അലഞ്ഞു തിരിഞ്ഞ് നടക്കേണ്ട..; ഹാഇലിൽ വഴികാട്ടാൻ ഇനി ടൂറിസ്റ്റ് ​ഗൈഡുകൾ

റിയാദ്: സൗദിയിലെ സാംസ്കാരിക ടൂറിസം കേന്ദ്രമായ ​ഹാഇൽ പ്രവിശ്യയിൽ സന്ദർശകർക്ക് സമ​ഗ്രമായ ടൂറിസ്റ്റ് ​ഗൈഡുകളുടെ സേവനമൊരുക്കി മുനിസിപ്പാലിറ്റി. സന്ദർശകർക്ക് വിശദമായ വിവരങ്ങളും സഹായവും നൽകാൻ പ്രത്യേക പരിശീലനം ലഭിച്ച ടൂറിസ്റ്റ് ഗൈഡുകളെയാണ് വിന്യസിക്കുക. രാജ്യത്തിനകത്തും പുറത്തുമുള്ള സന്ദർശകർക്ക് 500-ലധികം സ്ഥലങ്ങളിലായി ഈ സേവനം ലഭ്യമാകും.

പൈതൃക കേന്ദ്രങ്ങൾക്കൊപ്പം വിനോദ പാർക്കുകൾ, റിസർവുകൾ, ഷോപ്പിങ് കേന്ദ്രങ്ങൾ, റിസോർട്ടുകൾ, റെസ്റ്റോറന്റുകൾ, കഫേകൾ, ആശുപത്രികൾ, കായിക സൗകര്യങ്ങൾ തുടങ്ങിയവയും ടൂറിസ്റ്റ് ​ഗൈഡിൽ ഉൾപ്പെടുത്തിയിട്ടുണ്ട്. സന്ദർശകർക്ക് യാത്ര മുൻകൂട്ടി ആസൂത്രണം ചെയ്യാൻ ഇത് സഹായകമാകും. ലക്ഷ്യസ്ഥാനങ്ങളിലേക്കുള്ള പ്രവേശനം എളുപ്പമാക്കുകയും വൈവിധ്യമാർന്ന അനുഭവങ്ങൾ ആസ്വദിക്കാൻ അവസരമൊരുക്കുകയും ചെയ്യും. ഹാഇൽ മേഖലയുടെ ടൂറിസ വികസനത്തിനും സന്ദർശക സൗകര്യങ്ങൾ മെച്ചപ്പെടുത്തുന്നതിനുമുള്ള ഏറ്റവും പുതിയ നടപടിയായാണ് ഈ സമഗ്ര ടൂറിസ്റ്റ് ഗൈഡിനെ കണക്കാക്കുന്നത്.