ഉറക്കത്തിനിടെ അപസ്മാരം ഉണ്ടാകുമോ? ഹിന്ദി ടെലിവിഷൻ താരം അനൂജ് ഠാക്കൂറിന്റെ മരണം ചർച്ചയാകുമ്പോൾ അറിയാം ഈ അവസ്ഥയെക്കുറിച്ച്

ഹിന്ദി ടെലിവിഷൻ താരം അനൂജ് ഠാക്കൂറിന്റെ അപ്രതീക്ഷിത മരണം വിനോദലോകത്തെ ഞെട്ടിച്ചിരിക്കുകയാണ്. മുപ്പതുകളിലായിരുന്ന താരം ഉറക്കത്തിനിടെ ഉണ്ടായ അപസ്മാരത്തെ തുടർന്നാണ് മരിച്ചതെന്നാണ് പുറത്തുവരുന്ന റിപ്പോർട്ടുകൾ. ഉറക്കത്തിനിടെ അപസ്മാരം സംഭവിക്കുമോ? പലപ്പോഴും തിരിച്ചറിയാൻ കഴിയാതെ പോകുന്ന ഈ അവസ്ഥ എത്രത്തോളം അപകടകരമാണ്? ലക്ഷണങ്ങൾ എന്തൊക്കെയാണ്?

ഉറക്കത്തിനിടയിലും അപസ്മാരം സംഭവിക്കാം

ഉറക്കത്തിനിടെ സംഭവിക്കുന്ന അപസ്മാരത്തെ നോക്ടേണൽ സീസർ (Nocturnal Seizure) എന്നാണ് വിളിക്കുന്നത്. ഉറങ്ങാൻ തുടങ്ങുമ്പോഴോ ഉറക്കത്തിനിടയിലോ ഉണരുന്നതിന് തൊട്ടുമുമ്പോ ഇത്തരം അപസ്മാരം സംഭവിക്കാം. തലച്ചോറിലെ വൈദ്യുത പ്രവർത്തനത്തിലുണ്ടാകുന്ന അസാധാരണ മാറ്റങ്ങളാണ് അപസ്മാരത്തിന് കാരണമാകുന്നത്. ഉറക്കത്തിനിടയിലെ വിവിധ ഘട്ടങ്ങളിലുണ്ടാകുന്ന മസ്തിഷ്ക പ്രവർത്തനത്തിലെ മാറ്റങ്ങൾ ചിലരിൽ അപസ്മാരത്തിന് കാരണമാകാം.

എല്ലാ അപസ്മാരവും പകൽ സമയത്തുതന്നെ സംഭവിക്കണമെന്നില്ല. ചിലർക്ക് ഉറക്കത്തിനിടെ മാത്രമായിരിക്കും അപസ്മാരം ഉണ്ടാകുന്നത്. മറ്റു ചിലർക്ക് പകലും രാത്രിയും ഇത് സംഭവിക്കാം. ഉറങ്ങുന്ന സമയത്തായതിനാൽ പലപ്പോഴും ഇത്തരം അവസ്ഥകൾ മറ്റുള്ളവരുടെ ശ്രദ്ധയിൽപ്പെടാതെ പോകാം.

എങ്ങനെ തിരിച്ചറിയാം?

ഉറക്കത്തിനിടെ അപസ്മാരം സംഭവിച്ചാൽ ചില ലക്ഷണങ്ങൾ പ്രകടമാകാം. ഉറക്കത്തിനിടെ ശരീരം പെട്ടെന്ന് വിറയ്ക്കുക, കൈകാലുകൾ അനിയന്ത്രിതമായി ചലിക്കുക, പെട്ടെന്ന് ഉണരുക തുടങ്ങിയവ ഇതിൽ ഉൾപ്പെടുന്നു. ചിലർക്ക് നാവിൽ കടിയേറ്റ പാടുകൾ, കിടക്കയിൽനിന്ന് താഴെ വീഴുക, മൂത്രം അറിയാതെ പോകുക തുടങ്ങിയവയും ഉണ്ടാകാം.

അപസ്മാരം സംഭവിച്ചശേഷം ഉണരുമ്പോൾ ആശയക്കുഴപ്പം, കടുത്ത ക്ഷീണം, പേശിവേദന, തലവേദന എന്നിവ അനുഭവപ്പെടാനും സാധ്യതയുണ്ട്. എന്നാൽ ഈ ലക്ഷണങ്ങൾ മാത്രം നോക്കി അപസ്മാരമാണെന്ന് ഉറപ്പിക്കാനാവില്ല. ഉറക്കത്തിലെ മറ്റ് ചില പ്രശ്നങ്ങളിലും സമാന ലക്ഷണങ്ങൾ കാണാം. അതിനാൽ ഡോക്ടറുടെ പരിശോധന ആവശ്യമാണ്.

എന്താണ് കാരണങ്ങൾ?

അപസ്മാരം പല കാരണങ്ങളാൽ ഉണ്ടാകാം. ചിലരിൽ ജനിതക ഘടകങ്ങൾ, തലച്ചോറിനുണ്ടാകുന്ന പരിക്കുകൾ, സ്ട്രോക്ക്, തലച്ചോറിലെ അണുബാധകൾ തുടങ്ങിയവ കാരണമാകാം. എന്നാൽ പലരിലും കൃത്യമായ കാരണം കണ്ടെത്താൻ കഴിയാറില്ല.

ഉറക്കക്കുറവും അപസ്മാരമുള്ള ചിലരിൽ രോഗാവസ്ഥ വഷളാക്കുന്ന ഘടകമാണ്. ആവശ്യത്തിന് ഉറങ്ങാതിരിക്കുക, ഉറക്കത്തിന്റെ ക്രമം തെറ്റുക തുടങ്ങിയവ അപസ്മാരത്തിന് പ്രേരകമാകാം. എന്നാൽ ഉറക്കത്തിനിടെ അപസ്മാരം സംഭവിക്കുന്ന എല്ലാവർക്കും ഒരേ കാരണമാണെന്ന് പറയാനാവില്ല.

ഉറക്കത്തിലെ അപസ്മാരം അപകടകരമാണോ?

ഉറക്കത്തിനിടെ സംഭവിക്കുന്ന അപസ്മാരം പലപ്പോഴും തിരിച്ചറിയപ്പെടാതെ പോകുന്നതിനാൽ അപകടസാധ്യതയുണ്ട്. അപസ്മാരത്തിനിടെ പരിക്കേൽക്കുക, ശ്വാസതടസ്സമുണ്ടാകുക തുടങ്ങിയ പ്രശ്നങ്ങൾ സംഭവിക്കാം. അപസ്മാരമുള്ള ചിലരിൽ അപൂർവമായി ഉണ്ടാകുന്ന പെട്ടെന്നുള്ള അപ്രതീക്ഷിത മരണാവസ്ഥയാണ് സഡൻ അൺഎക്സ്പെക്ടഡ് ഡെത്ത് ഇൻ എപ്പിലെപ്സി (SUDEP). എന്നാൽ ഉറക്കത്തിനിടെ ഒരിക്കൽ അപസ്മാരം ഉണ്ടായാൽ മരണം സംഭവിക്കുമെന്നല്ല ഇതിനർഥം. അപസ്മാരം നിയന്ത്രണവിധേയമാക്കുന്നതിനുള്ള ചികിത്സയും തുടർപരിചരണവും അപകടസാധ്യത കുറയ്ക്കുന്നതിൽ പ്രധാനമാണ്.

അപസ്മാരം ഉണ്ടായാൽ എന്തുചെയ്യണം?

ഒരാൾക്ക് അപസ്മാരം സംഭവിക്കുന്നത് കണ്ടാൽ പരിഭ്രാന്തരാകാതെ സുരക്ഷ ഉറപ്പാക്കുകയാണ് ആദ്യം ചെയ്യേണ്ടത്.

•  വ്യക്തിക്ക് ചുറ്റുമുള്ള അപകടകരമായ വസ്തുക്കൾ മാറ്റുക. തലയ്ക്ക് പരിക്കേൽക്കാതിരിക്കാൻ മൃദുവായ വസ്തു തലയ്ക്കടിയിൽ വെക്കാം.
•  അപസ്മാരം സംഭവിക്കുന്ന സമയം ശ്രദ്ധിക്കുക. സാധ്യമെങ്കിൽ എത്രനേരം നീണ്ടുനിൽക്കുന്നുവെന്ന് രേഖപ്പെടുത്തുക.
•  ശരീരം ബലമായി പിടിച്ചുവെക്കരുത്. കൈകാലുകളുടെ ചലനം തടയാൻ ശ്രമിക്കരുത്.
•  വായിൽ വെള്ളമോ മരുന്നോ ഭക്ഷണമോ വിരലുകളോ മറ്റേതെങ്കിലും വസ്തുക്കളോ ഇടരുത്.
•  വിറയൽ അവസാനിച്ചശേഷം ശ്വാസം സാധാരണ നിലയിലാണെങ്കിൽ വ്യക്തിയെ വശത്തേക്ക് ചരിച്ച് കിടത്താം.

അപസ്മാരം അഞ്ച് മിനിറ്റിലധികം നീണ്ടുനിൽക്കുകയോ, ഒന്നിനു പിന്നാലെ മറ്റൊന്ന് സംഭവിക്കുകയോ, ബോധം വീണ്ടെടുക്കാതിരിക്കുകയോ, ശ്വാസം സാധാരണ നിലയിലാകാതിരിക്കുകയോ ചെയ്താൽ അടിയന്തര വൈദ്യസഹായം തേടണം. ജീവിതത്തിൽ ആദ്യമായി അപസ്മാരം സംഭവിക്കുന്നവർക്കും അടിയന്തര വൈദ്യപരിശോധന ആവശ്യമാണ്.

ഉറക്കത്തിനിടെ അപസ്മാരം സംശയിക്കുന്നവർ ന്യൂറോളജിസ്റ്റിനെ സമീപിക്കണം. ആവശ്യാനുസരണം ഉറക്കസമയത്തെ മസ്തിഷ്ക പ്രവർത്തനം പരിശോധിക്കുന്ന സ്ലീപ് ഇഇജി (Sleep EEG), മറ്റ് പരിശോധനകൾ എന്നിവ ഡോക്ടർ നിർദേശിച്ചേക്കാം. അപസ്മാരം നിയന്ത്രിക്കാൻ മരുന്നുകളും മറ്റ് ചികിത്സാരീതികളും ലഭ്യമാണ്.

ശ്രദ്ധിക്കുക: ഒരു തവണ അപസ്മാരം സംഭവിച്ചതുകൊണ്ട് മാത്രം ഒരാൾക്ക് എപ്പിലെപ്സി ഉണ്ടെന്ന് അർഥമില്ല. അപസ്മാരത്തിന് മറ്റു ആരോഗ്യകാരണങ്ങളുമുണ്ടാകാം. കൃത്യമായ കാരണം കണ്ടെത്താൻ വൈദ്യപരിശോധന അനിവാര്യമാണ്.