പ്രഭാസിന്‍റെ ആരോഗ്യനില മോശം; ഷൂട്ടിംഗ് താല്‍കാലികമായി നിര്‍ത്തി

ഹൈദരാബാദ്: പ്രഭാസ് ആരാധകര്‍ ആകാംക്ഷയോടെ കാത്തിരിക്കുന്ന ചിത്രങ്ങളാണ് ആദിപുരുഷ്,സലാര്‍,പ്രോജക്ട് കെ എന്നിവ. എന്നാല്‍ ഈ ചിത്രങ്ങളുടെ റിലീസ് ഇനിയും നീണ്ടുപോകുമെന്നാണ് സൂചന. പ്രഭാസിന്‍റെ ആരോഗ്യനില മോശമായതു മൂലം ഷൂട്ടിംഗ് താല്‍ക്കാലികമായി നിര്‍ത്തിവച്ചിരിക്കുകയാണെന്നാണ് റിപ്പോര്‍ട്ട്.

ഫെബ്രുവരിയിലെ റിപ്പോർട്ടുകൾ പ്രകാരം ഹൈ ടെംപറേച്ചര്‍ കാരണം തന്‍റെ സിനിമാ ഷൂട്ടുകൾ റദ്ദാക്കിയിരിക്കുകയാണ്. എന്നാൽ പൂർണമായി സുഖം പ്രാപിക്കാത്തതിനെ തുടര്‍ന്ന് ചികിത്സയ്ക്കായി വിദേശത്തേക്ക് പോകേണ്ടി വന്നതായും റിപ്പോർട്ടുണ്ട്.പ്രഭാസിന്‍റെ ഫിറ്റ്‌നസിനെക്കുറിച്ച് നേരത്തെയും ആരാധകര്‍ സംശയം പ്രകടിപ്പിച്ചിരുന്നു. ഒന്നിലധികം പ്രോജക്ടുകളിൽ തുടർച്ചയായി പ്രവർത്തിക്കുന്ന താരം  ഏറെ നാളായി ഇടവേള എടുത്തിട്ടില്ലായിരുന്നു. ജോലിത്തിരക്ക് കാരണം പ്രഭാസിന്‍റെ ആരോഗ്യം മോശമായെന്നാണ് റിപ്പോര്‍ട്ട്. അതേസമയം ജൂൺ 16ന് അദ്ദേഹത്തിന്റെ ആദിപുരുഷ് റിലീസ് ചെയ്യുമെന്നാണ് വിവരം. ടീസറിന് മോശം പ്രതികരണം ലഭിച്ചതിന് പിന്നാലെ ചിത്രത്തിന്‍റെ റിലീസ് നീട്ടിവയ്ക്കുകയായിരുന്നു.