യു.എ.ഇയിൽ ഇന്ധനവില കുറയും; 4 മാസത്തിനിടയിലെ കുറഞ്ഞ വിലയിലേക്ക്

 യു.എ.ഇയിൽ നാളെ മുതൽ ഇന്ധനവില കുറയും. പെട്രോൾ ലിറ്ററിന് 21 ഫിൽസ് കുറയുമ്പോൾ, ഡീസൽ വിലയിൽ 23 ഫിൽസിന്റെ കുറവുണ്ടാകും.

കഴിഞ്ഞ നാലുമാസത്തിനിടയിലെ ഏറ്റവും കുറഞ്ഞ ഇന്ധനവിലയാണ് ജൂൺ ഒന്ന് മുതൽ യു എ ഇയിൽ നിലവിൽ വരുന്നത്. 3 ദിർഹം 16 ഫിൽസ് വിലയുണ്ടായിരുന്ന സൂപ്പർ പെട്രോളിന്റെ വില 2 ദിർഹം 95 ഫിൽസായി കുറയും. സ്പെഷ്യൽ പെട്രോളിന്റെ വില 3 ദിർഹം 05 ഫിൽസിൽ നിന്ന് 2 ദിർഹം 84 ഫിൽസായി. ഇ-പ്ലസിന് 2 ദിർഹം 76 ഫിൽസാണ് പുതുക്കിയ നിരക്ക്. കഴിഞ്ഞമാസം 2 ദിർഹം 97 ഫിൽസായിരുന്നു വില. ഡീസല്‍വില 2 ദിർഹം 91 ഫിൽസിൽ നിന്ന് 2 ദിർഹം 68 ഫിൽസായും കുറഞ്ഞിട്ടുണ്ട്.

അന്താരാഷ്ട്ര ക്രൂഡ് ഓയിൽ നിരക്കിന് അനുസൃതമായി ഊർജമന്ത്രാലയമാണ് യു.എ.ഇയിൽ എല്ലാ മാസവും രാജ്യത്തെ എണ്ണവില നിശ്ചയിക്കുന്നത്. ഇന്ധന വിലയ്ക്ക് അനുസൃതമായി വിവിധ എമിറേറ്റുകളില്‍ ടാക്‌സി, ബസ് നിരക്കിലും മാറ്റം വരാറുണ്ട്.