ന്യൂഡൽഹി: സാംസ്കാരിക വൈവിധ്യവും ആഡംബരവും കൊണ്ട് പേരുകേട്ടതാണ് ഇന്ത്യൻ വിവാഹങ്ങൾ. ജീവിതകാലം മുഴുവൻ സമ്പാദിച്ചതൊക്കെയും ഒരൊറ്റ വിവാഹത്തിന് വേണ്ടി ചെലവഴിക്കാൻ മടിയില്ലാത്തവരാണ് ഇന്ത്യക്കാർ. ഡിസൈനർ വസ്ത്രങ്ങളുടെ അകമ്പടിയോടെ ദിവസങ്ങളോളം നീണ്ടു നിൽക്കുന്ന വിവാഹ ആഘോഷങ്ങളാണ് പലരും സ്വപ്നം കാണുന്നതും, യാഥാർഥ്യമാക്കുന്നതും. എന്നാൽ ഇതിൽ നിന്ന് വ്യത്യസ്തമായി ഒരു വിവാഹം സോഷ്യൽ മീഡിയയിൽ തരംഗമാവുകയാണ്.
വിവാഹ ആഘോഷങ്ങൾക്കായി ഒരുപാട് പണം ചെലവഴിക്കുന്നതിന് പകരം പുതിയ വീട് വാങ്ങി ആ വീട്ടിൽ വിവാഹിതരാകുന്ന ദമ്പതികളുടെ വിഡിയോയാണ് ഇപ്പോൾ ചർച്ചയാവുന്നത്. അടുത്ത കുടുംബാംഗങ്ങളുടെയും ലളിതമായ ആചാരങ്ങളുടെയും നടുവിൽ, പുതുതായി വാങ്ങിയ വീട്ടിൽ വിവാഹിതരാവുന്ന ദമ്പതികളുടെ വിഡിയോ ഇപ്പോൾ വൈറലാണ്.
ചെലവേറിയ വിവാഹ ആഘോഷങ്ങൾ ഒഴിവാക്കി, ആ പണം ഉപയോഗിച്ച് ഒരു വീട് വാങ്ങാൻ കുടുംബം തീരുമാനിച്ചതായി വരന്റെ സഹോദരൻ വിശദീകരിക്കുന്നു. ഇന്ത്യൻ കുടുംബങ്ങളിൽ സാധാരണമായി കാണപ്പെടുന്ന അമിതമായ സമ്പത്ത് പ്രദർശനങ്ങളെക്കാൾ സ്നേഹത്തിനും സ്ഥിരതക്കും മുൻഗണന നൽകാനുള്ള ദമ്പതികളുടെ പ്രതിബദ്ധതയാണ് വിഡിയോ എടുത്തുകാണിക്കുന്നത്.
ഫെബ്രുവരി 4ന് ഐഎഎസ് വേൾഡ് ഒഫീഷ്യൽ ഇൻസ്റ്റാഗ്രാമിൽ പങ്കുവെച്ച വിഡിയോയിൽ വധുവും വരനും വിവാഹ പരിപാടിക്കായി കരുതിവച്ചിരുന്ന ഭീമമായ തുക അവരുടെ ആദ്യത്തെ വീടിനുള്ള ഡൗൺ പേയ്മെന്റായി ഉപയോഗിച്ചതായി പറയുന്നു. വിഡിയോ പ്രചരിച്ചതിന് പിന്നാലെ നിരവധി പേരാണ് ദമ്പതികളുടെ തീരുമാനത്തെ പിന്തുണച്ചും വിവാഹ ആശംസകൾ നേർന്നും രംഗത്ത് വന്നിട്ടുള്ളത്.