ഗസ്സയ്ക്ക് യുഎഇയുടെ കൈത്താങ്ങ്: ഇസ്രായേൽ ആക്രമണത്തിൽ തകർന്ന ആശുപത്രികളിലേക്ക് 12 ടൺ മരുന്നുകൾ എത്തിച്ചു

ദുബൈ: ഇസ്രായേൽ ആക്രമണത്തിൽ തകർന്ന ഗസ്സയിലെ ആശുപത്രികളിലേക്ക് യു.എ.ഇ 12 ടൺ മരുന്നുകൾ എത്തിച്ചു. റാസൽഖൈമയിലെ ജുൾഫാർ ഫാർമസ്യൂട്ടിക്കൽസ് ആണ് ഇത്രയും മരുന്നുകൾ ഗസയിലെത്തിച്ചത്. ഗസ്സക്കായി യു.എ.ഇ തുടരുന്ന ജീവകാരുണ്യപ്രവർത്തനങ്ങളുടെ തുടർച്ചയാണ് മരുന്നും അടിസ്ഥാന സൗകര്യങ്ങളും ഇല്ലാതെ വലയുന്ന ഗസ്സയിലെ ആശുപത്രിയിലേക്ക് മരുന്നുകൾ എത്തിച്ചത്. ഇസ്രായേൽ ബോംബിട്ട് തകർത്ത ഗസ്സയുടെ ആരോഗ്യമേഖലക്ക് കൈത്താങ്ങാകാനുള്ള ശ്രമങ്ങളുടെ ഭാഗമായാണ് ആന്റിബയോട്ടിക്കുകളും, വേദനസംഹാരികളും, പരിക്കേറ്റവരുടെ ചർമ ചികിൽസക്ക് ആവശ്യമായ മരുന്നുകളും ഗസ്സയിലേക്ക് അയച്ചത്. യു.എ.ഇ ഗസ്സയിലെ ജനതക്കൊപ്പമാണെന്ന പ്രഖ്യാപനത്തിന്റെ ഭാഗമായാണ് ഈ ഉദ്യമമെന്ന് യു.എ.ഇ ഔദ്യോഗിക വാർത്താ ഏജൻസി റിപ്പോർട്ട് ചെയ്തു.