ദുബൈ: എണ്ണ, എണ്ണയിതര മേഖലയിൽ വൻകുതിപ്പുമായി യുഎഇ. പ്രതികൂല സാഹചര്യങ്ങളിലും മൊത്തം ആഭ്യന്തര ഉൽപാദന വളർച്ചയിൽ മികവ് പുലർത്താനും യുഎഇക്കായി. വിവിധ സാമ്പത്തിക ഏജൻസികൾ തയാറാക്കിയ റിപ്പോർട്ടുകളിലാണ് ഇക്കാര്യം വിശദീകരിക്കുന്നത്.
എണ്ണ, എണ്ണയിതര രംഗങ്ങളിൽ ഒരുപോലെ കുതിക്കാൻ യുഎഇക്ക് സാധിക്കുന്നതാണ് വളർച്ചയ്ക്ക് വേഗത നൽകുന്ന പ്രധാന ഘടകം. ഏറ്റവും പുതിയ സാമ്പത്തിക റിപ്പോർട്ടുകളും ഇതിന് അടിവരയിടുന്നു. ആഗോളതലത്തിലെ പണപ്പെരുപ്പം, എണ്ണ ഉൽപാദനം വെട്ടിക്കുറച്ച നടപടി എന്നിവയൊന്നും യുഎഇ സമ്പദ് ഘടനയ്ക്ക് തിരിച്ചടിയായില്ല.
നടപ്പുവർഷം എണ്ണയിതര മേഖലയിൽ ആറു ശതമാനം വളർച്ച കൈവരിക്കാൻ യുഎഇക്ക് സാധിക്കുമെന്ന് ആഗോള റേറ്റിങ് ഏജൻസിയായ എസ് ആന്റ് പിയുടെ റിപ്പോർട്ട് പറയുന്നു. യുഎഇ ബാങ്കുകളുടെ ആസ്തികളിലും വർധന തുടരുകയാണ്. യുഎഇ ഉൾപ്പെടെ പ്രധാന ജിസിസി രാജ്യങ്ങളുടെ മൊത്തം ആഭ്യന്തര ഉൽപാദനത്തിൽ വലിയ മുന്നേറ്റം ഉണ്ടാകുമെന്ന് യുബിഎസ് ഗ്ലോബൽ വെൽത്ത് മാനേജ്മെന്റ് റിപ്പോർട്ടും ചൂണ്ടിക്കാട്ടി.
നടപ്പു വർഷം മുതൽ അടുത്ത അഞ്ചു വർഷത്തിനകം ഗൾഫ് രാജ്യങ്ങളുടെ മൊത്തം ആഭ്യന്തര ഉൽപാദന വളർച്ചയിൽ റിക്കാർഡ് വർധനയാണ് പ്രതീക്ഷിക്കുന്നത്. അതേസമയം ഉയർന്ന പലിശനിരക്ക് ഗൾഫ് ബാങ്കുകൾക്ക് വെല്ലുവിളിയാണെന്നും വിവിധ സാമ്പത്തിക ഏജൻസികളുടെ റിപ്പോർട്ട് ഓർമിപ്പിക്കുന്നു.