മുംബൈ: സ്വന്തമായൊരു കാർ പലരുടേയും സ്വപ്നമാണ്. ആറ്റു നോറ്റ് സമ്പാദ്യം സ്വരുക്കൂട്ടി കാർ വാങ്ങുന്ന പലർക്കും അമളി പറ്റാറുണ്ട്. അതുപോലെ തന്നെ കാർ വാങ്ങുന്നതിന് മുൻപ് കൃത്യമായ പ്ലാനിംഗ് ഇല്ലെങ്കിൽ കാറൊരു സാമ്പത്തിക ബാധ്യതയായി മാറിയേക്കാം. ആദ്യമായി കാർ വാങ്ങുന്നവരാണ് നിങ്ങളെങ്കിൽ താഴെ പറയുന്ന കാര്യങ്ങൾ ശ്രദ്ധിക്കണം.
1. കൃത്യമായ ബജറ്റ് നിശ്ചയിക്കുക
കാർ ഷോറൂമിലെ വിലയല്ല (Ex-showroom price), മറിച്ച് ഇൻഷുറൻസ്, രജിസ്ട്രേഷൻ, ആക്സസറികൾ എന്നിവ ഉൾപ്പെടെയുള്ള ഓൺ റോഡ് പ്രൈസാണ് നിങ്ങളുടെ ബജറ്റായി കണക്കാക്കേണ്ടത്. നിങ്ങളുടെ മാസവരുമാനത്തിന്റെ 15-20 ശതമാനത്തിൽ കൂടുതൽ കാർ ലോൺ തിരിച്ചടവിലേക്ക് മാറ്റിവെക്കാതിരിക്കാൻ ശ്രദ്ധിക്കുക.
2. നിങ്ങളുടെ ആവശ്യം തിരിച്ചറിയുക
എന്തിനാണ് നിങ്ങൾ കാർ വാങ്ങുന്നത് എന്നതിനെ സംബന്ധിച്ച് കൃത്യമായ ധാരണവേണം. ആവശ്യം അറിഞ്ഞു വേണം കാർ തെരഞ്ഞെടുക്കാൻ. നഗരയാത്രകൾക്കായാണ് കാർ വാങ്ങുന്നതെങ്കിൽ ഹാച്ച്ബാക്ക് അല്ലെങ്കിൽ ചെറിയ എസ്യുവികൾ (Compact SUVs) അനുയോജ്യമാണ്. വലിയ കുടുംബമാണ് കൂടുതൽ ലഗേജുകൾ കൊണ്ടുപോവാനോ ഉണ്ടെങ്കിൽ സെഡാനുകളോ വലിയ എസ്യുവികളോ തെരഞ്ഞെടുക്കാം. മോശം റോഡുകളിലൂടെയുള്ള യാത്രയാണെങ്കിൽ കൂടുതൽ ഗ്രൗണ്ട് ക്ലിയറൻസുള്ള വാഹനങ്ങൾ തെരഞ്ഞെടുക്കുക.
3. ഇന്ധനവും ട്രാൻസ്മിഷനും
ഉപയോഗം കുറവാണെങ്കിൽ പെട്രോൾ കാറുകളായിരിക്കും ലാഭകരം. ദിവസവും കൂടുതൽ ദൂരം സഞ്ചരിക്കാനുണ്ടെങ്കിൽ മാത്രം ഡീസൽ തെരഞ്ഞെടുക്കുക.കുറഞ്ഞ ചിലവിൽ യാത്ര ചെയ്യാൻ സിഎൻജിയും പരിസ്ഥിതി സൗഹൃദമായ നഗരയാത്രകൾക്ക് ഇലക്ട്രിക് വാഹനങ്ങളും (EV) മികച്ച ഓപ്ഷനുകളാണ്. തിരക്കേറിയ നഗരങ്ങളിൽ ഡ്രൈവിംഗ് എളുപ്പമാക്കാൻ ഓട്ടോമാറ്റിക് കാറുകൾ സഹായിക്കും.
4. സുരക്ഷയ്ക്ക് മുൻഗണന നൽകുക
വെറും ഗ്ലാമറിനും ആഡംബര ഫീച്ചറുകൾക്കും പിന്നാലെ പോകാതെ സുരക്ഷാ മാനദണ്ഡങ്ങൾ പരിശോധിക്കുക. എയർബാഗുകൾ, എബിഎസ് (ABS) വിത്ത് ഇബിഡി (EBD), ഇലക്ട്രോണിക് സ്റ്റെബിലിറ്റി കൺട്രോൾ, ക്രാഷ് ടെസ്റ്റ് റേറ്റിംഗ് എന്നിവയ്ക്ക് പ്രാധാന്യം നൽകണം. സൺറൂഫ് പോലുള്ള സൗകര്യങ്ങളേക്കാൾ റിവേഴ്സ് ക്യാമറ, പാർക്കിംഗ് സെൻസറുകൾ എന്നിവയ്ക്ക് മുൻഗണന നൽകുക.
5. സർവീസ് സൗകര്യങ്ങളും അറ്റകുറ്റപ്പണിയും
കാർ വാങ്ങിയാൽ മാത്രം പോരാ, അത് കൃത്യമായി സർവീസ് ചെയ്യാനുള്ള സൗകര്യം അടുത്തുണ്ടെന്ന് ഉറപ്പാക്കണം. സ്പെയർ പാർട്ടുകളുടെ ലഭ്യതയും വിലയും പരിശോധിക്കുക. സർവീസ് നെറ്റ്വർക്ക് കൂടുതലുള്ള ബ്രാൻഡുകൾ തെരഞ്ഞെടുക്കുന്നത് ഭാവിയിൽ ഗുണകരമാകും.
6. വിവിധ ഇടങ്ങളിൽ അന്വേഷിച്ച ശേഷം മാത്രം വാങ്ങുക
വിവിധ ഡീലർമാരിൽ നിന്ന് വില വിവരങ്ങൾ ശേഖരിക്കുക. എക്സ്ചേഞ്ച് ബോണസ്, കോർപ്പറേറ്റ് ഡിസ്കൗണ്ടുകൾ, ഇൻഷുറൻസ് ഓഫറുകൾ എന്നിവ പരിശോധിക്കുക. ധൃതിപ്പെട്ട് തീരുമാനമെടുക്കാതെ മോഡലുകൾ തമ്മിൽ താരതമ്യം ചെയ്ത ശേഷം മാത്രം അന്തിമ തീരുമാനമെടുക്കുക.