ഇന്ത്യയിൽ കാൻസർ കേസുകളിൽ വർധനവ്; ഈ ശീലങ്ങൾ കാരണമാകാം

ന്യൂഡൽഹി: ഇന്ത്യയിലുടനീളം കാൻസർ കേസുകൾ അതിവേഗം വർധിച്ചുകൊണ്ടിരിക്കുകയാണ്. കാൻസർ ബാധിതരിൽ സ്ത്രീകളാണ് കൂടുതലെങ്കിൽ കാൻസർ മരണങ്ങളിൽ പുരുഷന്മാരാണ് മുന്നിൽ. എന്ത് കഴിക്കുന്നു എന്നത് മുതൽ എങ്ങനെ ജീവിക്കുന്നു എന്നത് വരെയുള്ള ദൈനംദിന ശീലങ്ങൾ, പ്രായഭേദമന്യേ എല്ലാ പ്രായക്കാർക്കും കാൻസർ സാധ്യത വർധിപ്പിക്കുന്നതിൽ നിർണായക പങ്ക് വഹിക്കുമെന്ന് ഓങ്കോസർജൻ കൺസൾട്ടന്റായ ഡോ. സുപ്രിയ ബംബർക്കർ മുന്നറിയിപ്പ് നൽകുന്നു.

സ്തനാർബുദം, ശ്വാസകോശ അർബുദം, ഓറൽ കാൻസർ, വൻകുടൽ കാൻസർ, സെർവിക്കൽ കാൻസർ, കരൾ കാൻസർ എന്നിവയുൾപ്പെടെയുള്ള കാൻസർ കേസുകളാണ് ഇന്ത്യയിൽ കുത്തനെ വർധിച്ചത്. മാത്രമല്ല, ധാരാളം രോഗികളും മൂർദ്ധന്യാവസ്ഥയിലാണ്. രോഗനിർണയം നടത്തുന്നത് വൈകുന്നതാണ് ഇതിന് കാരണം.

മോശം ഭക്ഷണക്രമം, സമ്മർദം, പുകവലി, മദ്യപാനം തുടങ്ങിയ നിരവധി ഘടകങ്ങൾ കാൻസറിന് കാരണമാകാം. ശരീരഭാരം കുറയൽ, നീണ്ടുനിൽക്കുന്ന ചുമ, അസാധാരണമായ മുഴകൾ, രക്തസ്രാവം, ക്ഷീണം, അല്ലെങ്കിൽ മലവിസർജന ശീലങ്ങളിലെ മാറ്റങ്ങൾ തുടങ്ങിയ ലക്ഷണങ്ങൾ പലപ്പോഴും അവഗണിക്കപ്പെടുന്നു. ഇത് രോഗനിർണയം വൈകുന്നതിലേക്ക് നയിക്കുന്നു.

കാൻസറിനെ സമയബന്ധിതമായി കൈകാര്യം ചെയ്യുന്നത് വിജയകരമായ ഫലങ്ങൾക്ക് പ്രധാനമാണ്. ജീവിതശൈലിയുമായി ബന്ധപ്പെട്ട കാൻസറുകളിൽ ശ്വാസകോശം, തൊണ്ട, സ്തനം, വൻകുടൽ, കരൾ, പാൻക്രിയാസ്, സെർവിക്കൽ, ആമാശയം എന്നിവ ഉൾപ്പെടുന്നു.

ഡോ. സുപ്രിയ ബംബർക്കർ മുന്നറിയിപ്പ് നൽകുന്ന കാൻസർ വരുത്തുന്ന ചില അപകടകരമായ ശീലങ്ങൾ ഇവയാണ്

• പുകയില ഉപയോഗമാണ് വായയിലെ കാൻസറിന് പ്രധാന കാരണം. ഇവ ശ്വാസകോശത്തെയും തൊണ്ടയെയും ബാധിക്കുന്നു.

• അമിതമായ മദ്യപാനം കരൾ, സ്തനാർബുദം, ദഹനേന്ദ്രിയ അർബുദം എന്നിവയ്ക്ക് കാരണമാകും.

• എണ്ണയിൽ വറുത്ത ചുവന്ന മാംസം (Red Meat) അടങ്ങിയ അനാരോഗ്യകരമായ ഭക്ഷണക്രമം വൻകുടൽ കാൻസറിന് കാരണമാകും.

• ഭക്ഷണത്തിലെ പഴങ്ങളുടെയും പച്ചക്കറികളുടെയും കുറവ് സംരക്ഷിത ആന്റിഓക്‌സിഡന്റുകളുടെ അഭാവത്തിലേക്ക് നയിക്കുന്നു. ഇത് കുടൽ, ആമാശയം, പാൻക്രിയാറ്റിക് കാൻസറിനെ ക്ഷണിച്ചുവരുത്തും.

• ശാരീരിക നിഷ്‌ക്രിയത്വവും ഉദാസീനമായ ജീവിതശൈലിയും സ്തനാർബുദത്തിനും ശ്വാസകോശ അർബുദത്തിനും കാരണമാകും.

• പൊണ്ണത്തടി- സ്തന, ഗർഭാശയ, വൻകുടൽ കാൻസറുമായി ബന്ധപ്പെട്ടിരിക്കുന്നു.

• മലിനമായ സാഹചര്യത്തിൽ ജീവിക്കുന്നതും വിഷകരമായ രാസവസ്തുക്കളുമായി സമ്പർക്കം പുലർത്തുന്നതും ശ്വാസകോശ അർബുദത്തിന് കാരണമാകും.

• സുരക്ഷിതമല്ലാത്ത ലൈംഗിക ബന്ധങ്ങൾ സെർവിക്കൽ, മലദ്വാരം, ലിംഗം, വൾവ തുടങ്ങിയ HPV സംബന്ധമായ കാൻസറുകളുടെ സാധ്യത വർധിപ്പിക്കുന്നു.

പുകവലി ഉപേക്ഷിക്കുക, പുതിയതും സമീകൃതവുമായ ഭക്ഷണം കഴിക്കുക, സമ്മർദം നിയന്ത്രിക്കുക, മദ്യപാനം ഉപേക്ഷിക്കുക, പതിവായി പരിശോധനകൾക്ക് വിധേയമാകുക തുടങ്ങിയ ജീവിതശൈലി മാറ്റങ്ങൾ കാൻസറിനെ തടയാൻ സഹായിക്കുമെന്ന് തിരിച്ചറിയുക.