വാഷിങ്ടൺ: ഖത്തർ ഉൾപ്പെടെ മധ്യസ്ഥ രാജ്യങ്ങളുടെ ശക്തമായ ഇടപെടലിനെ തുടർന്ന് ചർച്ചക്ക് സന്നദ്ധത അറിയിച്ച് അമേരിക്കയും ഇറാനും. ഇറാന്റെ അഭ്യർഥന മുൻനിർത്തി ചർച്ചക്ക് തയാറാണെന്നും എന്നാൽ വെടിനിർത്തൽ കരാർ അവസാനിച്ചെന്നും അമേരിക്കൻ പ്രസിഡന്റ് ട്രംപ് പറഞ്ഞു. ഖത്തർ അമീറും പാക് പ്രധാനമന്ത്രിയുമാണ് സമവായ നീക്കങ്ങൾക്ക് ഊർജിതമായ ശ്രമം നടത്തുന്നത്.
മേഖലയിൽ സംഘർഷത്തിന് വഴിയൊരുക്കിയത് അമേരിക്കയും ഇസ്രായേലുമാണെന്ന് ഇറാൻ പ്രസിഡന്റ് മസൂദ് പെഷെസ്കിയാൻ പറഞ്ഞു. തന്നെ വധിക്കാൻ വർഷങ്ങളായി ഇറാന് പദ്ധതിയുണ്ടെന്നും അങ്ങനെ സംഭവിച്ചാൽ ഇറാന് മേൽ കനത്ത ആക്രമണം നടത്താൻ താൻ നിർദേശിച്ചതായും ട്രംപ് പറഞ്ഞു.
ഹോർമുസിൽ കപ്പൽ ഗതാഗതം ഇറാൻ പുനഃസ്ഥാപിച്ചു. സംഘർഷം അവസാനിച്ചെന്ന് കരുതിയ ഘട്ടത്തിലാണ് വെടിനിർത്തൽ അവസാനിച്ചെന്ന് ട്രംപ് പ്രഖ്യാപിച്ചിരിക്കുന്നത്. ചർച്ചക്ക് വീണ്ടും വഴിയൊരുങ്ങുന്നുണ്ടെങ്കിലും അതിന്റെ ഭാവി എന്താകുമെന്നത് സംബന്ധിച്ച് ആശങ്കയുണ്ട്. ചർച്ചയുടെ സ്ഥലവും സമയവും നിലവിൽ തീരുമാനിച്ചിട്ടില്ല. ഹോർമുസിലെ ഇറാന്റെ പരമാധികാരം അവസാനിപ്പിക്കണമെന്ന യുഎസ് നിബന്ധനയിൽ തട്ടിയാണ് ചർച്ചകൾ വഴിമുട്ടിയിരിക്കുന്നത്.