യുഎസ്-ഇസ്രായേൽ ആക്രമണങ്ങളെ അതിജീവിച്ച് ആണവകേന്ദ്രങ്ങൾ; ഇറാന്റെ ലക്ഷ്യം ആണവായുധമോ?

ഇസ്ഫഹാൻ: അഞ്ചാഴ്ച നീണ്ടുനിന്ന അമേരിക്കയുടെയും ഇസ്രായേലിന്റെയും കനത്ത ബോംബാക്രമണങ്ങൾക്കിടയിലും ഇറാന്റെ ആണവകേന്ദ്രങ്ങൾ സുരക്ഷിതമെന്ന് റിപ്പോർട്ട്. ആണവായുധം നിർമിക്കുന്നതിന് ആവശ്യമായ പ്രധാന ഉപകരണങ്ങൾക്കും കേന്ദ്രങ്ങൾക്കും കാര്യമായ കേടുപാടുകൾ സംഭവിച്ചിട്ടില്ലെന്ന് ഉദ്യോഗസ്ഥരെയും പ്രതിരോധ വിദഗ്ധരെയും ഉദ്ധരിച്ച് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. എന്നാൽ ഇറാൻ അത്തരമൊരു നീക്കത്തിലേക്ക് കടക്കുമോ എന്നാണ് ലോകം ഉറ്റുനോക്കുന്നത്.

രാഷ്ട്രീയവും മതപരവുമായ കാരണങ്ങളാലാണ് ഇറാൻ ഇതുവരെ ആണവായുധങ്ങൾ വികസിപ്പിക്കാതിരുന്നത്. ഇസ്‌ലാമിക നിയമപ്രകാരം ആണവായുധങ്ങളുടെ നിർമാണവും ഉപയോഗവും നിഷിദ്ധമാണെന്ന 2003-2005 കാലഘട്ടത്തിലെ അയത്തുല്ല റൂഹുല്ല ഖുമൈനിയുടെ ഫത്‌വയും ആണവനിർവ്യാപന കരാറിൽ അംഗത്വം നിലനിർത്തിക്കൊണ്ട് ആണവായുധങ്ങൾ നിർമിക്കില്ലെന്ന ഇറാന്റെ നിലപാടുമാണ് ഇതിന് ആധാരം. എന്നാൽ ആണവ നിർവ്യാപന കരാറിൽ നിന്ന് പിന്മാറുന്നതിനുള്ള ഒരു ഫാസ്റ്റ് ട്രാക്ക് ബിൽ ഇറാൻ പാർലമെന്റ് ഇപ്പോൾ പുനഃപരിശോധിക്കുകയാണ്.

പാകിസ്താനിലെ ഇസ്‌ലാമാബാദിൽ നടത്തിയ നിർണായക ചർച്ചകൾ തീരുമാനമാകാതെ പിരിഞ്ഞതിന് പിന്നാലെ, ഇറാന്റെ ആണവ മോഹങ്ങളാണ് പ്രധാന തർക്കവിഷയമെന്ന് യുഎസ് വൈസ് പ്രസിഡന്റ് ജെ.ഡി. വാൻസ് ആരോപിച്ചിരുന്നു. സമാധാനം പുനഃസ്ഥാപിക്കുക എന്ന ലക്ഷ്യത്തോടെ 21 മണിക്കൂർ നീണ്ടുനിന്ന മാരത്തൺ ചർച്ചകൾക്കൊടുവിലും സമവായത്തിലെത്താൻ ഇരുപക്ഷത്തിനും കഴിഞ്ഞില്ല. 

അമേരിക്കയും ഇസ്രായേലും നടത്തിയ വിനാശകരമായ ആക്രമണങ്ങളെ ഇറാന്റെ ആണവപദ്ധതി എങ്ങനെ അതിജീവിച്ചു എന്നത് ലോകരാജ്യങ്ങളെ അത്ഭുതപ്പെടുത്തുന്നുണ്ട്. ഭൂമിക്കടിയിൽ അതീവ രഹസ്യമായി നിർമിച്ച യുറേനിയം സമ്പുഷ്ടീകരണ തുരങ്കങ്ങളാണ് ഇറാനെ രക്ഷിച്ചതെന്നാണ് വിദഗ്ധർ ചൂണ്ടിക്കാട്ടുന്നത്. അത്യാധുനിക ബങ്കർ ബസ്റ്റർ ബോംബുകൾ ഉപയോഗിച്ച് അഞ്ചാഴ്ചയോളം ആക്രമണം നടത്തിയിട്ടും ഈ ഭൂഗർഭ കേന്ദ്രങ്ങളെ പൂർണമായി നശിപ്പിക്കാൻ അമേരിക്കൻ-ഇസ്രായേൽ സഖ്യത്തിന് സാധിച്ചിട്ടില്ല. ആണവപദ്ധതിയുടെ സുപ്രധാന ഭാഗങ്ങളെല്ലാം ഇപ്പോഴും പ്രവർത്തനസജ്ജമാണ്.

യുദ്ധം രൂക്ഷമാകുന്ന സാഹചര്യത്തിൽ പശ്ചിമേഷ്യയിൽ ആണവായുധ വ്യാപനത്തിനുള്ള സാധ്യതകളെക്കുറിച്ചും വലിയ ആശങ്ക നിലനിൽക്കുന്നുണ്ട്. ആണവായുധം നിർമിക്കുന്നതിലേക്ക് ഇറാൻ കൂടുതൽ അടുത്തേക്കുമെന്നതും, യുദ്ധത്തിന്റെ പശ്ചാത്തലത്തിൽ മേഖലയിലെ മറ്റ് രാജ്യങ്ങളിലേക്കോ സായുധ സംഘങ്ങളിലേക്കോ ഈ സാങ്കേതികവിദ്യ കൈമാറ്റം ചെയ്യപ്പെട്ടേക്കാമെന്നതും വലിയ പ്രത്യാഘാതങ്ങൾ സൃഷ്ടിക്കും. ഈ സാധ്യതകൾ അന്താരാഷ്ട്ര തലത്തിൽ വലിയ പരിഭ്രാന്തിയാണ് ഉണ്ടാക്കിയിരിക്കുന്നത്.