ഖത്തറിലെ ഇസ്രായേല്‍ ആക്രമണവും പ്രത്യാഘാതങ്ങളും; പശ്ചിമേഷ്യാ വിദഗ്ധർ പ്രതികരിക്കുന്നു

ദോഹ: ഖത്തർ തലസ്ഥാനമായ ദോഹയിൽ ചൊവ്വാഴ്ചയാണ് ഹമാസ് റസിഡൻഷ്യൽ ഹെഡ്ക്വാർട്ടേഴ്സില്‍ ഇസ്രായേല്‍ ഭീകരാക്രമണം ഉണ്ടായത്. ആക്രമണത്തില്‍ ആറ് പേർ കൊല്ലപ്പെടുകയും ചെയ്തതായാണ് വിവരം.ഗസ്സയിൽ വെടിനിർത്തൽ ഉറപ്പാക്കുന്നതിനുള്ള ചർച്ചകളിൽ ഏർപ്പെട്ടിരിക്കുന്ന ഫലസ്തീൻ പ്രതിനിധികൾ ഉൾപ്പെടെ ഹമാസിന്റെ മുതിർന്ന നേതാക്കളെ ലക്ഷ്യം വെച്ചാണ്  ദോഹയിൽ മിസൈൽ ആക്രമണം നടത്തിയത്. അന്താരാഷ്ട്ര നിയമങ്ങളുടെയും പരമാധികാരത്തിന്റെയും ലംഘനമാണെന്ന് ഖത്തർ ആക്രമണത്തെ അപലപിച്ചു.

ആക്രമണവിവരം അറിയിച്ചെന്ന അമേരിക്കൻ അവകാശവാദത്തെ ഖത്തർ പ്രധാനമന്ത്രി തള്ളിയിരുന്നു. സംഭവം കഴിഞ്ഞ് പത്തു മിനിറ്റിന് ശേഷമാണ് അമേരിക്ക വിവരം അറിയിച്ചത്. ആക്രമണത്തോട് സുരക്ഷാ സേന കൃത്യമായ രീതിയിലാണ് പ്രതികരിച്ചത്. അത്യാഹിതങ്ങൾ അതിവേഗത്തിൽ കണ്ടെത്താനായെന്നും മുഹമ്മദ് ബിൻ അബ്ദുറഹ്മാൻ അൽഥാനി ചൂണ്ടിക്കാട്ടിയിരുന്നു. ഇസ്രായേലിനും ഹമാസിനും ഇടയിലുള്ള ഒരു പ്രധാന മധ്യസ്ഥ രാജ്യമാണ് ഖത്തർ.

ഇസ്രായേല്‍ ഖത്തറില്‍ നടത്തിയ ഭീകരാക്രമണത്തെക്കുറിച്ച് പശ്ചിമേഷ്യാ നയതന്ത്ര,രാഷ്ട്രീയ വിദഗ്ധർ  പ്രതികരിക്കുന്നു.

ലോകത്തിലെ ഏറ്റവും സുരക്ഷിതമായ രാജ്യങ്ങളിലൊന്നാണ് ഖത്തർ.  ഇസ്രായേലിന് അവര്‍ക്ക് ഇഷ്ടമുള്ളയിടത്ത് പോകാന്‍ കഴിയുമെന്ന് യുഎസ് പ്രതിനിധി ടോം ബരാക് അടുത്തിടെ പറഞ്ഞിരുന്നു.അങ്ങനെ ചിന്തിച്ചാല്‍ ഈ മേഖലയില്‍ സുരക്ഷിതത്വമുണ്ടെന്ന് തോന്നുന്നുണ്ടോ?

ജാസ്മിൻ എൽ-ഗമാൽ (വിദേശനയ വിശകലന വിദഗ്ദ്ധയും മുൻ പെന്റഗൺ മിഡിൽ ഈസ്റ്റ് ഉപദേഷ്ടാവും):  നെതന്യാഹു സർക്കാരിന് കീഴിൽ ഈ മേഖലയിലെ ആരും സുരക്ഷിതരല്ല, ഒരു സ്ഥലവും സുരക്ഷിതരല്ല. അടിസ്ഥാനപരമായി അതാണ് ഇവിടെ നല്‍കുന്ന സന്ദേശം. ഒരു പരമാധികാര രാജ്യത്തിനെതിരെ ആക്രമണം നടത്താൻ നെതന്യാഹു ഉത്തരവിടുന്നത് ഇതാദ്യമല്ല. അദ്ദേഹം അത് ചെയ്യുമ്പോഴെല്ലാം  യുഎസും യൂറോപ്പും മറ്റ് രാജ്യങ്ങളും അതിനെ ഒന്നുകില്‍ അവഗണിക്കുകയോ പ്രോത്സാഹിപ്പിക്കുകയോ പിന്തുണയ്ക്കുകയോ ചെയ്തിട്ടുണ്ട്.

ഗ്ലെൻ കാർലെ (ദേശീയ സുരക്ഷാ വിദഗ്ധൻ):മിഡിൽ ഈസ്റ്റിലെ എല്ലാവരെയും ഇസ്രായേൽ വിവേചനരഹിതമായി വേട്ടയാടുന്നില്ല.എന്നാലിത്  ഇസ്രായേലിനെതിരെ  പൊതുജനങ്ങളെ എല്ലായിടത്തും കൂടുതൽ തിരിയ്ക്കും.  ഇസ്രായേലുമായി ഏതെങ്കിലും വിധത്തിൽ സഖ്യമുണ്ടാക്കുന്നതിൽ മറ്റ് സര്‍ക്കാറുകള്‍ കൂടുതൽ ജാഗ്രത പുലർത്തുകയും ചെയ്യും.

പരമാധികാരത്തിന്റെ ലംഘനങ്ങൾ  തുടരുമ്പോൾ, അന്താരാഷ്ട്ര നിയമത്തിന്  എത്രത്തോളം പ്രാധാന്യമുണ്ട്?

ജോഷ് പോൾ: 1980-കളിൽ അന്നത്തെ സിൻ ഫീൻ പ്രസിഡന്റ് ഗെറി ആഡംസിനെ കൊല്ലാൻ ബ്രിട്ടൻ വാഷിംഗ്ടൺ ഡിസിയിൽ ബോംബെറിഞ്ഞതുപോലെയാണ് ഇത്. ഇത് മുഴുവൻ സംവിധാനത്തെയും പരിഹസിക്കുന്നു, മാത്രമല്ല ഇത് മിഡിൽ ഈസ്റ്റ് രാജ്യങ്ങളെ സുരക്ഷിതമല്ലെന്ന് തോന്നിപ്പിക്കുകയും ചെയ്യുന്നു.

ഗമാൽ: ഗസ്സയിൽ അന്താരാഷ്ട്ര നിയമം മരിച്ചു കഴിഞ്ഞിരിക്കുന്നു. ഇസ്രായേൽ ഈ പരമാധികാര രാജ്യങ്ങളെ ലംഘിക്കുമ്പോഴും, ലെബനനിലും ഇറാനിലും ആളുകളെ കൊലപ്പെടുത്തുമ്പോഴും, സിറിയയിൽ ബോംബാക്രമണം നടത്തിയപ്പോഴും  ലോകം കണ്ണടച്ചു.  ഒരു യുഎസ് സഖ്യകക്ഷിയോട് ഇങ്ങനെ ചെയ്തിട്ട് തനിക്ക് രക്ഷപ്പെടാൻ കഴിയുമെന്ന് നെതന്യാഹു എന്തുകൊണ്ട് ചിന്തിച്ചില്ല?

കാർലെ: അന്താരാഷ്ട്ര നിയമം നടപ്പിലാക്കാൻ കഴിഞ്ഞിട്ടുള്ള ഒരേയൊരു യഥാർത്ഥ ശക്തി അമേരിക്കയാണ്. ട്രംപ് അതെല്ലാം നിരാകരിച്ചിരിക്കുന്നു. ഒരു അന്താരാഷ്ട്ര മാനദണ്ഡ വ്യവസ്ഥയെ പിന്തുണയ്ക്കുന്നതിനുപകരം അദ്ദേഹം ഏകപക്ഷീയമായി പ്രവർത്തിക്കുന്നു. 

ഈ ആക്രമണം മറ്റ് ഗൾഫ് രാജ്യങ്ങൾക്ക് എന്ത് പ്രത്യാഘാതങ്ങളാണ് ഉണ്ടാക്കുക?

താഫർ: ഖത്തറിനെ സഹായിക്കാൻ സാധ്യമായതെല്ലാം ചെയ്യുമെന്നായിരുന്നു സൗദിയുടെ പ്രതികരണം. അതൊരു സന്ദേശമാണെന്ന് ഞാൻ കരുതുന്നു: ഏറ്റവും വലിയ ഗൾഫ് രാഷ്ട്രവും  ഏറ്റവും പ്രമുഖ ഗൾഫ് രാഷ്ട്രവുമായ സൗദി അറേബ്യ ഖത്തറിനെ പിന്തുണയ്ക്കുന്നത് ജിസിസി രാജ്യങ്ങൾ കൂടുതൽ ഐക്യമുന്നണി സ്വീകരിക്കുന്നതിന്റെ സൂചനയാണ്.

കാർലെ: ഇസ്രായേലും സൗദി അറേബ്യയും ഗൾഫിലെ മറ്റുള്ളവരും തമ്മിൽ ഒരു സമാധാന കരാർ ഉണ്ടായിട്ടുണ്ടാകാം, ഇനി ഇസ്രയേലുമായി കാര്യങ്ങൾ സാധാരണ നിലയിലാക്കാൻ ഗള്‍ഫ് രാജ്യങ്ങൾ സമ്മതിക്കാൻ സാധ്യത വളരെ കുറവാണ്. ഇസ്രായേൽ ഫലസ്തീനെ വെറും അവശിഷ്ടക്കൂമ്പാരമാക്കി മാറ്റുമ്പോൾ അവർക്ക് അതെങ്ങനെ സാധിക്കും?

പോൾ: അറബ് ലീഗിന്റെ അടിയന്തര സമ്മേളനവും ഇസ്രായേലുമായുള്ള നയതന്ത്ര ബന്ധം വിച്ഛേദിക്കാനുള്ള ശ്രമവുമായിരിക്കും ഇനി ഉണ്ടാകുക എന്നാണ് ഞാന്‍ കരുതുന്നത്.

ഇസ്രായേൽ  മധ്യസ്ഥരെ കൊല്ലാൻ ശ്രമിച്ചുകൊണ്ടിരിക്കുന്നു, വെടിനിർത്തൽ ചർച്ചകള്‍ ആരംഭിക്കുന്നത് ഗൗരവമായി എടുത്തിരുന്നോ?

ഗമാൽ: കഴിഞ്ഞ രണ്ട് വർഷത്തെ കാര്യങ്ങൾ പരിശോധിച്ചാൽ നെതന്യാഹു മധ്യസ്ഥ ചർച്ചകളിൽ നിന്ന് പിന്മാറുകയോ അവ അട്ടിമറിക്കുകയോ ചെയ്തിട്ടുണ്ടെന്ന് കാണാൻ കഴിയും. വെടിനിർത്തൽ ചർച്ചകളിൽ ഏർപ്പെടുമ്പോഴെല്ലാം  അത് തകർക്കുമെന്ന് ഭീഷണിപ്പെടുത്തി. സർക്കാർ തകർന്നാൽ നെതന്യാഹു ജയിലിലാകും, അതുകൊണ്ട് അദ്ദേഹത്തിന് തന്റെ സർക്കാർ തകരാൻ അനുവദിക്കാനാവില്ല.

ലിപ്നർ: ഹമാസ് അടിസ്ഥാനപരമായി തങ്ങളുടെ ആയുധങ്ങൾ കൈമാറാൻ ആഗ്രഹിക്കുന്നില്ലെന്ന് മാത്രമല്ല,  സ്ഥാനത്ത് തുടരാനാണ് ആഗ്രഹിക്കുന്നത്.ഗസ്സയില്‍ മറ്റൊരു സർക്കാർ നിലവിൽ വരുന്നതുവരെ ആക്രമണം നിർത്താൻ പോകുന്നില്ലെന്ന് ഇസ്രായേലും പറയുന്നു.

പോൾ: ഗസ്സയിലുള്ള ഇസ്രായേലിന്‍റെ സ്വന്തം ബന്ദികളെ പൂര്‍ണമായും വഞ്ചിക്കുന്നതിന് തുല്യമാണിത്. ഇവര്‍ക്ക് ഈ ചര്‍ച്ചകള്‍ മാത്രമാണ് മോചനത്തിനുള്ള ഏക മാര്‍ഗം. സ്വന്തം പൗരന്മാരേക്കാളും ഇസ്രായേലിന് സ്വന്തം മന്ത്രിസഭയും രാഷ്ട്രീയ താല്‍പര്യങ്ങളുമാണ് വലുത്.

മേഖലയിലെ ഏറ്റവും വലിയ യുഎസ് സൈനിക താവളമായ സെന്റ്കോമിന് ആതിഥേയത്വം വഹിക്കുന്നത് ഖത്തറാണ്, കൂടാതെ വാഷിംഗ്ടണിന്റെ ആശയവിനിമയത്തിനായി ഹമാസിന്റെ ഓഫീസും തുറന്നിട്ടിരിക്കുന്നു. ഈ രണ്ട് രാജ്യങ്ങൾക്കിടയിൽ ഇപ്പോൾ എത്രത്തോളം വിശ്വാസക്കുറവ് സംഭവിച്ചിട്ടുണ്ട്?

താഫർ: സുരക്ഷാ കാര്യത്തിൽ അമേരിക്കയേക്കാൾ മികച്ച ബദലില്ല. അതിനാൽ ഖത്തറിന് ഇത് ഒരുതരം കടങ്കഥയാണ്. ഒരു മധ്യസ്ഥനാകുക എന്നാല്‍  സമാധാന നിർമ്മാതാവാകുകയും വ്യത്യസ്ത സംഘർഷങ്ങളിൽ കരാറുകൾ ഉണ്ടാക്കാൻ കഴിയുകയും വേണം.  അവർ ഈ മധ്യസ്ഥ ചര്‍ച്ചയില്‍ പങ്ക് വഹിക്കുന്നതിൽ ഇനിയും തുടരണമോ ചോദ്യങ്ങള്‍ ഉയര്‍ന്നേക്കാം..

കാർലെ: ഞങ്ങളുടെ വ്യോമതാവളം അവരുടെ പ്രദേശത്താണ്, ഖത്തര്‍ ജനതയെ സംബന്ധിച്ചിടത്തോളം ഇത് വളരെ വിവാദപരമായിരുന്നു.  ഖത്തറും  അമേരിക്കയും തമ്മിലുള്ള ബന്ധത്തെ കൂടുതൽ വഷളാക്കും. പരസ്പരം സഹായം ആവശ്യമുള്ള സാഹചര്യത്തിലാണ് രണ്ടുപേരും.