രാജ്യത്ത്​​ താമസിക്കുന്ന പ്രവാസികളായ അമുസ്ലിങ്ങൾക്ക്​ വ്യക്തിനിയമം അനുവദിച്ച്​ യു.എ.ഇ

രാജ്യത്ത്​​ താമസിക്കുന്ന പ്രവാസികളായ അമുസ്ലിങ്ങൾക്ക്​ വ്യക്തിനിയമം അനുവദിച്ച്​ യു.എ.ഇ. വിവാഹം, വിവാഹമോചനം, കുട്ടികളുടെ സംരക്ഷണം, അനന്തരാവകാശം എന്നീ വിഷയങ്ങളിൽ വ്യക്തിഗത പദവി അനുവദിക്കുന്ന ഫെഡറൽ നിയമം അടുത്ത വർഷം ഫെബ്രുവരി മുതൽ​ നിലവിൽ വരും.

യു.എ.ഇയിൽ താമസിക്കുന്ന അമുസ്​ലിംകൾക്ക്​ ഏറെ ഉപകരിക്കുന്നതാകും പുതിയ തീരുമാനം. വിവാഹകരാറുകൾ നിയമപരമാക്കാനും കോടതിക്ക്​ മുമ്പിൽ ഹാജരായി വിവാഹമോചനം തേടാനും പുതിയ നിയമത്തിലൂടെ സാധ്യമാകും. വിവാഹ മോചനാനന്തരമുള്ള സാമ്പത്തിക തർക്കങ്ങൾ, കുട്ടികളുടെ സംരക്ഷണം, അനന്തരാവകാശം എന്നിവയിലെല്ലാം അന്താരാഷ്​രട മാനദണ്ഡങ്ങൾ പ്രകാരമാണ്​ കോടതികൾ വിധി പ്രസ്താവിക്കുക. 2021 നവംബർ മുതൽ അബൂദബി എമിറേറ്റിൽ നടപ്പിലാക്കിയ നിയമമാണ്​ ഫെബ്രുവരി മുതൽ രാജ്യത്തെ ഫെഡറൽ നിമമായി മാറുന്നത്​.

ലോകമെമ്പാടുമുള്ള പ്രതിഭകളെ ആകർഷിക്കുന്നതിന്​ ഏർപ്പെടുത്തിയ വിവിധ നടപടികളുടെ ഭാഗമായും നിയമസംവിധാനം അന്താരാഷ്ട്ര നിലവാരത്തിലേക്ക്​ ഉയർത്തുന്നതിനുമാണ്​ പരിഷ്കരണം . അതേസമയം ഈ നിയമമല്ലാത്ത രാജ്യം അംഗീകരിച്ച മറ്റു നിയമങ്ങളിലെ വ്യവസ്ഥകളനുസരിച്ചും വ്യക്​തി, കുടുംബ കാര്യങ്ങളിൽ തീർപ്പിലെത്താൻ അനുവാദം ലഭിക്കും.