ഫ്ലൈദുബൈ വിമാനത്തിലെ ആക്രമണം; പിന്നിൽ മറ്റാരെങ്കിലും ഉണ്ടെങ്കിൽ കനത്ത വില നൽകേണ്ടിവരും: നെതന്യാഹു

തെൽഅവീവ്: ഫ്ലൈദുബൈ വിമാനത്തിലെ കോ-പൈലറ്റ് വിമാനം തകർക്കാൻ ശ്രമിച്ച സംഭവത്തിൽ മറ്റാരുടെയെങ്കിലും നിർദേശമുണ്ടായിരുന്നോയെന്ന് അന്വേഷിക്കുകയാണെന്ന് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു. സംഭവത്തിന് പിന്നിൽ മറ്റാരെങ്കിലും ഉണ്ടെന്ന് കണ്ടെത്തിയാൽ കനത്ത വില നൽകേണ്ടിവരുമെന്നും നെതന്യാഹു പറഞ്ഞു.

ദുബൈയിൽ നിന്ന് ടെൽ അവീവിലേക്ക് പുറപ്പെട്ട ഫ്ലൈദുബായ് വിമാനത്തിലാണ് ബുധനാഴ്ച സംഭവമുണ്ടായത്. കോ-പൈലറ്റ് ക്യാപ്റ്റനെ കുത്തിയതിനെ തുടർന്ന് വിമാനം നിയന്ത്രണം നഷ്ടപ്പെടുന്ന സാഹചര്യമുണ്ടായി. തുടർന്ന് യാത്രക്കാരും വിമാനത്തിലുണ്ടായിരുന്ന ജീവനക്കാരും ഇടപെട്ട് കോ-പൈലറ്റിനെ കീഴടക്കി. വിമാനം സൗദി അറേബ്യയിലെ തബൂക്ക് വിമാനത്താവളത്തിൽ അടിയന്തരമായി ഇറക്കുകയായിരുന്നു.

സംഭവത്തിൽ പരിക്കേറ്റ ഇന്ത്യൻ പൈലറ്റ് സ്മിത് മച്ചാർ വിമാനത്തിന്റെ കോക്പിറ്റ് വാതിൽ തുറന്നതോടെയാണ് യാത്രക്കാർക്ക് അകത്ത് പ്രവേശിച്ച് ആക്രമിയെ കീഴടക്കാൻ സാധിച്ചത്. സംഭവത്തിൽ വിമാനത്തിലുണ്ടായിരുന്ന എല്ലാവരുടെയും സുരക്ഷ ഉറപ്പാക്കുന്നതിനായി പൈലറ്റിന്റെ ഇടപെടൽ നിർണായകമായിരുന്നുവെന്നാണ് റിപ്പോർട്ടുകൾ.

സംഭവത്തിന്റെ പിന്നിലെ ഉദ്ദേശ്യം സംബന്ധിച്ച് അന്വേഷണം തുടരുകയാണ്. കോ-പൈലറ്റ് ഒറ്റയ്ക്കാണോ പ്രവർത്തിച്ചതെന്നും മറ്റാരുടെയെങ്കിലും നിർദേശപ്രകാരമാണോ ആക്രമണം നടത്തിയതെന്നും പരിശോധിച്ചുവരികയാണെന്ന് നെതന്യാഹു വ്യക്തമാക്കി.

അതേസമയം, സംഭവവുമായി ബന്ധപ്പെട്ട് ഇസ്രയേൽ ഉദ്യോഗസ്ഥരും യുഎഇ അധികൃതരുടെ നേതൃത്വത്തിലുള്ള അന്വേഷണത്തിൽ പങ്കാളികളാകുമെന്ന് റിപ്പോർട്ടുകളുണ്ട്. കോ-പൈലറ്റിന്റെ ഉദ്ദേശ്യവും പശ്ചാത്തലവും ഉൾപ്പെടെയുള്ള കാര്യങ്ങളാണ് പരിശോധിക്കുന്നത്.