നിലവിലെ ലോക്ഡൗൺ നിയന്ത്രണങ്ങളില് മാറ്റം വരുത്തുന്ന കാര്യത്തില് ഇന്ന് തീരുമാനമുണ്ടായേക്കും. ചീഫ് സെക്രട്ടറി തലത്തില് തയ്യാറാക്കുന്ന നിര്ദേശങ്ങളാണ് അവലോകന യോഗം ചര്ച്ച ചെയ്യുന്നത്. ടി.പി.ആര് അടിസ്ഥാനത്തിലുള്ള നിയന്ത്രണങ്ങള് മാറ്റി മൈക്രോ കണ്ടയ്ന്മെന്റ് സോണുകള് രൂപീകരിച്ച് പ്രതിരോധം നടപ്പാക്കാനാണ് സര്ക്കാര് ആലോചന. വാരാന്ത്യ ലോക് ഡൗൺ ഞായറാഴ്ച്ച മാത്രമാക്കണമെന്നും ശുപാർശയുണ്ട്. ഇന്നത്തെ അവലോകന യോഗത്തിൽ അന്തിമ തീരുമാനമുണ്ടാകും.
തദ്ദേശ സ്ഥാപനങ്ങളെ എ-ബി-സി-ഡി കാറ്റഗറിയായി തിരിച്ച് നിയന്ത്രണങ്ങള് ഏര്പ്പെടുത്തുന്നത് ഫലപ്രദമല്ലെന്ന് വിലയിരുത്തിയാണ് ബദല് മാര്ഗം സര്ക്കാര് തേടിയത്. ബദല് നിര്ദേശങ്ങള് സമര്പ്പിക്കാന് വിദഗ്ധ സമിതിക്കും ചീഫ് സെക്രട്ടറിക്കും മുഖ്യമന്ത്രി നിര്ദേശം നല്കിയിരിന്നു. ഇതിന്റെ അടിസ്ഥാനത്തില് തയ്യാറാക്കിയ റിപ്പോര്ട്ടായിരിക്കും അവലോകനയോഗം പരിഗണിക്കുന്നത്. ടി.പി.ആര് പത്തില് കൂടുതലുള്ള വാര്ഡുകളെ മൈക്രോ കണ്ടയ്ന്മെന്റ് സോണായി തിരിച്ച് അടച്ചിടാനാണ് ആലോചന. ടി.പി.ആര് അടിസ്ഥാനത്തില് തദ്ദേശസ്ഥാപനങ്ങളെ മുഴുവനായി അടച്ചിടുന്നതില് മാറ്റം വരുത്തും. ടി.പി.ആറിന് പകരം രോഗികളുടെ എണ്ണം അനുസരിച്ച് സോണുകൾ തീരുമാനിക്കും. ആറ് ദിവസവും എല്ലാ കടകളും തുറക്കണമെന്നും കടകളുടെ പ്രവർത്തന സമയം കൂട്ടുമെന്നും ശുപാർശയില് പറയുന്നു.
പത്തില് കൂടുതല് ടി.പി.ആര് ഉള്ള സ്ഥലങ്ങളില് കര്ശന നിയന്ത്രണം വേണമെന്ന കേന്ദ്ര നിര്ദ്ദേശവും സര്ക്കാര് പരിഗണിക്കുന്നുണ്ട്. ടി.പി.ആര് കുറഞ്ഞ പ്രദേശങ്ങളില് എല്ലാ കടകളും എല്ലാ ദിവസവും തുറക്കുന്നതും പരിഗണനയിലുണ്ട്. തുറക്കുന്ന കടകളിലെ ജീവനക്കാരെ എല്ലാ ആഴ്ചയിലും പരിശോധിക്കും. പ്രധാനസ്ഥാപനങ്ങള്ക്ക് മുന്നില് കോവിഡ് പരിശോധനാ കേന്ദ്രങ്ങള് ആരംഭിക്കുന്ന കാര്യവും ശുപാര്ശയിലുണ്ടെന്നാണ് സൂചന.
കോവിഡ് പരിശോധന ദിവസം രണ്ട് ലക്ഷമാക്കി ഉയര്ത്തും. വാരാന്ത്യലോക്ഡൗണ് ഒഴിവാക്കാനുള്ള ആലോചനയും സര്ക്കാര് തലത്തിലുണ്ട്. ഓണത്തിന് കൂടുതല് ഇളവുകള് ലഭിക്കുന്ന തരത്തില് നിയന്ത്രണങ്ങളില് മാറ്റം വരുത്തിയേക്കും.