കഠിനമായ വെയിലിൽ തളർന്നു വരുമ്പോൾ വഴിയോരത്തെ കടകളില് നിന്ന് ഒരു ഗ്ലാസ് കരിമ്പിൻ ജ്യൂസ് കുടിച്ചാല് കിട്ടുന്ന ആശ്വാസം ചെറുതല്ല. ഇരുമ്പും കാൽസ്യവും ആന്റിഓക്സിഡന്റുകളും നിറഞ്ഞ ഈ മധുരപാനീയം വെറുമൊരു ദാഹശമനി മാത്രമല്ല, ആയുർവേദ പ്രകാരം ശരീരത്തെ തണുപ്പിക്കാനുള്ള പ്രകൃതിദത്ത ഔഷധം കൂടിയാണ്. ഗുണങ്ങൾ ഉണ്ടെങ്കിലും, ഈ ജനപ്രിയ വേനൽക്കാല പാനീയം എല്ലാവർക്കും അനുയോജ്യമല്ല. ഈ വേനൽക്കാലത്ത് കരിമ്പിൻ ജ്യൂസ് കുടിക്കും മുൻപ് നിങ്ങൾ അറിഞ്ഞിരിക്കേണ്ട ചില ആരോഗ്യ സത്യങ്ങളുണ്ട്. പ്രമേഹരോഗികള്,ദഹനപ്രശ്നങ്ങളുള്ളവര്,ദന്ത രോഗങ്ങളുള്ളവര് തുടങ്ങി ആറ് ആരോഗ്യപ്രശ്നങ്ങളുള്ളവര്ക്ക് കരിമ്പിൻ ജ്യൂസ് കുടിക്കുന്നതിന് മുന്പ് ഒന്ന് ആലോചിക്കണം..
പ്രമേഹരോഗികൾ
പ്രമേഹരോഗിയാണ് നിങ്ങളെങ്കില്, കരിമ്പിൻ ജ്യൂസ് ഒട്ടും അനുയോജ്യമായ പാനീയമല്ല. കരിമ്പിൻ ജ്യൂസ് പ്രകൃതിദത്തവും കൃത്രിമമായി സംസ്കരിക്കപ്പെടാത്തതുമാണെങ്കിലും, ഇതിൽ അടങ്ങിയിരിക്കുന്ന പഞ്ചസാരയുടെ അളവ് വളരെ കൂടുതലാണ്. ഇത് രക്തത്തിലെ ഗ്ലൂക്കോസിന്റെ അളവ് പെട്ടെന്ന് വർധിപ്പിക്കാൻ കാരണമാകും. ടൈപ്പ്-1, ടൈപ്പ്-2 പ്രമേഹമുള്ളവരിൽ രക്തത്തിലെ പഞ്ചസാരയുടെ അളവ് കൃത്യമായി നിലനിർത്തുന്നത് ഇത് പ്രയാസകരമാക്കും. അതിനാൽ, പഞ്ചസാരയുടെ അളവ് പെട്ടെന്ന് വർധിക്കുന്നത് ഒഴിവാക്കാൻ ഒഴിവാക്കാൻ കരിമ്പിൻ ജ്യൂസ് ഒഴിവാക്കുന്നതാണ് നല്ലത്.
അമിതഭാരമുള്ളവര്
കരിമ്പിൻ ജ്യൂസിൽ കലോറിയും പ്രകൃതിദത്ത മധുരവും ഉയർന്ന അളവിൽ അടങ്ങിയിട്ടുണ്ട്. അതിനാൽ ഇത് പതിവായി കുടിക്കുന്നത് ശരീരഭാരം വർധിക്കാൻ കാരണമായേക്കാം. ഭാരം കുറയ്ക്കാൻ ആഗ്രഹിക്കുന്നവരോ അല്ലെങ്കിൽ കൃത്യമായ ശരീരഭാരം നിലനിർത്താൻ ശ്രമിക്കുന്നവരോ കരിമ്പിൻ ജ്യൂസ് അമിതമായി ഉപയോഗിക്കുന്നത് ഗുണത്തേക്കാളേറെ ദോഷം ചെയ്യും. നിർജ്ജലീകരണം തടയാൻ സഹായിക്കുമെങ്കിലും, നിങ്ങളുടെ ഡയറ്റിൽ അനാവശ്യമായ കലോറികൾ കൂട്ടിച്ചേർക്കാൻ മാത്രമേ ഇത് സഹായിക്കൂ.
പ്രതിരോധശേഷി കുറഞ്ഞവർ
പുതുതായി അടിച്ചെടുത്ത കരിമ്പിൻ ജ്യൂസ് പോഷകസമൃദ്ധമാണ്, എന്നാൽ അത് വൃത്തിഹീനമായ സാഹചര്യങ്ങളിലാണ് തയ്യാറാക്കുന്നതെങ്കിൽ ബാക്ടീരിയകളുടെയും മറ്റ് രോഗാണക്കളുടെയും സാന്നിധ്യമുണ്ടാകാൻ സാധ്യതയുണ്ട്. മറ്റെന്തെങ്കിലും രോഗം വന്ന് ഭേദമായിക്കൊണ്ടിരിക്കുന്നവര്, പ്രായമായവർ തുടങ്ങി പ്രതിരോധശേഷി കുറഞ്ഞവർ ശുചിത്വം ഉറപ്പില്ലാത്ത ഇടങ്ങളിൽ നിന്നുള്ള കരിമ്പിൻ ജ്യൂസ് കുടിക്കുന്നത് ഒഴിവാക്കണം. മലിനമായ ജ്യൂസ് വയറിളക്കം പോലുള്ള അണുബാധകൾക്കും മറ്റ് ആരോഗ്യപ്രശ്നങ്ങൾക്കും കാരണമായേക്കാം.
കരൾ സംബന്ധമായ അസുഖമുള്ളവർ
ആയുർവേദമടക്കമുള്ള പരമ്പരാഗത രീതികളിൽ കരിമ്പിൻ ജ്യൂസ് തണുപ്പേകുന്ന പാനീയമായി കരുതുന്നുണ്ടെങ്കിലും, കരളുമായി ബന്ധപ്പെട്ട രോഗങ്ങളുള്ളവർ ഇത് കുടിക്കുമ്പോൾ ജാഗ്രത പാലിക്കണം. മഞ്ഞപ്പിത്തം പോലുള്ള കരൾ രോഗമുള്ളപ്പോൾ ഇത് കുടിക്കുന്നത് നല്ലതല്ല. ഉയർന്ന അളവിൽ പഞ്ചസാര അടങ്ങിയിരിക്കുന്നതിനാൽ, തകരാറിലായ കരളിന് അധിക സമ്മർദ്ദം അനുഭവപ്പെടാം, ഇത് ജ്യൂസ് പതിവായി കഴിക്കുന്നത് ഫാറ്റി ലിവർ അല്ലെങ്കിൽ മഞ്ഞപ്പിത്തം പോലുള്ള അവസ്ഥകളെ കൂടുതൽ വഷളാക്കും.
പല്ലിന് പ്രശ്നമുള്ളവര്
കരിമ്പിൻ ജ്യൂസ് പശിമയുള്ളതും മധുരമേറിയതുമാണ്. ഇത് പല്ലുകളിൽ പറ്റിപ്പിടിക്കാനും ദ്രുതഗതിയിൽ ബാക്ടീരിയകൾ വളരാനും ഇടയാക്കും. ഇത് പല്ലിലെ പോടുകൾക്കും ദ്രവിക്കലിനും കാരണമാകും. പല്ലുകൾക്ക് കേടുപാടുള്ളവരോ മോണയിൽ പ്രശ്നമുള്ളവരോ ഇടയ്ക്കിടെ കരിമ്പിൻ ജ്യൂസ് കുടിക്കുന്നത് പല്ലിന്റെ ആരോഗ്യം കൂടുതൽ വഷളാക്കിയേക്കാം.
ദഹനപ്രശ്നങ്ങളുള്ളവർ
ഗ്യാസ്, വയറു വീർക്കൽ, അസിഡിറ്റി അല്ലെങ്കിൽ ഐ.ബി.എസ് പോലുള്ള പ്രശ്നങ്ങളുള്ളവർക്ക് കരിമ്പിൻ ജ്യൂസ് അസ്വസ്ഥതയുണ്ടാക്കിയേക്കാം. ഇതിലെ പഞ്ചസാര വയറ്റിലെത്തുമ്പോൾ പെട്ടെന്ന് പുളിക്കുകയും ഗ്യാസ് ഉണ്ടാകാൻ കാരണമാവുകയും ചെയ്യും. വെറും വയറ്റിൽ കരിമ്പിൻ ജ്യൂസ് കുടിക്കുന്നത് ഇത്തരം ദഹനപ്രശ്നങ്ങൾ വർധിപ്പിക്കാൻ ഇടയുണ്ട്.
കരിമ്പിൻ ജ്യൂസ് രുചികരവും ആരോഗ്യകരവുമായ പാനീയമാണെങ്കിലും എല്ലാവര്ക്കും അനുയോജ്യമല്ലെന്ന് മറക്കരുത്. കരിമ്പിൻ ജ്യൂസ് കുടിക്കുന്നതിന് മുന്പ് നിങ്ങളുടെ ആരോഗ്യാവസ്ഥ കൂടി പരിഗണിക്കേണ്ടത് അത്യാവശ്യമാണ്. എന്തെങ്കിലും സംശയമുണ്ടെങ്കില് ഡോക്ടറോട് ചോദിച്ച് ഉറപ്പു വരുത്തുകയും വേണം. അതിന് പുറമെ ജ്യൂസ് കുടിക്കുകയാമെങ്കില് വൃത്തിയുള്ള സ്ഥലങ്ങളില് തയ്യാറാക്കുന്നവ മാത്രം കുടിക്കാനായി ശ്രദ്ധിക്കുക.