്ടെന്ന ആശങ്ക വളരെക്കാലമായി നിലവിലുണ്ട് . പ്രത്യേകിച്ച് വാട്ട്സ്ആപ്പ്, സിഗ്നൽ പോലുള്ള മാര്ഗങ്ങളിലൂടെ. സ്വകാര്യ സന്ദേശങ്ങൾ നിരീക്ഷിക്കപ്പെടുന്നതിനെക്കുറിച്ച് ജീവനക്കാർ ആശങ്ക പ്രകടിപ്പിച്ചിട്ടുണ്ട്. കോർപ്പറേറ്റ് ഐടി ടീമുകൾക്ക് വ്യക്തിഗത സന്ദേശങ്ങൾ ആക്സസ് ചെയ്യാൻ കഴിയുമെന്നും ഇത് പ്രൊഫഷണൽ ജീവിതത്തെയും വ്യക്തിജീവിതത്തെയും ബാധിക്കുമെന്ന് പലരും ഭയപ്പെടുന്നു.