ലോകത്തിലെ ഏറ്റവും വിലയേറിയ അഞ്ച് വസ്തുക്കൾ

ഏത് വസ്തുവിന്റെയും വിലയറിയാനുള്ള കൗതുകം നമുക്കുണ്ട്. വിലയേറിയ വസ്തുക്കളോട് ഭ്രമമുള്ള പലരുമുണ്ട്. ലോകത്തിലെ ഏറ്റവും വിലയേറിയ അഞ്ച് വസ്തുക്കൾ ഏതൊക്കെയാണെന്ന് പരിശോധിക്കാം.

5. എയർ ഫോഴ്‌സ് വൺ

ബിസിനസ് ഇൻസൈഡറിന്റെ റിപ്പോർട്ട് പ്രകാരം എയർഫോഴ്‌സ് വൺ എന്നറിയപ്പെടുന്ന യുഎസ് പ്രസിഡന്റിന്റെ യാത്രാ വിമാനമാണ് ലോകത്ത് ഏറ്റവും വിലയേറിയ അഞ്ചാമത്തെ വസ്തു. ഈ വിമാനത്തിന് വായുവിൽ ഇന്ധനം നിറയ്ക്കാനുള്ള സൗകര്യം, മെഡിക്കൽ ബേ തുടങ്ങിയ ഹൈടെക് സുരക്ഷാ സവിശേഷതകൾ ഉള്ളതിനാൽ 4 ബില്യൺ ഡോളറിലധികം വിലവരും(35,856.60 കോടി ഇന്ത്യൻ രൂപയാണ്). വൈറ്റ് ഹൗസ് മിലിട്ടറി ഓഫീസിന്റെ ഭാഗമായ പ്രസിഡൻഷ്യൽ എയർലിഫ്റ്റ് ഗ്രൂപ്പാണ് ഇത് പരിപാലിക്കുന്നതും പ്രവർത്തിപ്പിക്കുന്നതും.

4. ആന്റിലിയ

ഈ പട്ടികയിലും ഇന്ത്യക്കാർക്ക് അഭിമാനിക്കാൻ വകയുണ്ട്. ഫോർബ്‌സ് റിപ്പോർട്ട് പ്രകാരം ലോകത്തിലെ ഏറ്റവും ചെലവേറിയ വീടാണ് വിലയേറിയ പട്ടികയിൽ നാലാം സ്ഥാനത്ത്. ഏകദേശം 4.6 ബില്യൺ ഡോളർ (41,235.09 കോടി ഇന്ത്യൻ രൂപ) വിലമതിക്കുന്ന ഈ വീട് ഇന്ത്യൻ ശതകോടീശ്വരൻ മുകേഷ് അംബാനിയുടെ ഉടമസ്ഥതയിലുള്ളതാണ്. ഇന്ത്യയിലെ മുംബൈയിൽ സ്ഥിതി ചെയ്യുന്ന ഈ 27 നിലകളുള്ള വീട്ടിൽ ഒന്നിലധികം ഹെലിപാഡുകൾ, അമ്പത് പേർക്ക് ഇരിക്കാവുന്ന ഒരു ഹോം തിയേറ്റർ തുടങ്ങിയ ആഡംബര സൗകര്യങ്ങളുണ്ട്.

3. ഹിസ്റ്ററി സുപ്രിം യാച്ച്

ലോകത്തിലെ ഏറ്റവും ചെലവേറിയ യാച്ച് എന്ന പദവിയുള്ള സുപ്രിം യാച്ചാണ് ഏറ്റവും വിലയേറിയ മൂന്നാമത്തെ വസ്തു. ഏകദേശം 3 വർഷമെടുത്ത് സ്റ്റുവർട്ട് ഹ്യൂസ് ആണ് ഇത് രൂപകൽപ്പന ചെയ്തത്. ആർക്കിടെക്ചറൽ ഡൈജസ്റ്റ് പ്രകാരം ഇതിന്റെ ആകെ വില 4.8 ബില്യൺ ഡോളർ (43,027.92 കോടി ഇന്ത്യൻ രൂപ) ആണ്. ഉൽക്കാശിലകളുടെ ശകലങ്ങൾ, ടി-റെക്സ് അസ്ഥി അലങ്കാരം തുടങ്ങിയ അതുല്യമായ ഘടകങ്ങൾക്കൊപ്പം, ഹിസ്റ്ററി സുപ്രിം യാച്ചിൽ സ്വർണം പൂശിയിട്ടുമുണ്ട്.

2. ഹബിൾ ബഹിരാകാശ ദൂരദർശിനി

ലോകത്തിലെ ഏറ്റവും വിലയേറിയ രണ്ടാമത്തെ വസ്തു ഹബിൾ ബഹിരാകാശ ദൂരദർശിനിയാണ്. ഇത് രൂപകൽപ്പന ചെയ്ത് നിർമിച്ചത് 16 ബില്യൺ യുഎസ് ഡോളർ (1,43,426.40 കോടി ഇന്ത്യൻ രൂപ) ചെലവിലാണ്. 1990ൽ വിക്ഷേപിച്ച ഇത് ഇതുവരെ നിർമിച്ചതിൽ വച്ച് ഏറ്റവും ചെലവേറിയ ദൂരദർശിനി എന്ന റെക്കോർഡ് സ്വന്തമാക്കി.

1. അന്താരാഷ്ട്ര ബഹിരാകാശ നിലയം

ലോകത്തിലെ ഏറ്റവും ചെലവേറിയ വസ്തു അന്താരാഷ്ട്ര ബഹിരാകാശ നിലയമാണ്. 1984നും 1993നും ഇടയിൽ നാസ (യുഎസ്), റോസ്‌കോസ്‌മോസ് (റഷ്യ), ജാക്‌സ (ജപ്പാൻ), ഇഎസ്‌എ (യൂറോപ്പ്), സിഎസ്‌എ (കാനഡ) എന്നിവയുടെ സംയുക്ത സഹകരണത്തോടെ 150 ബില്യൺ ഡോളർ (13,44,622.50 കോടി ഇന്ത്യൻ രൂപ) ചെലവിൽ ഇത് രൂപകൽപ്പന ചെയ്‌തു. ബഹിരാകാശത്തെ ഏറ്റവും വലിയ മനുഷ്യനിർമിത വസ്തുവാണിത്. 2000 മുതൽ ഇത് സജീവമാണ്.