ബിസിനസ് വാഗ്ദാനം നല്‍കി സുഹൃത്ത് വഞ്ചിച്ചു; മനോജിന് നഷ്ടമായത് സമ്പാദ്യം മുഴുവന്‍

13 വർഷത്തെ പ്രവാസ ജീവിതത്തിന്റെ സമ്പാദ്യമായ കിടപ്പാടം എപ്പോൾ വേണമെങ്കിലും ബാങ്ക്​ ജപ്തി ചെയ്യാവുന്ന സ്ഥിതിയിലാണ്​. മസ്കത്തിലും നാട്ടിലുമായി ഏകദേശം അറുപത്​ ലക്ഷത്തോളം രൂപയുടെ ബാധ്യതയാണ്​ മനോജിന്​ ഇപ്പോഴുള്ളത്​.

നാട്ടിൽ നിന്ന്​ ഗൾഫിലേക്ക്​ പഴം, പച്ചക്കറി കയറ്റുമതി കച്ചവടം തുടങ്ങാമെന്ന സുഹൃത്തിന്റെ വാഗ്ദാനം വിശ്വസിച്ചതു മൂലം ​ തിരുവനന്തപുരം ചെമ്പഴന്തി സ്വദേശി മനോജിന് നഷ്ടമായത് ലക്ഷങ്ങള്‍. 13 വർഷത്തെ പ്രവാസ ജീവിതത്തിന്റെ സമ്പാദ്യമായ കിടപ്പാടം എപ്പോൾ വേണമെങ്കിലും ബാങ്ക്​ ജപ്തി ചെയ്യാവുന്ന സ്ഥിതിയിലാണ്​. മസ്കത്തിലും നാട്ടിലുമായി ഏകദേശം അറുപത്​ ലക്ഷത്തോളം രൂപയുടെ ബാധ്യതയാണ്​ മനോജിന്​ ഇപ്പോഴുള്ളത്​.

കയറ്റുമതി ബിസിനസ്​ തുടങ്ങാൻ അമ്പത്​ ലക്ഷം രൂപ ചെലവുവരുമെന്നാണ്​ ദീപു മനോജിനോട്​ പറഞ്ഞത്​. വായ്പക്ക്​ ബാങ്കിനെ സമീപിച്ചെങ്കിലും മുമ്പ്​ ഭവനവായ്പാ തിരിച്ചടവിൽ മുടക്കം വരുത്തിയിരുന്നതിനാൽ മനോജിന്​ വായ്പ ലഭിച്ചില്ല. ഇതേ തുടർന്ന്​ വീടും സ്ഥലവും ദുബൈയിൽ ജോലി ചെയ്യുന്ന ​ഐശ്വര്യയുടെ പേരിൽ എഴുതി കൊടുത്തു. തുടർന്ന്​ ഈ കരാർ കാട്ടി ​ഐ.ഡി.ബി.ഐ ബാങ്കിൽ നിന്ന് 2014 നവംബറിൽ​ 48 ലക്ഷം രൂപയുടെ പർച്ചേഴ്സ്​ വായ്പയെടുക്കുകയായിരുന്നു. ബാങ്ക്​ വായ്പ അടച്ചുതീർന്നാൽ സ്ഥലം തിരിച്ച്​ എഴുതി നൽകാമെന്നായിരുന്നു ഇവർ തമ്മിലെ ധാരണ. മനോജ്​ ഈ സമയം പഴം, പച്ചക്കറി വിപണനം ചെയ്യുന്ന സ്ഥാപനത്തിൽ ജോലി ചെയ്യുകയായിരുന്നു. ഇതിനിടെ ബിസിനസ്​ തുടങ്ങാനെന്ന്​ പറഞ്ഞ്​ ഒമാനിലെത്തിയ ദീപു ഉള്ളി ഇറക്കുമതി ചെയ്തുതരാമെന്ന്​ വിശ്വസിപ്പിച്ച്​ മനോജിന്റെ സ്പോൺസറെ കൊണ്ട്​ ആറായിരം റിയാൽ തിരുവനന്തപുരത്തെ കയറ്റുമതിക്കാര്‍ക്കു അയച്ചു കൊടുപ്പിക്കുകയും ചെയ്തു. ഇത്​ കബളിപ്പിക്കലാണെന്ന്​ ബോധ്യമായതോടെ മനോജിനെ ജോലിയിൽ നിന്ന്​ പറഞ്ഞുവിടുകയായിരുന്നു. പാസ്പോർട്ട്​ വിട്ടു​കൊടുക്കാനും സ്പോൺസർ ഇതുവരെ തയാറായിട്ടില്ല. നിയമ നടപടികൾക്കായി നാട്ടിൽ പോകണമെന്ന ആഗ്രഹത്തിന്​ പാസ്​പോർട്ട്​ ഇല്ലാത്തത്​ കുരുക്കാകുന്നതിന്റെ വേദനയിലാണ്​ ഈ യുവാവ്​. ദീപുവും ഭാര്യ ​ഐശ്വര്യയും അടക്കമുള്ളവർക്കെതിരെ മനോജിന്റെ ഭാര്യ കഴക്കൂട്ടം പൊലീസിൽ പരാതി നൽകിയിട്ടുണ്ട്​.