സ്വര്‍ണത്തിന് ഒരാഴ്ചയുണ്ടായത് 2400 രൂപയുടെ കുറവ്; ഇനി എങ്ങോട്ട് ?
രാജ്യാന്തര വിപണിയിലും സ്വര്‍ണത്തിന് നേരിയ വര്‍ധന രേഖപ്പെടുത്തി
Update: 2026-10-17 04:18 GMT
കൊച്ചി: ഒരാഴ്ചക്കിടെ കേരളത്തില്‍ സ്വര്‍ണവിലയിലുണ്ടായത് 2400 രൂപയുടെ ഇടിവ്. അമേരിക്കന്‍ ഫെഡറല്‍ റിസര്‍വ് പലിശകുറക്ക്, രൂപ-ഡോളര്‍ വിനിമയം, അന്താരാഷ്ട്ര വിപണിയിലെ ചാഞ്ചാട്ടങ്ങള്‍ എന്നിവയാണ് സ്വര്‍ണവിപണിയെ പ്രധാനമായും സ്വാധീനിച്ചത്. കേന്ദ്രബാങ്കുകളുടെ സമീപനം മുതല്‍ മറ്റ് നിരവധി ഘടകങ്ങള്‍ വരും ദിവസങ്ങളില്‍ കേരളത്തിലെ സ്വര്‍ണവിലയെ സ്വാധീനിക്കും.
പലിശനിരക്കില്‍ അനിശ്ചിതത്വം
ഒക്ടോബര് മാസത്തിലെ പലിശനിരക്കില്‍ യുഎസ് കേന്ദ്രബാങ്കായ ഫെഡറല്‍ റിസര്‍വ് എന്ത് മാറ്റം വരുത്തുമെന്ന കാര്യം ഇപ്പോഴും പ്രവചിക്കാന്‍ കഴിയാത്ത അവസ്ഥയിലാണ്. ചെയര്‍മാന്‍ കെവിന്‍ വാര്‍ഷ് ഒക്ടോബര് 16-ന് ബാങ്കോക്കില്‍ നടന്ന അന്താരാഷ്ട്ര നാണയനിധി-ലോകബാങ്ക് യോഗങ്ങള്‍ക്കിടയിലെ ചര്‍ച്ചയില്‍, ഓരോ നയയോഗത്തെയും അതത് സാഹചര്യങ്ങളുടെ അടിസ്ഥാനത്തില്‍ വിലയിരുത്തണമെന്നാണ് വ്യക്തമാക്കിയത്. വിലസ്ഥിരത ഉറപ്പാക്കുക ഫെഡിന്റെ വ്യക്തമായ പ്രതിബദ്ധതയാണെന്നും വര്‍ഷാവസാനത്തേക്കുള്ള നയതീരുമാനങ്ങള്‍ മുന്‍കൂട്ടി പ്രഖ്യാപിക്കാനാവില്ലെന്നും അദ്ദേഹം സൂചിപ്പിച്ചു.
ഒക്ടോബര് 27-28 തീയതികളിലെ ഫെഡ് യോഗത്തിലും ഡിസംബറിലെ യോഗത്തിലും ലഭിക്കുന്ന സാമ്പത്തിക വിവരങ്ങള്‍ നയദിശ വ്യക്തമാക്കുന്നതില്‍ പ്രധാനമാകും. പലിശ നിരക്കില്‍ ഒക്‌ടോബറിലും ഡിസംബറിലും ഫെഡറല്‍ റിസര്‍വ് ഏത് രീതിയില്‍ മുന്നോട്ട് പോകുമെന്ന സൂചനകള്‍ ലഭിച്ചാല്‍ അത് സ്വര്‍ണവിപണിയേയും സ്വാധീനിക്കും. നിരക്ക് ഉയര്‍ത്താനാണ് ഫെഡറല്‍ റിസര്‍വ് തീരുമാനമെങ്കില്‍ സ്വര്‍ണവില ഇടിവിലേക്ക് അത് നയിക്കും.
ഡോളര്‍-രൂപ വിനിമയ നിരക്കും നിര്‍ണായകം
ഡോളറിനെതിരെ രൂപ കരുത്താര്‍ജിക്കുന്നതും സ്വര്‍ണവിപണിയെ സ്വാധീനിക്കുന്നുണ്ട്. ഒക്ടോബര് ഒമ്പതിന് രൂപക്കെതിരെ ഡോളര്‍ 96.73 എന്ന നിലവാരത്തിലായിരുന്നു. റിസര്‍വ് ബാങ്കിന്റെ നടപടികള്‍ക്കൊടുവില്‍ ഡോളറിനെതിരെ രൂപ മെച്ചപ്പെട്ടിട്ടുണ്ട്. നിലവില്‍ 94.96ലാണ് രൂപയുടെ വിനിമയം നടക്കുന്നത്. ഒരാഴ്ചക്കിടെ ശ്രദ്ധേയമായ മുന്നേറ്റമാണ് രൂപ നടത്തിയത്. രൂപ മുന്നേറുന്നത് ഇറക്കുമതി ചെലവിലെ സമ്മര്‍ദം കുറക്കാന്‍ സഹായകമാകും. ഇത് സ്വര്‍ണത്തിന്റെ വിലയെ സ്വാധീനിക്കാന്‍ ശേഷിയുള്ള ഘടകമാണ്.
സ്വര്‍ണത്തിന് സമ്മര്‍ദം
സ്വര്‍ണത്തിന്റെ അന്താരാഷ്ട്ര വിലകളില്‍ സമ്മര്‍ദം നേരിടുന്നുണ്ട്. ഒക്ടോബര് 9ന് അന്താരാഷ്ട്ര വിപണിയില്‍ സ്വര്‍ണം ഔണ്‍സിന് ഏകദേശം 4,200 ഡോളറിലെത്തിയിരുന്നു എങ്കിലും ഒരു ഘട്ടത്തില്‍ 4079 ഡോളര്‍ വരെ കുറഞ്ഞിരുന്നു. ഒക്ടോബര് 16ലെ വില ഏകദേശം 4,173 ഡോളറിലാണ്. സ്വര്‍ണത്തിന് അന്താരാഷ്ട്ര വിപണിയില്‍ ചെറിയ സമ്മര്‍ദം നേരിടുന്നുണ്ട്. ഇത് സ്വാഭാവികമായും കേരളത്തിലെ സ്വര്‍ണവിലയേയും സ്വാധീനിക്കുന്നു.
സ്വര്‍ണവില എങ്ങോട്ട്?
ഒക്ടോബര് 27-28-ലെ ഫെഡ് യോഗത്തിന് മുമ്പുള്ള പണപ്പെരുപ്പം, തൊഴില്‍വിപണി, സാമ്പത്തിക വളര്‍ച്ച എന്നിവ സംബന്ധിച്ച വിവരങ്ങളും ഡിസംബറിലെ നയസൂചനകളും സ്വര്‍ണവിപണിയുടെ അടുത്ത നീക്കങ്ങളെ സ്വാധീനിക്കും. പലിശനിരക്ക് ഉയര്‍ന്ന നിലയില്‍ തുടരുകയോ ഡോളര്‍ ശക്തിപ്പെടുകയോ ചെയ്താല്‍ സ്വര്‍ണത്തിന് കൂടുതല്‍ സമ്മര്‍ദമുണ്ടാകാം. മറുവശത്ത്, പലിശനിരക്ക് കുറയുമെന്ന പ്രതീക്ഷ ശക്തിപ്പെടുകയോ ഭൗമരാഷ്ട്രീയ അനിശ്ചിതത്വം വര്‍ധിക്കുകയോ ചെയ്താല്‍ സ്വര്‍ണത്തിന് പിന്തുണ ലഭിക്കാം.രൂപയുടെ വിനിമയനിരക്ക്, ക്രൂഡ് ഓയില്‍ വില, കേന്ദ്രബാങ്കുകളുടെ സ്വര്‍ണവാങ്ങല്‍, ആഗോള നിക്ഷേപകരുടെ സുരക്ഷിത നിക്ഷേപങ്ങളോടുള്ള താല്‍പര്യം എന്നിവയും നിര്‍ണായകമാണ്. അതിനാല്‍ കേരളത്തില്‍ സ്വര്‍ണവില ഇനിയും കുറയുമെന്നോ ഉടന്‍ ഉയരുമെന്നോ ഉറപ്പിച്ച് പ്രവചിക്കാനാവില്ല.